Document

Kibùʼ wùn à Ngàyí

Mulualem Daba

Abraham Muzee

Yi-iì dzə̀ é kishiíy kímóʼ kí ŋgàyí wáa dzə̀ e ghaa kibaŋ, a yor shúy. Kibáŋ kin ki-iì fàŋ féyì. Kibùʼ ki nèn lò, e wìy fo, wùn wun sháʼnén.

Kibùʼ ki nèn dzə̀r ji ŋgàyí sà yii dzə́ a dzə̀ feé á? Ngàyí bìnèr jii, "M yii dzə́ a dzə̀ é mvə̀m kibàŋ." Kibùʼ kí́ yuúrí, kí jívír wun, wù dzə́r jii, "Wìr loó dzə e mvə̀m ndzə̀v bey, wù wàa koo e le? Kijuŋ à?"

Ŋgàyí bìnér jii, "Wìr lóo dzə e mvə̀m ndzə̀v, wù wàa yu vijuŋ. À lo, à wàa dzə ké a dzə̀ feé?" Kibùʼ ki bìnèr jii, "M dzə́ kém a dzə̀ é vici. Viyíkìr vém ví dzə̀ báŋ se vici wùn à vav si. Vé vee viyíkìr vi dzə̀ ka?"

Ŋgàyí bìnèr jii, "M yii kfə́r a dzə̀ nyám." A ŋgàyí binèr bèy nèn kwaʼtì mo wù lo e koo kibùʼ e kfər. Wù nèn dzə̀r e kibùʼ ki jii, "A dzə̀ à làʼ ndzə́v á?"

Kibùʼ ki bìnèr jii, "Àáyà, àáyà. Yòʼ dzə̀ m làʼ." Ŋgàyí nèn yòŋ jii, "M lo e yeʼéy wò mo á yii láʼ ndzə́v." Kibùʼ ki sháʼnén jii, "Àáyà m yoʼ kér shií shó."

Ŋgàyí nèn a levtí Kibùʼ, a suuy jii, "Wòsò sì ŋkar si. A kfə̀n fan ka fo mǒ wùn? Kóʼ e dzə̀ʼə̀m e mǒ ndzə̀m." Á bèy, kibùʼ ki nèn kòʼ dzə̀ʼə̀m e ŋgàyí ndzə̀m. Ŋgàyí nèn kèʼ a laʼ a dù.

Áwune dù e mèé e kintìntìn ke kibaŋ ŋgàyí dzə́r e kibùʼ ki jii, "À yú aà koó e le, lèn wo á siìn é mvə̀m ndzə̀v? À koó kijuŋ à?" Kibùʼ ki bìnèr jii, "Kí boŋ a dzə̀ boŋ. Wúné boŋ mo féyì."

Ŋgàyí nèn lò e shwèm, e sùúy e kibùʼ ki jii, "Fər tàr wor joy feyì. Vèr yóʼ ne kòóy shív sée fèr wun sho."

Kindzə́m kí nèn gwàr Kibùʼ, wù nèn lò a yàʼ yàʼàn. Wù nèn mèŋ ji wun sà lo e ghan e le bóo sòsìn, e leʼ a?

Kibùʼ ki keérí kwaʼtì yímóʼó, e nèn yòŋ e ŋgàyí jii, "Kí bòŋ ne. M lo e fo shilív shém é fər tàr won kfə́r. Wù lo e kfər, e nèn bonén."

Ŋgàyí yú vijuŋ e nèn dz̀ər e Kibùʼ ki jii, "À suuy rú a? À dzə̀ rú kibáʼtín ji wò-oò fò shilív shé e fər tàr wor a?" Kibùʼ ki binèr jii, "Eènó, kinyo ki yòʼ dzə̀. Wòsò sì ŋkar si."

Ntàm lòo dàr, kibùʼ ki nèn lo e sùúy jii, "M kér mendzən feyì jii, m ki làysìn a shilív shém e kici. Wòsò kfən é bàm m dù, e lì e wìy sho."

Ŋgàyí sə́ʼə́m, e nèn lò e dzə̀r e Kibùʼ ki jii, "À kù yòʼ suuy rú a? À kù yòʼ dù, e li shilív shé fo kici, e wìy sho a?" Kibùʼ ki biímé jii, "Eènó, m du e wìy sho, e kfən tsəəné wò é wòsò du e yèn fər tàr won."

Ŋgàyí biímé, e nèn làʼ ndzə́v e kfə̀n e meshavtí me kibàŋ. Mo áwune fəən fó kwaʼ, kibùʼ ki nèn lìy, e sə̀ʼə́y fo ŋgàyí ndzə̀m.

Wù kóʼ e bìʼír e kici, e nèn jàŋ ŋgày e sùúy sho jii, "Ŋkar yèm, wòsò bèr ne. Beerì wò mo à ki liìn mo wòsò ghánén é kibaŋ."

Kinyo kin ki nyár ŋgay féyì. Wù gheésí tóŋ, e dzə̀r e Kibùʼ ki jii, "Bó à fèn kì bóʼti mo á? Fèn dzə̀ ji à yòʼ lì shilív shé e wìy sho a?" Kibùʼ ki bìnèr jii, "A là fo shilív shém shí ki dzəə̀n e mǒ wùn, bo m yoʼ lò e yù fó koʼ e dzə̀ʼə̀m e wò ndzə̀m."

You are free to download, copy, translate or adapt this story and use the illustrations as long as you attribute in the following way:

Kibùʼ wùn à Ngàyí

Author - Mulualem Daba
Translation - Beatrice Tafon Takeh, Mbinkar Emmanuel Keelen
Illustration - Abraham Muzee
Language - Lámnsoʼ
Level - First paragraphs