Document

Və́y, Mendzə́v, Suuyrú wùn à Kimboʼtì ki

Merga Debelo

Marion Drew

Və́y, Mendzə́v, Suuyrú wùn à Kimboʼtì ki-iì dzə̀ ŋkar sí.

Yii bèy la Kimboʼtì ki yòʼ- oò kòŋ viŋkar vìn. Wù nèn a tàʼ e bvəə́r viŋkar vév.

Wáa dzə e kishiíy kìmóʼ kí Kimboʼtì ki suúy jii, "Yiì ka fo wòsò du e tàʼ woŋ wo wú dzə̀ə́ kisáŋ? É wìr wáa saʼ və́ woo woŋ." Áwune nèn biìmé e kèʼ ghán.

Kimboʼtì ki nèn dù yèn Mendzə́v e sùúy jii, "Və́yí dzə̀ ŋgaà vibàn wòsò. Wú lo wù wàa tòn kifá kidzə̀m. Ghèén é wòsò taʼ woŋ a dzə̀ wo wù yòʼ dzəə̀n fó menstə̀m."

Mendzə́v mè dzə́r jii, "A dzə̀ wòsò yèe lèn?" Kimboʼtì ki bìnèr jii, "Bo dzə̀ cáʼ ji wòsò yíi yuyrí a wun. A jòʼsì wo wó à kér vitaáví veé yiì kinyo kìn. Lóo dzə e ghan se wù dzə́ fo nsay, à saàmé é wùn wó, e yùy wun."

Mendzə́v mè bìnèr jii, "A m yiì bèy, bo m lo e cuùrì e kitu ke nsay e làa yòʼ kfə̀n a dzə fo mǒ kitu." Á bèy Kimboʼtì ki suúy jii, "Kinyo ki yòʼ dzə̀, m yíì neèr tíy si fó nsay, é laà yòʼ lèŋ, é m koò wò e bàm." Kimboʼtì ki nèn neèr tíy sí, sée koo Mendzə́v shó.

Mo kinshùʼùm kè və̀y kí dzə̀ʼə̀mèn, Mendzə́v mè cuùrí wún və́ e dzə̀m. Á dzə́ə ye Kimboʼtì ki-iì laàrìn və́y shó. Áwune nèn a dù ghán yév.

Wáa dzə e ghan símóʼ sí, Kimboʼtì ki suúy e Mendzə́v mè jii, "Leéy, yiì ka fo à dzəʼəm é kirùmèn fèn a leéy vijuŋ ve wòŋ?"

Mo Mendzə́v mè dzə̀ʼə̀mèn, Kimboʼtì ki nèn nyàʼtí e shòʼtí tíy se sí-iì dzəə̀n é sar wo. Mendzə́v mè nèn lèŋ. A kimaysì ké Mendzev bey.

Lèn və̀n, nèn bèr ji Kimboʼtì ki laar á Suuyrú. Mo áwune ghánenè, e du mèé e gwan wo kuʼùn wùmòʼ, Kimboʼtì ki nèn sùúy e Suuyrú ji wù tiím a e sar gwan.

Wù nèn dòm kimà ké tiy ji kí bvə́ʼə́y á Suuyrú.

Kí nèn tàʼrí taʼrín, sibaŋé fəə̀ fó fo kfəə́ e nín wùn à kisha ke mbàm ke fəvír kí, à kee daymon ki. Suuyrú nèn mùm, e ŋàŋrì e fəə̀ fó mvə̀m vimbvəʼ ve tiy viy.

Kimboʼtì ki nèn sə̀ʼə́y ji wun leéy á wún Suuyrú. Yii bèy, e nèn yèn a dzə̀ kfəə́ se sibaŋ sìy. Wù nèn dzə̀r jii, "Vin vi fəə̀ a dzə̀ fó feé?"

Suuyrú binèr jii, "Mo tíyí gbuùn e mǒ kitu, nen fəə vin vee vifá." Kimboʼtì ki nèn a kòŋ sa vifá vee sibaŋ vin. Wù nèn sùúy jii, "M yíi səy sa e sar gwan, áà kóʼ fó yuv, e dòm sa kimà ké tiy e mǒ kitu."

Á bèy Suuyrú nèn kòʼ e dòm kimà ké tíy.

Tíy rəyi gbù e Kimboʼtì ki kitu, e nèn bvə̀ʼə́y wun, wù kpú.

You are free to download, copy, translate or adapt this story and use the illustrations as long as you attribute in the following way:

Və́y, Mendzə́v, Suuyrú wùn à Kimboʼtì ki

Author - Merga Debelo, Elizabeth Laird
Translation - Beatrice Tafon Takeh, Mbinkar Emmanuel Keelen
Illustration - Marion Drew
Language - Lámnsoʼ
Level - First paragraphs

© African Storybook Initiative 2016
Creative Commons: Attribution 4.0
Source www.africanstorybook.org
Original source www.ethiopianfolktales.com