Document

Ntir ye bàá

Mohammed Kuyu

Jacob Kono

Bàá wùmòʼ-oò dzə̀ a wù kér wón vee vilum abaà.

Kishiíy kímóʼ kí gheén, wù jàŋ wón və́ e sùúy jii, "Ghán sém sé kpu si sí gheenè. É bo m waá kpu, m taʼ e yen, a wìr si e wun lav ye wù bàʼrìn. Wìr kér ŋwee e mòʼón wóo bàʼrì lav rə. M taʼ yen ven fen a dzə̀ é bǎm ŋwee fur."

Wón vee abaà viyi nèn meèkír fo ndzə. Wo mbìy nèn dù, e nə̀ə́ e kighìn. Wù-uù gwàr vicí, e nèn kù kèʼ a bàʼrì lav rə a yì dzə̀ e kuʼùn.

Wo bàm nèn dù kfə́ e kèʼ a koo a dzə̀ viŋkar ve ví meen é viŋkar wùn à kfəə́ símóʼ sí. Wù-uù dù fo wíri jeéy jeéy, du fo woo shó, wù nèn kù yoŋ ji wun sì á wán wov.

Ŋwee wìy kpù, wón vee abaà viyi nèn kfə̀n fo tàr wóv wùn. Wù suúy jii, "Vèn wìy kijùŋ, vèn bàʼrì ne láʼ sén a?" Wón vin adzə̀me nèn biìmé jii, "eènó."

Bàá wùn wàn woo ŋgàywìr nèn dù ji bàá yén a suuyrú. Wù dù e yèn a wù bàʼrì rú lav sinén. Wù nèn a ghanrí a leéy lav sìn. Wù mee e yee shó, wù dzə̀r jii, "Wìr sí dzə́ e lav fèn à?" Wù lóo dzər, sií lóo dzər, bo wàn kù binèr a dzə̀ jii, "Àáyà."

Bàá waʼrì wù kù dzə̀r jii, "Wìr sí dzə́ e lav fèn à?" Wù dzə́r bèy wàn kù bìnèr jii, "Àáyà."

Á ghán bey, jìŋ nèn lò a yar bàá, a wìr yòʼ dzə̀ wóo fo kifá ke wù yí. Bàá nèn yòŋ jii, "Á wáa dù fo laʼ." Áwune nèn a dù.

Wan wo bàm lì fə́r və wùn bàá, áwune dù e yèn kfə́ə mbìyi fo vé-eè səəsin wun, a ker ji wán wov. Wù dìn áwune, e yòn jii, "Və̀n dzə̀ bàá wom, a və̀n dzə̀ fə́r wom." Kfəə́ yee shoone səə́sí áwune. Vé-eè seè njiì, e fèr viyíkìr sho vigháʼán, e tàr áwune shó.

Áwune nèn siì dù, e yèn kfəə́ ye yí batin, fo vé-eè səəsin wun, a ker ji wán wov. Wù din bàá və wun fər və. Wír vee fóo ku fèr viyikir vigháʼán, e tàr áwune shó.

Vé-eè gèʼ e bàá wùn wàn virə́ʼ vidzə̀m fo wan bàm-eè yiìn ne e dù á səə́si wun ji wán wov. Áwuné-eè yìkír ben e bìnsí. A màysì, e nèn kfə̀n fó laʼ.

Bàá nèn yòŋ jii, "Á nsàv kinyò ke mò-oò yòŋèn jii, Wìr baʼri a rə́ yeé láʼ. Kirə́ʼ ké dzə ki yòʼ jòʼ a dzə̀ lav see bóm sinén, kin kimà ké lav keé lì mbàm sigháʼán e bom sho. Kirə́ʼ ké dzə ki dzə̀ fóo fèy fo wíri dzə́ koŋnìnè."

You are free to download, copy, translate or adapt this story and use the illustrations as long as you attribute in the following way:

Ntir ye bàá

Author - Mohammed Kuyu, Elizabeth Laird
Translation - Beatrice Tafon Takeh, Mbinkar Emmanuel Keelen
Illustration - Jacob Kono
Language - Lámnsoʼ
Level - First paragraphs

© African Storybook Initiative 2016
Creative Commons: Attribution 4.0
Source www.africanstorybook.org
Original source www.ethiopianfolktales.com