Document

Adun woo kimbòŋ ke wiíy

Taiwo Ẹhinẹni

Wiehan de Jager

Adun dzə̀ wánlè ŋgòn, a wù-uù bòŋ féyì. Vilum adzə̀m veé ntèʼé-eè koŋ ji á wáy á wun e lav ji wiíy. Yii bèy, Adun tén áwune adzə̀m.

Wáa dzə e kishiíy ké way kímóʼ kí, wánlè nsùm wùmòʼ foò shwín sí fo wìr wùmòʼ, e foò kóy si fo wùmòʼ, e siì foò bvəm wùn à nsaŋ si fo wùmòʼ. Wánlè nsùm və̀n báʼtí vibar ve wun vin, e lì kitú a dzə̀ kfə́ e tìír fo yuv, e nèn dù e way.

Wánlè nsùm və̀n-eè koŋ Adun, e nèn wày wáyín ji wù kù yii a dzə a wiíy və. Adun leéy wánlè nsùm və̀n, wúné bòŋ wun bìʼ mbom rə. Adun nèn a koŋ ji wù wáa dzə a lúm və. Mo wánlè nsùm və̀n fə̀m-eè wìyìn fó ntèʼ yìmòʼ kwaʼda, Adun nèn kù biìmé wùn wun wáa dù.

Áwune loo meé fo laʼ, ŋgaà shwìn si nèn sə̀ shwín sə́ é bàm. Ŋgaà koy si nèn sə̀ kóy sə́ é bàm. Ŋgaà wo wù ki foon bvəm wùn à nsaŋ si nèn màysì e sə̀ é bàm.

Nèn kù gòʼ kitú, wùn Adun nèn kù a dù. Wúné nèn a beemé Adun beémén, yii bèy, là wù yòʼ lèʼ. Wùn kitú kìy ki nèn dù e nə̀ə́ e wùn lav.

Ndzə bvəə́shi e ràn, kitú ki lo ji wun sí dú a e kwaʼ, e nèn sùŋnín wùn à kibóŋaàrí kí jii, "A kí kòóy ji Adun siíy a leʼ, a tòŋ sóŋ rən, é m nèn kiíy."

Kitú ki suúy bey, e nèn lò. Adun siíy e bàʼtí vifá və́, e nèn kèʼ ji wùn waà sí léʼé.

Kiboŋaàrí kí yén, e nèn a toŋ sóŋ, a yòŋ jii, "Kitú, kitú, Adun bàʼtí ne vifá ji wun waà sí léʼé."

Kitu ki nèn wìy e yèn Adun e dzə̀r sho jii, "À kwàʼ ji dzə̀ à lèʼ du fèé?" Adun nèn kfə̀n é bàm, e dù a dzə e kitú ki lav.

Ghán sí lòo dù, Adun nèn dù e yèn ŋgaà shìv ji wù leéy e yòŋ a kinyo ke dzə̀ wù yiì. Ŋgaà shìv nèn tìr wun jii, "A du, à yùn kún ye kaŋéné. À wiy sho, à tòv é meŋgvə́r me baàr mè, e wày e sòŋ ye kiboŋaàrí kí lo kí wàa toŋ."

Adun nèn dù, e yiì mo ŋgaà shìv kì naàrìn. Wù lì kún ye kaŋén rəy e wày é sòŋ a yí dzə̀ meŋgvə́r meŋgvə́r.

Ndzə bvəə́shi e ràn, wù túʼ vifá və́, e nèn siì kèʼ kileʼ. Kiboŋaàrí kí lì sóŋ ji wun waà sí tóŋé, kún ye kaŋén rəyi kù nèn a tumkír e wun shuù, a yí koó bèn e juujùŋ.

Kiboŋaàrí kí ku nèn a yí yiín, a yí yiín, a yí yiín. Á bèy Adun nèn sòsìn e lèʼ.

You are free to download, copy, translate or adapt this story and use the illustrations as long as you attribute in the following way:

Adun woo kimbòŋ ke wiíy

Author - Taiwo Ẹhinẹni
Translation - Beatrice Tafon Takeh, Mbinkar Emmanuel Keelen
Illustration - Wiehan de Jager
Language - Lámnsoʼ
Level - First paragraphs