Logwaja abetilalele ngaphasi kwesihlahla semahhabhula. Kwatsi angakacabangi, kwawa lihhabhula etukwakhe.

Khona lapho kwevakala livi, "Ye logwaja, baleka!" Nangembala, vutfutfu wavuka wabaleka.

Ekubalekeni kwakhe, wahlangana nenkhukhu.

Yabuta, "Kwentenjani logwaja wabaleka kangaka?" Waphendvula logwaja ngekusheshisa. "Angati, kodvwa ngive intfo iwela etukwami ngase ngiva nelivi litsi, "Baleka logwaja, baleka!"

Inkhukhu nayo yafikelwa kwesaba, yacala yabaleka nayo nayiva indzaba yalogwaja.

Basabaleka, batitsela enjeni.

Yabuta inja, "Nibalekelani?" Kwaphendvula inkhukhu, "Angati nje kutsi logwaja ubalekela ini. Utsi uve ngentfo iwela etukwakhe kwasekumemeta livi litsi, 'Baleka logwaja baleka!'"

Inja yamangaliswa ngulesimanga sendzaba, kodvwa nayo yabaleka nanogwaja nenkhukhu.

Basabaleka bonkhe bahlangana nelihhashi.

Lihhashi labuta inja. "Yini kwentenjani, nibalekani?" Inja yaphendvula yatsi, "Angati, nami nginele kuva inkhukhu itsi ive logwaja atsi kunentfo lewele etukwakhe, wabese uva livi litsi akabaleke, wabaleka."

Nalo-ke lihhashi labaleka kanye naletinye tilwane.

Endleleni bahlangana nembongolo.

Yabuta, "Kwentenjani nibalekani?" Kwaphendvula lihhashi, "Angati uyati, nginele kuva inja itsi ive ngenkhukhu kutsi ibalekelani nayo leve ngalogwaja atsi uve infto iwela etukwakhe, wase uva livi litsi, 'Baleka logwaja baleka!'" Wesuka wabaleka-ke naye.

Hhayi-ke nayo imbongolo yabaleka.

Bonkhe basagijima, bahlangana nenkhomo.

Yabuta inkhomo, "Nibalekelani?" Imbongolo yaphendvula, "Nami angati, ngive nje lokushiwo lihhashi kodvwa nalo alati. Live lokushiwo yinja nayo beyingati, ive lokushiwo inkhukhu nayo ayati, ive lokushiwo ngulogwaja, naye akati. Utsi uve intfo iwela etukwakhe wase uva livi litsi, 'Baleka logwaja baleka!'"

Inkhomo nayo yakhatsateka yacala yabaleka.

Bahlangana nelikati.

Labuta likati, "Kwentenjani, nibalekelani?" Kwaphendvula inkhomo, "Angati. Ngive lokushiwo yimbongolo kodvwa nayo ayati kahle. Itsi nayo ivenge lihhashi lelingati kahle nalo lelive ngenja lengati nayo leve ngekutsi inkhukhu itsini, nayo leve ngalogwaja atsi kunentfo lewele etukwakhe wabese uva livi litsi, 'Baleka logwaja baleka.'"

Likati nalo labaleka naletinye tilwane.

Bahlangana nemfana lobekagibele libhayisikili.

Wabuta, "Kwentenjani, nibalekelani?" Tilwane taphendvula, "Asati, sive loko lokushiwo ngulogwaja longati. Uve ngentfo iwela etukwakhe wabese uva livi litsi, 'Baleka logwaja baleka!'"

Umfana wafa insini ahleka tilwane.

Logwaja abetilale ngaphasi kwesihlahla semahhabhula. Kubesekucala umoya lomkhulu. Lelinye lemahhabhula lawela etukwakhe logwaja.

Ngimi lengitse, "Baleka logwaja baleka!"