"Kulomnyaka sitawube sinemhlangano lokhetsekile wemindeni," kumemetela make Bunjwa. "Bobani labatawufika? Ngiyetsemba bonkhe baboBunjwa batawube bakhona."

"Maye, sengikhumbule bomzala bami," kusho Khosi. "Ngikhumbule umndeni wakitsi kakhulu, boCalane," uyamoyitela make.

"Yebo sesikhatsi lesidze singabonani boCaladze, Sikwele kanye naRombasi," kusho babe Bunjwa. "Ningakhohlwa kutsi sebanebantfwana labatsatfu nyalo!" make ukhumbuta babe.

"Nisamkhumbula yini mzala Sikalini nebantfwabakhe? Ngabe nabo bayeta yini?" kubuta Vusi. "Yebo, kufanele ngobe nabo bangumndeni waboBunjwa, naloku nje bangasibo Bocalane." Kuphendvula make.

"BakaCalantsatfu. Bantfwababo boCalalingana." "Yebo, ucinisile, umndeni wakaCalantsatfu!" kumemeta Vusi. "Kodvwa-ke bafana kakhulu naboCalane."

"Hhayi! Angivumi," kusho make. "Bocalantsatfu banemacala lamatsatfu, kantsi bocalane banemacala lamane, njengami."

Babe Bunjwa wananatela, "Ngijabule kakhulu ngobe bomzala bami labatsatfu nabo batawube bakhona, boCalahlanu, Calasitfupha naboCalashiyagalombili. Nabo bangumndeni munye nebaboBunjwa."

"Babe, kungani batsi singebaboBunjwai?" kubuta Vusi. "Kutsiwa singebaboBunjwa nje ngobe singemadayimenshini lamabili. Sentiwe ngemigca lecondzile kantsi simo setfu sivalekile, njengobe nawe uyatibonela, yonkhe imigca yetfu ihlanganisiwe. Bonkhe bomzala betfu boCalantsatfu, boCalane boCalasitfupha naboCalasishiyagalombili batawube basivakashele," kusho babe.

"Ngabe utse naCalashiyagalombili uyeta naye? Ngabe naye usihlobo setfu?" kubuta Khosi. "Kunjalo ndvodzakati, ngekumbuka nje, nawe utatibonela kutsi wakulomndeni.

Kumele ubukisise kutsi mangaki emacala labanawo bomzala bakho, ngobe ungagcine ungawuboni umehluko. Mzala Calasishiyagalombili unemacala lasiphohlongo," kusho babe.

"Ngiyeva babe, utsini ngaboCalahlanu naCalasitfupha?" kubuta Vusi. "Calasitfupha unemacala lasitfupha," kuphendvula babe.

"Calahlanu unemacala lasihlanu. Loko sakufundziswa nguthishela," kusho Khosi.

"BoCalantsatfu naCalane abafani ngobe nemacala abo awalingani," kusho make.

"YeBabe! Ngabe mangaki emacala aCalasikhombisa?" kubuta Vusi. Babe wakhe uyamhleka ubuye atsi, "Angeke ngize ngikutjele. Uyakhumbula kutsi sike satsatsa sitfombe sinabo le emshadweni wamalume wakho. Ngifuna kutsi ubukisise sitfombe bese uyangitjela kutsi ubonani."

Vusi wabukisisa sitfombe wabese uyaphendvula masinyane, "Calasikhombisa unemacala lasikhombisa." kwengeta Khosi. "Kunjalo, uyakhumbula kutsi thishela wasifundzisa njalo."

"Yemkami, utsi uyababona kutsi bahlakaniphe njani labantfwabetfu? Kulungile-ke, ngabe niyamati Calashumi?" kubuta babe. "Lishumi! Lishumi!" kumemeta Vusi naKhosi kanyekanye.

"Yebo! Kungako lomunye wabomzala benu abitwa ngekutsi nguCalashumi, kodvwa yena aketi ngobe kumele ayomela licembu labo lekuhlamba. Batsi bayingcosana esikolweni sabo boCalashumi," kusho make.

Bantfwana bacela kubatali babo, "Make nawe babe, singammema umngani wetfu Ndzilinga wakamakhelwane?" Batali babo bavuma kutsi Ndzilinga angeta ahlanganyele nemndeni wabo.

Kwatsi kusenjalo beva kunconcotsa emnyango, babe wasukuma ngekushesha wayohlola. "Sebafikile bakaCalane! Namukelekile! Namukelekile!" kusho babe.

Basukuma bonkhe ngekujabula babingelela labangenako boSikwele, Caladze kanye nebantfwana labatsatfu bakaRombasi.

Umndeni wakaCalantsatfu nawo uyanconcotsa emnyango ngemva nje kwekungena kwabakaCalane, BoSkalini naboCalalingana bebadziniwe ngemva kweluhambo lwabo loludze, kodvwa bebatsakasele kubona umndeni wonkhe.

Ekugcineni bagcina bafikile boCalasishiyagalombili naCalasikhombisa kanye nebantfwababo, babili boCalasihlanu naCalasitfupha. Bafike naboTikwele labatsatfu.

Calasishiyagalombili wachaza watsi, "Ngiyetsemba angeke nibe nenkinga yekutsi site naboCalane labatsatfu basesigodzini sakitsi. Abakaze bavakashele edolobheni ngaphambilini."

"Hhayi-ke bangani netihlobo bamukelekile ngaso sonkhe sikhatsi lapha ekhaya," kusho make. Babese bacela bonkhe bantfwana kutsi bayodlala ngaphandle.

"Singadlala muphi umdlalo?" kubuta Vusi. Waphendvula Calalingana watsi, "Asidlaleni umdlalo wekushelela!" Bonkhe bantfwana bemndeni waboBunjwa bacala kushelela.

"Nami ngifuna kudlala nani, ngingadlala? Ngifuna kushelela nami," kusho Ndzilinga. Lomunye kubantfwana baSikwele watsi, "Awutiboni nje kutsi sinjani simo sakho? Phela wena awufani naboBunjwa. Tindzilinga tiyagicika."

Ndzilinga weva buhlungu kakhulu. Akusimnandzi kutsi nanidlala kube khona longadlali. Vusi watsi, "Niyati yini, mine ngibona kuncono sidlale umdlalo lotawenta naNdzilinga akhone kudlala natsi."

Bonkhe bantfwana baboBunjwa naNdzilinga badlala kanyekanye kwate kwafika sikhatsi lapho babitwa khona kutsi batewudla.