Ba re ne e re: Ho na ho na le ngoanana ea bitsoang Ts'epang, a lulang le batsoali ba hae motseng o thotseng. Ntate oa hae e ne e le Monna ea sebetsang ka thata haholo 'moho le 'Me oa hae eo e neng e le tichere. Ba ne ba phela ha monate ka khotso.

Ka satsi le leng batsoali ba hae ba khetha ho mo romella ho Rangoane oa hae Teboho. Rangoane Teboho e ne e le monna oa morui. Eaba 'Me oa Ts'epang o rokela Ts'epang mose o motle o nang le lifaha le lipalesa o bile o khanya ka lebala.

K atsatsi le latelang Ts'epang a apara mose oa hae o mocha eaba o leba ha Rangoane oa hae. Ha a fihla ka nokeng moo a neng a ts'ela teng a kopana le Katse ea lehata e neg e iphetotse ngoanana, e apere mose oa khale o tabohileng. Ea hlahella ea re ho Ts'epang "jonna mose oa hao o motle ha ka kang!"

"O ea kae?" ho rialo Katse ea lehata. "Ke chakela Rangoane Teboho" ho rialo Ts'epang. Katse eaba e re ho Ts'epang "le nna ke Rangoane oa ka motho ea oa tseba? Re se re tla tsamaisana tsela ho fihla re kena ha hae." Eaba Tse'epang o re ho Katse " ho lokile ha ho na bothata."

Eitse ha ba le pejana ka tsamao, Katse ea re ho Ts'epang "na o ka nkalima mose le sefaha sa hao nke ke apare nakoana ha re ntse re tsamaea, ke tla o khutlisetsa tsona pele." Ts'epang a re ho Katse "ho lokile ha feela o ts'episa ho li khotlisa'."

Ts'epang o ile a bona hang hang hore ngoanana enoa ke Katse ha a mo kalima mose mme sena se ile sa ts'osa Ts'epang haholo.

Baile ba tsamaea ha mmoho, eare ha bantse ba tsamaea Ts'epang o re "ke kopa o khutlise mose oaka le sefaha." Eaba Katse e re "e re ke li tene hofihlela sefateng sane" ho rialo Katse e supa sefate se seng hole haholo.

Ts'epang a re ho Katse "ke kopa o khutlise sefaha sa ka le mose oa ka" eaba Katse e re "e re ke li tene ho fihlela meotloana e ka pele." Ts'epang o ile a lumela hape ampa a ntse a ts'ohile haholo.

Ha ba se ba fetile meoloana ba shebane le nokana e ngoe hape eaba Ts'pang o botsa Katse hape a re "joale o tla mpha mose oa ka le sefaha neng?' Katse e araba ea re "iketle Ts'epang hle ke tla o fa tsona, tsela e sa le telele ho fihla ha Rangoane Teboho.

Eare ha ba fihla motseng o Rangoane oa Ts'epang a lulang, Katse a suthumelletsa Ts'epang morao ea ba e mathela ho bo 'Me ba neng ba eme ka ntle ea re ho bona "bonang ngoanana eanoa ea apereng mose oa khale, o ntse a nts'etse morao tsela kaofela a batla ke mo fe mose oa ka o mocha, ha ke mo tsebe le ho mo tseba." Ts'epang a soaba haholo a ba a hlabuoa ke lihlong. A khutlela morao hang hang ke pelo bohloko.

Katse ea lehata eaba e ea ho Rangoane Teboho ea re ho eena "ke nna mochana oa hao Ts'epang, batsoali ba ka ba itse ke tle mona ke tlo ho eetela re lule mmoho." Rangoane a thaba haholo ha a utloa sena hobane o ne a qetetse ho bona Ts'epang esale lesea ebile o ne a sa bone hore ke Katse e buang le eena.

Ts'epang ea ba o ema hare ho naha a lla a ntse a bina a re "Ache ka tla ka lekeha, ache ka tla lekeha 'Me ooe, Katse o nkutsoelitse, Katse o nthetsitse!"

Ke tsatsi leleng batho ba neng ba feta naheng ba utloa lentsoe la Ts'epang le ntse le bina ka pelo e bohloko. Ha ba fihla motseng ba joetsa Rangoane Teboho hore ba utloile ngoana ea ntseng a bina haufi le masimo a hae mme o ne a hlorile haholo.

Rangoane Teboho a kena ka hare ho masimo a latella moo lentsoe le tsoang teng, a fumana Ts'epang a ntse a bina. A mo botsa hore na ke eena mangl hore o tsoa kae. Tse'pang a qoqela Rangoane oa hae tsohle tse etsahetseng ho tloha ha a tloha habo le ha Katse ea Lehata e mo qhekanyetsa tseleng.

Rangoane oa Ts'epang eaba o loha leqheka la ho bona hore Katse na ehlile ke mochana oa hae kapa che. A cheka mokoti haufi le ntlo eaba o bitsa banana ba motseng hore ba tlo tlola mokoti ona. O ne a tseba hore Katse ha e no tlola lebese feela e sa batle ho le noa hobane e rata lebese haholo ebile mohatla oa Katse o ne o tla hlahella ha e tlola mokoti.

Katse ea kena ka tlung ho fasa mohatla oa eona thekeng hore o se ke oa bonahala. Ea apara le mese le lifaha hore e ts'oane le banana ba bang.

Qetellong ene ele nako ea Katse ho tlola mokoti.a tlola eaba mohatla o oa tsoa, a bona le lebese le le ngata eaba ke ho oa ha Katse ka hare ho lebese.

Eeitse ha e qete ho oela ka hare ho lebese, Rangoane oa Ts'epang a ts'ela mobu kaofela ho tlatsa mokoti le hore Katse e se ke ea hlola e tsoa ka mokoting. Eaba ke ts'omo ka mathetho.