Abike ulele phasi ecansini. Make wa-Abike umcocela lenye yetindzaba latitsandzako.

Lendzaba iphatselene nalabasikati besigodzi, labatiwa ngemisebenti yabo lemihle yetandla.

Tonkhe tintfo temibala legcamile nemaphethini lowabona lapha entiwe bomake nagogo wa-Abike.

Sipho lesihle kakhulu sa-Abike ngulelicasi lekulala lelinemibala legcamile lekalentelwe ngugogo wakhe ngalesikhatsi agubha iminyaka yekutalwa le-10.

Nakavuka Abike, make wakhe utsatsa licasi khona atewuligoca bese ulibeka endzaweni yalo. "Hhayi nyalo make! Asesibuke imibala lemihle kanye nabobunjwa kanye kanye!" Kuncenga Abike.

Abike ubita imibala ngekulandzelana kwayo emigceni, kusukela etulu kuyewufika phasi.
"Kupinki, kupinki, kuluhlata satjani, kuluhlata satjani, kuluhlata sasibhakabhaka, kuluhlata sasibhakabhaka, kupinki, kupinki, kuluhlata satjani, kuluhlata satjani."

Uyema emva kwekubita katsatfu, nangabe abona kutsi iphethini iyantjintja. Nawe ungabuka kutsi iphethini intjintja kuphi?

Abike wendlala licasi kusukela ejikweni kuya kulelinye, kute akwati kukhombisa bonkhe bobunjwa. Liningi lalabobunjwa babocaladze, netikwele letimbalwa emkhatsini.

"Ngati indlela lesheshisako yekubala kutsi bangaki bobunjwa nasebabonkhe. Akubalwa bunjwa ngamunye kodvwa inombolo lesemgceni ngamunye! Ngikukhombise yini yemake?" Kubuta Abike.

Ngabe uyati kutsi Abike ubabala njani bobunjwa?

Ngabe utfola bangaki nasebabonkhe?

Abike unalinye licasi lelincane lelimtfubi kanye naleliluhlata satjani lalisebentisela kuhlala ngephandle emhlabatsini logcwele ematje.

Lelicasi njengobe ulibona, linabocaladze, alinato tikwele. Ngabe Abike uvale bocaladze labangaki ngemtimba wakhe? Bangaki labangakavalwa?

Ungayisebentisa yini indlela ya-Abike lesheshisako yekubala kutsi licasi linabocaladze labangaki nasebabonkhe?

Ngalelinye lilanga ekuseni Abike wavakashela gogo wakhe. Waya esiyalwini lapho kunalabasikati labatsatfu bakha emanti. Bebatfwele imigcomo lemikhulu etinhloko.

Abike utsandza indlela lebahamba ngayo nabanyatsela kahle. Uyatibuta kutsi ngabe mangaki emalitha emanti latfolakala emgcomeni ngamunye. Ngabe ucabangani?

Abike uyababuka ngalesikhatsi bendlula, ubuka emaphethini lasesihlabatsini, etintsabeni kanye nasemafini. "Maye kuhle!" Uyaticabangela.

Ngemva kwekuhamba libangana, Abike wefika ekhaya lagogo wakhe. "Kwate kwaba simangaliso lesihle Abike! Ufike kahle khona utewubona umgcomo lengiwupendile. Ngabe ucabangani?"

"Ngiyayitsandza imibala gogo! Kodvwa bobunjwa bayesabisa kancane, banjengematinyo lakhaliphile lamakhulu!"

Abike udvweba nayi iphethini engcondvweni yakhe. Ngabe lephethini lesemgcomeni ikukhumbuta ematinyo lamakhulu lakhaliphile yini? Ungayikopa njani?

Endleleni leya ekhaya, Abike wativa adziniwe wabese uhlala phasi kute aphumule ngaphasi kwesihlahla lesinemtfunti.

Naloku nje bekangenaso siciniseko sekutsi bekakuphi, bekasengakesabi. Madvutane nje utawufika ekhaya.

Abike ubuke emaphethini ekukhanya newemtfunti yonkhe indzawo lemtungeletile ngaphasi kwesihlahla. Masinyane wefikelwa butfongo lobukhulu.

Kodvwa watsi nakavuka, Abike weva sekesaba. Wafisa ngatsi ngabe usekhaya, namake wakhe, sewutiphumulele ecasini lakhe lelihle. Kunekutsi kube njalo watitfola alahlekile lapho angati khona naye.

Ngaso leso sikhatsi kwafika inyoni leluhlata kwesibhakabhaka yahlala esihlahleni. "Sawubona Abike!" yacula. "Ngabe ulahlekile? Ngilandzele! Ngitakusita uyitfole indlela yakho!"

"Inyoni lekhulumako naleyati ligama lami! Ngiyetsemba itangisita ngifike ekhaya!" Uyamangala.

Abike wayilandzela inyoni. Konkhe kwahamba kahle kwate kwaba ngulapho bafika emphambanweni yemgwaco lenendlela lesesandleni sesancele nalesesandleni sekudla. Nyalo Abike ukhatsatekile. Nguyiphi indlela lekumele ayitsatse?

Wabuka etulu. "Nje kutawulunga?" uyatibuta. Inyoni beyibambe incenye yelicasi lakhe ngemlomo!

Yandizela ngasesandleni sekudla kukhombisa Abike indlela. Yase iwisa incenye yelicasi yabuye yandiza yahamba nalenye incenye.

Abike walandzela indlela lejikako lecondze entasi kweligcuma. Wase uva umsindvo weluhleko nekucula kwalabasikati besigodzi.

Lapho bekukhona namake wakhe, bebadansa babuye bamoyitele. Bonkhe bajabulile kutsi Abike sewufikile ekhaya.

Ngubani lotawetsemba indzaba ya-Abike, yekutsi ubone inyoni lencane leluhlata sasibhakabhaka lekhulumako nencenye yelicasi lakhe lekulala lelihle, lemente kutsi atfole indlela yakhe leya ekhaya?

Make wa-Abike wendlala licasi lakhe kute ahlale wase umniketa indishi lenemabhontjisi lafutfunyetiwe kutsi adle.

Abike wacala ngekubala tonkhe tikwele kute aciniseke kutsi tonkhe tiphelele. Ngalesikhatsi abala bekanesiciniseko kutsi ubone sicephu selicasi lebesikhishiwe saphindze sabuyiselwa.

Kusho kutsi bekangaphuphi! Inyoni lencane, leluhlata sasibhakabhaka nalekhulumako bekungiyo mbamba emva kwako konkhe!