Document

Wán Wo Vintùŋàshàʼshàʼ vi Boŋrin

South African Folktale

Emily Berg

Yì-iì dzə̀ é ghan símóʼ si, a kfəə́ yímóʼó dzə́ e ntèʼ yìmòʼ. Bàá wùn màmé lo, á wàa lò e yuv, a dù e kwaʼ, a ndzə dzəə́ káʼ kaʼán. Á lóo dù, á nèn lèm wán e Sifo wùn Bulerwa. Sifo dzə̀ wán woo lumèn, a wù dzə̀ viyá e ghvə̀m, wùn jèmèr rə yee ngàywir yee Bulerwa wo wù-uù dzəə̀n viyá nshòv sibaà e ghvə̀m.

Yì-iì lóo dzə e shùy, wón vee ŋgày sé wìr vìne wàa kòŋ a dù a dzə̀ visəə́rí. Á lo, á jàŋ ŋkar sév, sí wìy, wùn áwune wàa səərí. A vee vilùme koŋ fó a te bor, a vee vikìyí koŋ fó a lì mebvə̀m, a səərí sho e laʼ. Ŋkar sév sin si wiyì, áwune nèn làysìn fó a yiì antàʼtìn veé laʼ, e kfə̀n làysìn sa fó a leéy wán. Wàn nèn a toŋ, a toŋ, a wìr yòʼ kfə̀n yú.

Wìy lòo dzə e kishiíy kímóʼ kí, áwune nèn dzəʼ̀ər wán é sar kici, a wù dzə́ e bvə̀ràŋkí wo wù baŋ, kfə̀n njaʼkìrì. Á dzə̀ʼə̀r bèy, e nèn dù, a səərí. Wàn ku nèn a toŋ mo wù kù yií tóŋé. Vintùŋàshàʼshàʼ vi lòo feŋ e kitu ke kirə̀ʼ fo á kì səə́ri, e nèn yèn wán, a wù tóŋé, mendzən mè rə́r áwune féyì. Ví nèn a mùm ji ví yii, é wón víyi kiíy a ji wàn tóŋé, a wón víyi ku səə́ri səə̀rín. Vintùŋàshàʼshàʼ vìy vi nèn shu ji bòŋ ri, aáwune li wán woo shooy, e dù a sho, a lìy.

Vintùŋàshàʼshàʼ vi nèn sə̀y vikweè ji ví li á wán fó sar kici. Ví sə́y bey, e ghàtí bvə̀ràŋkí fó kor see sikweè, e shùr wán, e nèn a feŋ, a dù sho. Bó wón víyi yoʼ kìíy ji kinyo ki waà kòóy, bìʼ fo á kù-uù yú a dzə̀ fo visəə́rí ví. Kí wáa koóy bèƴ, a bàá wov wùn màmé túŋ kév lim e kwaʼ, e sar shùy, a yì bán feyì.

Lúme lò, e ghàʼ, màmé nèn du ji wun meemè á e sar kici. Mo wù dzə́ meemè, e nèn yù mo wan və tóŋé. Wù leéy virə́ʼ e làa yòʼ yen kifá. Wù loò leéy yúv, e nèn yèn a vintùŋàshàʼshàʼ vi béʼ wán və é bvə̀ràŋkí wo wù baŋ, njaʼkìr və̀y, nèn féŋ, du sho. Wù rəə́mé, e tùmnén, a jùm vintùŋàshàʼshàʼ vìy. Màmé lo ji wun naàrì a kinyo ke wù yenen e bàá, la wù yòʼ biìmé.

Vintùŋàshàʼshàʼ vìy ví dù bèy, e lìtì wán e mvə̀m aŋkiʼ. Aáwune koŋ kév e fo wán woo shoon e kfəə́ ye səné ye yí wáa leéy fo fo kijuŋ. Ví yiír wán, e nèn neèr, wù wáa buuné. Áwune nèn fèŋ, e dù ji á dzəsi, e tàʼ a viyíkìr. Wàn buúné ntàm e da, laá yoʼ kfə̀n yù tóŋ. Wù lò, e yìmèn, e nèn kèʼ a toŋ, a jìŋ sí yár wun.

Kishàm ke faafàŋèn kímóʼkí nèn yù mo wàn tóŋé. Kí kóʼtí fó mentsə̀m, e yèn wán, aá ndzə́m e bvə̀ràŋgí. Kishàm kìy ki nèn a kwàʼ ji vintùŋàshàʼshàʼ vìy vi shòŋ á wán shoŋén. Á bèy, kí nèn shù ji bòŋ a ji wun liti wán və̀y fo vintùŋàshàʼshàʼ vi. Kí nèn sàsìn e yù a vintùŋàshàʼshàʼ vìy vi sí súŋnen wiyì, a dzəə̀ yée lìtì yòʼ dzə̀. Kí nèn mèy wán və̀y, e dù e làáy e bǎm kimà ké kilan. Vintùŋàshàʼshàʼ vi wìy, e tàʼ wán ntéŋ, e nèn a fèŋ, a ghan, a tàʼ. Kishàm ki nèn a liy, a dù aà wǎn laʼ.

Wáa dzə e ŋkuùr, kfəə́ yé wan woo shooyi nèn kù a dzə mendzən mendzən. Lúm kishàme nèn sàsìn, e lìy, e nə̀ə́ fo shùu lav. Kí nəə́ bey, e nèn naàrì aáwune mo wun kì mèyìn wán wov. Á lón kishàm kìy ji kii wun, wù ku fò á rì áwune wán. Kishàm ki nèn yòŋ aáwune ji á fó á wun merə́rəʼ metaár, é wun kfə́tír, e bóo fo a wán. Bàá nèn koò merə́rəʼ metaár e fò kishàm ki kfə́tír. Kí nèn lò, e wòʼtín, wàn meé. Kfə́ə wané nèn a liy, a ceŋ, a yu vijuŋ, à kishàm ki shó.

You are free to download, copy, translate or adapt this story and use the illustrations as long as you attribute in the following way:

Wán Wo Vintùŋàshàʼshàʼ vi Boŋrin

Author - South African Folktale
Translation - Beatrice Tafon Takeh, Mbinkar Emmanuel Keelen
Illustration - Emily Berg
Language - Lámnsoʼ
Level - Read aloud