Ceng acel Ameo oko pito nyige me esuju. Eko dongo iton doko tii twatwal. Esuju noni oko cego yoo mere me oot ipoto.

Ameo oudo mito nyiko esuju tenge. En eko oot but jo kiyo mege. "Apeso okwe konya onyik esuju nani. Etiye cego yoo na," Ameo oko yamo. Mon are nogi oko cane di kiko cwalo do likame esuju oko nyiko.

Gin giko oot but Asello. "Okwe konywa onyik esuju ka Ameo ni tenge ki yoo!" di ki kware. Asello oko bino konyo gi. Mon adek nogi oko cane di kiko cwalo esuju nono tenge ki yoo, do likame pwodi eko nyiko. "Likame angeo gi me atima," Ameo oko dwoko.

Kamanono kudiling atitidi oko bino ipoto ka Ameo. Oudo kec oneke. Kudiling nono oko geno kakao esuju nono. "weki," esuju oko yamo. Do kudiling nono oko mede kede kakao esuju bobon.

"Weki! itiye kikidango," di esuju yamo. "Likame amaro tim noni." Esuju oko lor tenge ikor moru.

Esuju oko cungo ipoto ipiny me moru. Jo kwat are oko ude. "Nyo kame wan oyaro timo kede esuju ni?" di gin penyere. "Wek ocame nu," di gin kiko dwoko, "Eneeno bala gia mit."

Jo kwat nogi oko kwanyo kidi atii di ki ko tamo belo esuju ca idiere.

"Li!" Esuju oko kok. Jo kwat oko somo tenge. Esuju oko geno yabere.

Ajwok oko wok ki ii esuju. Oudo etiye kede cinge acel, wange acel kede tyene acel. Oudo nene rac. "Wekunu lola," Ajwok oko yamo kede dwan kadwong. "Ango atiye Abaka me isujun." Esuju oko wumere bobon.

Jo kwat oko bedo kede lworo kadwong. Gin giko ringo ipaco pi yamo ne jo nywal gi. "Okwe! wan otiye kede winyo twatwal!" di jo nywal gi oko yamo. "Likame ingeunu kop ikom ajwok me esuju?" En etiye esuju itegelikina," di jo nywal me jo kwat ka oko yamo. "Pore iwekenu ebedi."

"Oro alubo, esuju omito yabere bobon di ajwok me esuju ko cuno nyige ka dedede kicalere wa. Omitu bedo kede isujun ka tot tot moro me acama," di jo nywal me jo kwat yamo negi.

Di do eko timere ka manono i oro alubo, esuju a Ameo oko bele. Oudo epong kede nyige katot tot moro.

Ajwok me esuju oko wok ki ii esuju. Kede tyene acel en eko wok ooko me esuju. Kede wange acel eko neno chalere dedede. Kede cinge acel eko cuno inyige nogo dedede ikor moru.

Nyige nogi oko dongo di ki ko doko isujun acil kadongo ipoti dedede ikor moru. Ikare me kot nono jo dedede kicalere oudo tie kede isujun katot me acama. Gin kiko oot but Ameo. "Opwoyo, Ameo!" di ki lwongere.