Ceng kany acel kaber papa me Isupu oko ngapere di pwodi ceng likoyabere. En eko ngapo ekoti mere pi koyo kede ocoro mere alulum kame umo iton yite. En eko kiyarao cinge pi yamo be en ekato. Wang Isupu oko rieny kakame papa mere oudo tiye yamo kede, "Tin en ceng kame ayaro mako kede aporogo di ako kelo giamia ne in ipaco."

Aporogo kede giamia? okwe, Eyaro bedo nyo? Papa oko oot piny i abum me Atigo. Egali mere di kok kwir-kwir ton i ekona me owidi. Winy oko luko malo. "kwaak?kwaak?kwaak?" di ki kok. "Nyo en kame iyaro tero ipaco ne Isupu?" Papa oko goono kengere mere. "Dari ineni nyo koyaro timere!"

Ngacik me aporogo oko neno ceng di wok. Gin kiko oot roto bwoyini gi. Kiko roto yen kame kitweo ikom bwoyini. Ki ko ciko yit gi winyo yamo. Ki ko waano yede gi okok kipii. Kwaru me Isupu, Okupa Salim oudo tiye ngacik dek nam me bwoyini kadongo. Di pwodi en papa mere Oriada Supario da, Oudo ngeo nam kadwong.

Yee oko geno oot kede yamo kadwong. Cing papa oko rieere pi mako yat. Tyene oko gongere inget yee. Ngute oko rieere, Chogo me egura mere oko buuno. Papa wero do di etiye timo tic: "Poti iko mor itek. Ud dek nam, waai iko mor momot, Kur iweki."

Ceng dedede ton otieno Isupu tiye neno malo. Eler, ecil abongo yamo. Aporogo kede giamia! Nyo me papa oyaro kelo inam? Esawa moro ekelo abokony me ginam. Esawa moro ekelo icupan me maradadi alulum kame yamo opwoto.

Ceng ace papa me Isupu kelo itatam. Bala ikare kame ki udo kede akodolong me nam i asinge, tol-acel olwokere i akako. "kwaak? Kwaak? Kwaak?" Winyi oko kok. "Nyo kame iyaro timo pi konyo akodolonggi?" Papa oko dwoko, "Okonyo akodolonggi go, Ayamo ni atira. Oko cwano gi dok i pii me nam kadwong, tuno ime ajikini mere."

Naka-naka papa kelo wer. En ewero di etiye waano yen kame etweo ikom bwoyini. En ewero wer di etiye waano bwoy. En ewero wer di etiye kedo awun ni. En ewero wer di enyono egali dok ipaco. "Poti di iko mor itek. Udi aporogo. Wai di iko mor momot. Kur iweki."

Ouma Sakayo mito yib aporogo akwar di cil pi camo otieno. "Do oyaro bedo kede winyo kame omako aradi kidikirir moro. Etwero bedo ceng kany me yib aporogo. Likame tiye dek nam katot bobo kodong inam," Ouma oko yango wiye di eyamo. Isupu oko mako cing Ouma. Gin kiko ngoolo yoo ikame jo bol kiye. "Kwaak? Kwaak? Kwaak?" di winyo kok kiwi wude ka kidelelei. "Nyo kame tiye pi otieno?"

Imwaka okato cha jo chik dek oko yii kede jo me owidi. Gum me gero kede kope me ilelem. "Kwaak? Kwaak? Kwaak?" winy oko kok. "Nam tiye aromo ne jo dedede," Papa me Isupu oko yamo. En eko nyuto ne gi baluwa me chik inam ariki tiye me ka kwaru meme. "Yamo pi jo dedede. Pii pi jo dedede."

Ouma Sakayo ngio kede ngico piny mege, cinge odole kede mit kadwong. Dek me nam kadwong oko kok. Jo katiye i nam oko ringo ooko me pii di gi koporo igwen me umo komgi.Jo me owidi di ringo idog nam, di ki tiye tingo gi tuko gi ibad gi. Ika bol kiko gonyo igoen gi angic tenge. "Kwaak? Kwaak? Kwaak?" Winy di kok. "Papa me Isupu oyaro kelo nyo kinam kadwong?"

Papa me Isupu kede neru mere kede amiegu mege tingo bwoi diki wao kede teko. Atin me aporogo akok ca en komakere. Ekudukudun di eriere kipii akulao. Papa me Isupu oko gonyo bwoi, di ewero ne atin aporogo: "Poti di iko mor itek. Ud aporogo, Wai di iko mor momot, Kur iweki." Kakame aporogo oko bwot kede eko ringo kitek dok kipii. Di eweko yib aporogo akwar adwong acel kene-kene ibwoi. Ouma Sakayo oyaro bedo kede ayomaic.

Cuo oko waano yee di kiko dolo awunoi. Gika tek irorota oko mako lwet papa. "Kwaak? Kwaak? Kwaak?" winy oko kok. "Nyo kame in ikelo ne Isupu?" Di ceng tiye oot donyo, Papa oko dwoko ne winy. "Lak aporogo anya winyo ne woda." Ipaco Isupu kiyarao giamia mere malo ne acerin.