Andra drio, opi angu `bua ri vile O'bani ici ndra a`diko a`diko karakarau ma ti sanduku mbawu sini ma alia uru `bua `dale. `Ba nyakua `diyi ni a`diko di ndra oluzaru yo ani candi bi yi tu. Nga di Ebio ondua ru tu ri ni zi yi ma azakozu.

Ebio pi ndra di baka azini ezuru tuzu `dini `dini kpere `bua `dale. "Kate ecora si, mi eco a`diko yi fe ma dri ra ya?" zi opi `bu niri ni. Te O'bani gu avasi ra nga di `yo erini, "Aa, o`duko `diyi ma aje tu, mi econi nga yi ma aje ofe deku, Ebio."

"A`diko a`diko nde yi ma aje si a?" Ebio zi. "Mi nga mani anyapa ombaru azini `bani esu ewasi `dini le `diyi eji na", O'bani omvi. "O`du si eri ma sin i ci zu aciru kile aju le ni, edirilia azi `ba odu pi odu ni azini ori `ba oki pi pi mile be ni" O'bani gu `I kai. Ega kini `I vile a`diko `diyi vu `ba azi ecopi ca pi ni di yo.

Ebio nga di esi e`yere nyakua `dole. Eri di nga mu o`du bi ngoni ngoni ya ri `ba? Ga `bile azini ali ru. Opi ti ni pati bi pi yi si afa ondiru `diyi pie ma e`da di ani ku beni, vutinia ko dri mu akua nyaka ondresi ri nyazu. O`biti si, esu de o`du azini e`de ebio vile emba alia `bo. Omba eri nyapi kai ri si, ri di `bile kalati ovi te econi efu zu ku.

"Ha yi mi eji ako mi aza ma agyi mani lele tu ri!" Ebio `yo erini. I la lu mi pati `di yi ma dria ra ma di nga mi ese amve `dole. Ebio ndra `I vile iserebi tika tika ri o`du pi ma rua pati erini lazu drinia ri be kuru ra ebi di ani o`du ni se kpere `bua `dale eri e`dazu opi `buni ri ni. Te O'bani gulu `i, dika zi Ebio ma tia anyapa azi iri `diyi ngua ya?

Ebio nga di dri eda vile nyakua. Eri di nga mu edirili nde yi obi ngoniru ya? `Du zukulua yi be alia tre ra ko dri mu yi be pati edirili yini aazu sinia ri ma etia. Da yi nde ma azi edirilia `dayi ma jorovu ma dria. Eli di a`bua bi i`ma dri akuzu. Da di yi nderi ma joloko I ma dria.

E`do di edirili yi omve. "Ee, edirili `di! Emi emu nga! Emi emu emini ne ozo ni `di ria. Mbele-ifi ma vile zukulua alia eri nga fe emini awizu a`wi ru." Edirili yini lezu ovuzu ibiru ku risi, nga woro sa fi Ebio vile zukulu alia.

Ebio ndra ebio mbamba zukulu ma ti mbgo ri ma alia ci edirili ma fu ani ku beni. Tu yi be kpere `bua `dale yi e`dzu opi `bu vile ri ni. O'bani zi eri "Asizu ri te ngua?" saa `daa, o`bi di gu avasi oku ri le ti.

Ebio da di vini dri vile nyakua dika. "Ma di nga mu ori ru `baa da oki pi pi mile be ri bi ngoniru ya?" Zi ima okuni ni. Fe erini egata azi onyiru ni. Yi iri tro isu arakala azini izu ose ni azini cucuu kongoloko ru ni yi. Ka mu ca yi ara ni oa zu ri ma tia `bo, e`do agata ga yi ma eselea."arakala `di zo tu!" "Yo, zo ni tu ku." "Ee, zo tu."

Ori eko coti dri efu ra zi agata yi ni ga ri e`do a`du ma dria ya ri. "Ma `do agata ga ma oku ni be, "Ebio omvi. "kini pati `di zo mini ndeni. Te ma ati ni 'da ku." Ebio nga o`ba. "E`yo adasi ria azo ce mani pati `dani tu!" ori nga `yo. "Ma ezu! Ma ori ose ni!" "Mi o`bi nga mi vi se pati `di ala ma kalaa ma zo o`bi zu!"

Ebio nga di `ye `dale ra. "Ma mu mi ombe pati `di be tualu mi ejuzu kpi ma di ani mi zo o`bi kilili be ni," `Ebio `yo ori ni. Ka di mu ori ni ombe de woro `bo, Ebio e`do di eri se oru `bua `dale eri e`dazu O'bani ni. "A `ye di e`yo mi ni andra le ma ma `ye ri `bo, O'bani" Ebio `yo. "Le mi ma fe di curu`do ma dri a`diko yi ra."

Opi `bu vile ri nga di oku Ebio dri sanduku mbau si `da fe. E`du di eri eji vaa nyakua `dole. Zi ti ni ra coti a`diko e`do yi ada vaa `dole, ca pi `ba dria si ra ri si. `Ba dria ka mu e`do a`diko `diyi olu `bo, esu ne kini a`diko aluri ni azini ri ma ti idri azini ri ni aziri ma ti idri ani yi ma kalafe eca karakara ru amba amba ta mbazaru sanduku ma alia. `Ba a`diko yi ale`ba ma eselea ovuni `ba yi ma ta mba sandukua `dini ku. Ebio awa `ba yi ni a`diko yi.