Olwolire, hu hyalo ehy'esozi mw'Afrika, yaliyo omuŋeesi haŋunye. Abohu hyalo ohwo bamulanganga baatii, "Muhubba byoma."

Muhubba byoma gaali amanyihene eri hiisi muutu hu hyalo. Hiisi mugamba abaatu batiinanga ewuwe ohumwewonera natamba. Becaananga enyiriri enyene endeŋi ohwebonera obukodyo wa muhubba byoma.

Hasahya wa Mugaba, omuŋugi w'ehyalo, gaŋulira ebiŋamba hu mirimo ja Muhubba byoma. Gatuma abalobera babe baje baleete Muhubba byoma mu mbuga yiye.

Muhubba Byoma gaali n'esangalo ni gaŋulira ati Hasahya wa Mugaba genda ohumubona. Ng'aloma ati, "Hinasangaase ohuholera habaha."

Ni goola nga Hasahya wa Mugaba amuloma ati, "Muhubba byoma, pulira ebiŋamba hu bulaŋi w'emirimo jijo." Hino hyasangaasa Muhubba byoma era gebasa habaha n'ohumwenya n'amwenya.

Nga habaha amuloma ati, "Nenda obote, mu byoma bibyo, omuutu aŋanga ohugenda, galira amasiga ate n'aŋwamo amafugi hy'omuutu." Muhubba Byoma gasoberwa. Ate n'eŋuma muutu hu hyalo ohwo atenguŋa omwami.

Muhubba byoma obwire obwo sigalimba hu moni n'alowoosa ehi anahole. Obuti wamuŋamba era geralihirira bugali.

Muhubba byoma galowoosa hu muhulu Mabala. Hamunga oyo nj'owaali n'aja humuyeeda. Coka Mabala gaali agotire hu hyalo ohwo mbo olwohuba gaali asunguŋahise Hasahya wa Mugaba habaha w'ehyalo ehyo.

Ni wahya Muhubba byoma sigatiina mu hyobo hihye. Gatiina ŋamugulu mu sozi ohuŋeega ehi anahole. Gali ko atiina, nga ŋabaŋo omusaaja muhulu oyu gabona ni gehaaye ŋaasi w'omusala.

Omusaaja muhulu oyo gaali nje Mabala! Nga Muhubba byoma amuloma ati, "Sangaaye ohuhubona muhulu! Ndi n'ehigosi nenda wunjeede." Nga Muhubba byoma amuloohesa ehizibu hihye. Ng'omusaaja muhulu alowoosa ohuhena ahamanga ng'aloma ati.

"Yagama hu hyalo olome habaha oti ohusobola ohubbota omuutu omulamu ohuŋwa mu byoma, oja hwenda ebbaketi lukumi ejijuuye amasiga ko ogacuuse gabe musaayi ko n'etamu lukumi ejijuye efiiri ohuŋwa hu mitwe j'abehyalo ohusobola ohubbota omuliro ogunagumye omusaaja ono!" "Webale omuhulu Mabala!" Muhubba byoma ŋawene aŋo gaduluma gatiina hu hyalo mu mbuga ya Hasahya wa Mugaba.

Ni goola ng'aloma habaha ati, Konyo sobole ohubbota omusaaja ow'omuhyoma, nja hwenda ebbaketi lukumi ejijuuye amasiga ohusobola ohujifula musayi ko n'etamu lukumi ejijuye efiiri ohuŋwa hu b'ehyalo ohusobola ohubbota omuliro ogw'ohugumya omusaaja owomu hyoma. Hasahya wa mugaba gafugiirira. Galagira abasaaja babe ohulomera ab'ehyalo.

Amaliro gaŋulirihana mu hiisi hitundu hy'ehyalo. Abaŋeere n'abahulu balira omuusi n'owiire ohugesyaho ohwijusa ebbaketi lukumi n'amasiga. Buli w'ehyalo bamubega efiiri ni bajita mu tamu ejibali ni banjire mu mbuga. Amasiga n'efiiri ja b'ehyalo sijali ni jihena ohwijusa ebbaketi n'etaamu, nga n'olu bagesyaho batye. Hasahya wa mugaba byamusobera ng'ahanda alanga Muhubba byoma mu mbuga.

Ng'amuŋamba mu ngalo ng'amuloma ati, "Muhubba byoma, oli musaaja mugesi. Wundagire oti otambisa amagesi gago bulaŋi. Nenda ohuhweyaasa ohuba mulala hu basaaja abagesi hu hyalo hyange. Era kusunga oganye obe ndiiwe atangirira abalobera bange."

Nga Muhubba byoma aloma ati, "Ehyo nahihole singa ofugiirira omusaaja muhulu Mabala ohugobola." Nga Muhubba byoma bamufula ahulira abaloobera ba habaha, era omuhulu Mabala ng'agobola hu hyalo, nga niye ni Muhubba byoma bafuuha baŋi b'amagesi eri Hasahya wa Mugaba.