Mondli ni Mbali ni ba ba n-daa la'am m-bɛ fɔŋni. Ba daa gusiri ni ba ti basi ba paasi. Ka paasi wa ka ba daa di boora, ba daa bɔrimi ni ba kyaŋŋi nti kaai ba yaapɔ'a. U daa bɛ la tiŋkpanseaa kultitaari ŋɔn daa miri maa.

Mondli ni Mbali sufu daa pɛligiya, dama saha yaa paaya ni ba laa n-kyaŋŋi nti kaai ba yaapɔ'a. Din ni neaai beoo ba kyanni maa daari yuŋŋu, ba daa lɔ ba daadiikudima m-maali siri ni ba sa dɔli sɔwa'ali sea kan kyanni tiŋkpaŋŋa maa ni. Ba daa kɔŋŋi la goom yuŋŋu maa zaa ka kur mari la ba paasi maa yɛttɔ'a.

Beoo ŋɔn daa neaai asubmaasiri, ka ba daa zaŋŋi ba loori n-gbaai soori. Ba daa nya zɔya, bunkɔbri nti paasi puri sɔya ni. Ba daa kari looridima ka yuunni yuuma. Di ti ya niŋi beela ka di wum biisi maa ka ba gbisi.

Ba ba daa neaai Mondli ni Mbali ka di nyɛ la tiŋkpaŋŋa maa ka ba paai maa. Ba daa nya Nobuntu, ba yaapɔ'a ŋɔn dɔ sɔŋŋu zugu tiiya gbinni n-vuusira.

Nobuntu daa gyaari ba, n-kpeesi u yiri na dinsaha ka wa waa n-gyili ni sufupeeli yuuma. U ya'ansi maa sufu daa pɛligiya pam, dinsaha ka u zaŋŋi piini seesi ban zi fɔŋni la n-ti u. Ka Mondli ni Mbali yinni kam daa boori ni ba yaapɔ'a daŋŋi u dini yoaari. "Daŋŋi n yoaai m-piini maa," Mondli yɛliya. "Aayi, n piini pɔi," Mbali yɛliya.

Ŋɔn daa yoaai ba piini maa nyaaŋŋa, Nobuntu daa susi aduwa n-ti u ya'ansi maa. Dinsaha ka Mondli ni Mbali yi samanni ni ba ti deem. Nobuntu ni u bidibga daa di dɔ'am maa azama halli ka reedeoo lahabaari tisibu saha ti paai.

Yuŋŋu ŋɔn daa ti zibi Mondli ni Mbali naa n-yi labi yiri ni na nti di bundirigu. Ban daa ti ya di bundirigu n-naai saha seaa la ka goom gbaai ba. Beoo ŋɔn daa neaai ba ba daa duusi u loori n-labi fɔŋni ka kyɛ ba n-ti Nobuntu.

Mondli ni Mbali daa suŋŋi ba yaapɔ'a zaŋŋi n-kyaŋŋi u yiiri ni tuma ziiya. Ba daa sigri kuliga ka kyanni daari ni. Ba daa laa n-vaari u noosi gyɛla na ka boori zɛvaari na u gaadi puuni.

Dahinseeli asuba Mondli daa zaŋŋi u yaapɔ'a nigi n-kyaŋŋi moo ni ni ba ti ŋɔbi moori, a daa kpɛ u zizikpeaa puuni. Pukpaara maa sufu daa bu pɛligi. U daa boori nigi maa faabu dama a daa ŋɔbi u bunyaara. Di daari maa nyaaŋŋa, Mondli daa bu laa n-sakki ka nigi maa sa'am sɔ bunseela.

Dahinseeli yaasa, ka bisi maa ni Nobuntu daa kyaŋŋi daa. U daa mari teebli n-koosiri zɛvaari, sikyiri ni kyiibudima. Mbali daa wulisiri neema maa daa ka Mondli mun vaari ban da neemseesi maa n-niŋni buni ni n-tiri ba.

Di daa yuui ka vuusigu saha maa naai. Bisi maa daa ya labi la fɔŋni n-ti kyaŋŋi sikuru. Nobuntu daa zaŋŋi la zupiliga n-ti Mondli ka zaŋŋi waari gbarigu n-ti Mbali. U daa la'am bundiriseesi ban ya di soori ni ba yi labiri yiri ni.

Ba ba ŋɔn daa kyana ba kpigibu, ba daa bu boori ni ba kuli. Bisi maa daa bɛlim Nobuntu, ni ban ŋɔna kulim fɔŋni. Ka u daa la ka yɛli, "N kurigiya n-gaari fɔŋni ziiya. Amaa n kur nin guusiriya kpa ka ya vuusim saha yi ti paai ka ya laa n-kyana nti kaai ma."