Ulatan uba le nan bi Miwa aachook ni, le usui nan gar nyoon mↄmↄk. Nyoon mↄmↄk aan u ma ubo na kan, le u kpo.

Ulatan aabim aakun nan wu u ki cha u yuk chaa paacham ni taab. U nan ga yuk chu nsubon mubaa, ni ŋiken, le ki wii, "Kwi! Kwi! Kwi!"

Ulatan asui nan gar nyoon mↄmↄk. U yaa nan ti kan ilatan iken joo yaa bim kan, le usui moo gar.

Ulatan sui gar daan wee nan nyɔŋ ni uba kina ni kina. U nan ga nyɔŋ uba nsubon ŋee pu le ki ti nyɔŋ uba ŋimina mu pu. Iwiin nan jer le ulatan nan moo wii sakpen.

Le u nan ki gir ma. U nan chuu ke u ga di ubo gbaan buen nsan chee ke binib bi jer na kan u ki biin u pu.

Ulatan nan sun ni nsubon gbaan pu le ki nan di ubo bil nsan ni. Nyoon gbaan na, ukpan nan nyan ni mban ki cha kun. U nan kan ulatan bo gbaan dↄ nsan aagbaan.

Ukpan nan yoor ulatan bo gbaan kun u do. Ukpan aa ti fu u do na, le waa bijabim bitaa gbaan piin ki bi gbiir ulatan bo gbaan.

Waa bijabim bitaa nan gaa nlan ke: "Mee ni paacham! Mee ni taab! Mee ni tii mi! Mee ni tii u!" Mbim nan mee ulatan tii tↄb.

Mbim bitaa gbaan aa nan bi gbiir ulatan bo na, Ulatan pii nan bↄl busub paab ki bi lik. Ijawaan nan joo u ke waa bo wee mu ga kpo ke biken na.

Le ukpan aa pu nan dan ki nan kan ke waa bim bi joo ulatan bo gbiir. Le ki teen, "Lik suun na man! Li joo ni u do. Ni gaa di u lii kitiŋ!"

U nan gaa ulatan bo ŋa u ŋal ni le ki biin u pu.

Ukpan aapu aa di ulatan bo siin kitiŋ na le ulatan pii san ni mmuan ponn ni. U nan yoor waa bo ki joo u ubiŋ pu le ki san bↄl busub pu.