Naachiin ni ukaabɔn nan ye jɔtiib la, hali baa nan kpaan tiwan mɔmɔk ni. Ukaabɔn nan ŋma laan ni amaa naachiin ma nan ŋma chuun baanja la.

Daalbadaal le naachiin, ki kpa lineenl ke u bee tiwan niba ujɔ aabimbin wɔb na, nan baa ukaabɔn, "Tiwan pipiin nin bi aaneen taab na ye ba?"

Ukaabɔn nan gar u ke, "Ni ye nkpan aanann ti m ŋmɔ ntaalangbam ni na la. M ŋmɔ ni ni yunn pam kina pu le cha ni tam m neen ni." Waa ŋun tinann aabɔr na, le timuatann piin ki nya naachiin aamɔb ni ba pu u nan ye ukumɔndaan le u gee tinann sakpen. Naachiin nan ban ke u ŋmɔ tinann gbaan. Amaa u ga ŋa kinye aan ki pii tinann gbaan ntaalangbam ni, u ya ka kpa ifeen kan? "Ŋaani m jɔ," u nan baa ukaabɔn, "pinl mi tikokor tiba aan m ŋa ifeen tii mbaa. M ban m mu ŋma li laan ni ke sin na la."

Ukaabɔn aa nan kpa kikumɔŋ, kina pu na u nan tii u tikokor tibaa. Naachiin nan pam ni ŋa ifeen. U nan di dab chuu u won, le ki nyab ke u fii buen ntaalangbam ni. Amaa u nan nyuun jer tikokor waatiir gbaan ti di u fii. Kina pu na, ni nan ye ke u lik nsan yayan la.

"Ŋaani m jɔ," u nan baa Ukaabɔn, "aa ya fii cha ntaalangbam ni kan, m ga ŋma chuu aajuul aa?" "Tɔ," ukaabɔn nan len. "M nyi na muk si pu ke aa fii buen libunl ni na. Cha ti ŋa ni fenn kichakpiik ni." Nwiin gbaan daal aa fuu na, Naachiin nan chuu Ukaabɔn aajuul le Ukaabɔn fii buen ntaalangbam ni.

Ukaabɔn nan fii le ki fii ki ti sa buyoonn ni ŋun u na. Amaa Naachiin nan len ke, "Ki buen siib kpee, m jɔ." U nan waa nkpan aanan piin gbaan biyil pu, le timuatan piin ki bunn u mɔb ni.

Ba nan ti fuu njan aakpan aanan gbaan chee na, Naachiin nan bee ke tiwan niba deŋ. Ukaabɔn aakokok kiba le nyan bi u ŋal ni! Le ni ki deŋ, le ki ken. Ukaabɔn nan bee ke waa ki nyuun le nween mu nan bi u juul ni na mu cha. U nan ga ke: Ukaabɔn aakokor, chuu gui niba man. Ukaabɔn aakokor, chuu gui niba man. Ki gar u na, Naachiin nan labr gaa ke: Ukaabɔn aakokor li joo, taa gui niba man. Ukaabɔn aakokor li joo, taa gui niba man.

Kokoo na, tikokor gbaan aa nan ki ŋma joo Naachiin. U nan ti bi nin chee tidir tiba aa bi na ntaalangbam ni. U nan yuk tɔŋ nkpan aanan gbaan pu, u nan dak ke u ya bi ŋmɔ kan, tinann gbaan ga li joo u. Amaa waa nan ban u chuu aan ki ŋmɔ 'tinann' na, ni nan ye ntaalangbam soon le u meer!

Nyoonn mue na, u nan ker choo kitiŋ mala. "Ter mi, ter mi!" u nan teen. Amaa unii aa nan ŋun u. Ukaabɔn nan wɔŋ ntaalangbam ni aa.

Naachiin nan lir kitiŋ le ki dɔ ŋmin suun ni kpee siib. U nan fii ki wii ni iween, u taal nan koo le ŋidubil bɔnbɔn ŋiba bi u won mɔmɔk pu.

Ki nya liyaadaal nan saa din, Naachiin deeni la, le ki kpa ŋidubil pam le u won pu. Waa kee fii nwiin daal. Le u ni Ukaabɔn aa ki ye jɔtiib.