Mmaal muba le nan bi ki kpa busub bu lu ŋisubil ŋi mɔ sakpen na ki ti cha binib choo baachenl ni bi nan moo lisubil gbaan lik. Mmaal gbaan mu nan ki kpa bisal nyanyaan uba. Binib pam le nan lik faar waa nyaaŋ palpal gbaan, ŋinimbil ŋi mɔi na ni waa bimbin.

Waa nan chekr ki ti ŋa usapuan na, binachipɔm ni bijaninkpiib nan kpaa choo u do bi nan ban u lichamɔnl. U te ni u na nan chuu ke uja u ga ŋma kal lichenl gbaan ni nwiin mɔn kaa ŋman lisubil liba na kan, bi ga di bi bisal tii u lichamɔnl.

Tibɔr gbaan nan moon ntingbaan gbaan aapepel mɔmɔk. Njan aaja u nan dan na le nan ye ntingbaan gbaan aakpaab aaninkpel. U nan ŋan uja, ki nan ye uwankpadaan le ki la puan. Bi nan gaa u koon ni lichenl ni le ki tii u lisubil gbaan. U nan la kal siib, amaa na yoor n-yoonn le u ŋman lisubil le bi cha u fii kunn.

Biwakordam aaninkpel le nan paan. U nan ŋan uja, ki nan ye uwankpadaan le ki la puan. Amaa baa di lisubil siin u na, le u kpaan di ŋman mala le bi cha u fii kunn.

Uja u nan paan dan na, nan kpa kitiŋ pam. U nan mak le kaa ŋan. Upiibo gbaan nan mee ke u mu ŋmɔ aan ki fii. Ba nan di siin u na, u nan yii kaa ŋman. N-yoonn nan jer, le upiibo gbaan piin ki gaŋni u ke u ŋmɔ. Tikur tinaa aayoonn na, nkon nan nyaŋ u le u ŋman. Bi nan cha u mu fii kunn.

Ki paan na, ubɔr le nan dan. U nan mak, ki por le kaa ŋan. Unii aa nan gee u ntingbaan gbaan ni. Upiibo gbaan nan ban ke u mu ŋmɔ aan ki fii. Ba nan tii u lisubil nan, u nan yii kaa ŋman. U nan bi ti saa kijook. Ki joo cha tikur tiloob na, u nan mee nsan ke u ti sonl.

Bi nan cha u buen. Waa nan gir ni na, lisubil gbaan aabaan nan bi u pu, le u mɔgbanl nan man! U nan ti ŋman lisubil gbaan baanjira ni la! Upiibo aa geen na, bi nan cha u mu fii kunn.

Iwiin siib aa jer na, ubɔrbo nyaan, ki la puan aan ki ye uwankpadaan na nan dan. Upiibo gbaan nan lik u ngeen ponn ni. U nan di u buen ngbaan le ki gaŋ u ke u taa ŋmɔ lisubil gbaan. U nan di ŋisubil siib le siin u. Amaa nwiin ti saa kaasisik ni na, ubɔrbo gbaan nan puun ŋman aa le bi cha u fii kunn. Upiibo gbaan nan piin ki bi wii liŋuul ni nsugar ponn ni.

Na wonl na, le ukpaal uba dan. U nan ye ugiin le ki kpa ligbanyakl, amaa u nan la puan le binib pam nan nyi u ke u ye ubɔlen kpaan la. U nan dan ni limakl ke u ga kan linyaŋ. Upiibo gbaan nan tii u ŋisubil ŋi wiir le ki tuk u ke u ŋmɔ ki li cha.

Ba nan di siin u na, u nan yii kaa ŋman. Upiibo gbaan nan si kii u ni wu u. Nwiin ti sa kaasisik ni ki jer, le tikur tilee. Tikur tinaa aa gbaa na, le ukpaal gbaan len ke bi ti u nnyun. Upiibo gbaan nan mee ke u ga ŋmɔ lisubil gbaan, amaa u nan bee ni bi mee le tikur tilole gbaa. Ukpaal wee nan kan linyaŋ ntɔm mu upiibo aa te ni u na nan tii na.

U te ni u na nan di bi bisal tii "ugbanyakldaan" gbaan. Upiibo gbaan nan gaŋ ke bi nyan u waa wuyiil ni, amaa u te ni u na aa nan ŋman bi ŋa niba. Ukpaal gbaan aa nan joo u cha kun na, u nan gaa nlan muan muba ki kpaar u ŋal. Binib pam le nan nyan ni nsan pu bi nan lik bibɔndim gbaan.

Ubɔrbo gbaan aatutuliib nan ŋmal binib bi nyan ni na ni. Bi nan yin ukpaal gbaan ngbaan, ke bi ga tii u ilik ni inaa u ya ga buen cha upiibo gbaan kan. Mala mala, le u gaa ilik ni inaa gbaan le ki siir.

Bitutuliib gbaan nan di tiwanyaan peen upiibo gbaan le ki di u buen kinakook ni ubɔrbo gbaan chee. Naa yunn le bi yin upiibo aa te ni u na le ki ŋa njim aan bi mɔn tɔb.