Sulwe wakalilede mujungusi acismu. Mucelo wakaide kulilokela kuzwa mucisamu ikuti, "bbu."

Kacigambidwe wakamvwa ijwi liti, "Tija sulwe ofwa, tija!" Kufwambaana-fwambaana sulwe wakabbutumuka akutija.

Eelyo katija bakaswaangana ankuku. "Ino utijanzi yawe?" yakabuzya Nkuku. "Chita, ndaile kumvwa cintu caloka alimwi ajwi lyaamba kuti, 'Tija.' Ambebo ndati taakkalwi aawa."

Ayalo Nkuku yakayoowa niyakamvwa makani sulwe ngaakalikwaamba. Mpoonya ayalo Nkuku yakati, "Wacaala wacaala, matako mpe lubilo."

Bakaswaangana amubwa. Awalo mubwa wakubuzya wakati, "Ha, ino nywebo mutijanzi?" Inkuku yakamvwiila yakati, "Chita, ambebo ndaille kumvwa biyo caamba sulwe pele awalo tacizi naa ncinzi. Sulwe wamvwa cintu caloka kacitobelwa ajwi lyaamba kuti 'Sulwe tija!'"

Mubwa wakamvwa kuntontola mumagondo mpoonya awalo wakaludalabala kutija antoomwe ankuku alimwi a sulwe.

Bakaswaangana a hachi. Hachi lyakabuzya alyalo, "Mutijanzi yawe nomufwekemba?" "Chita, ndamvwa biyo caamba Nkuku pele ayalo taizi. Inkuku yamvwa biyo caamba sulwe ikuti wamvwa cintu caloka alimwi ajwi lyaamba kuti, 'Tija wafwa!'"

Alyalo Hachi lyakati, "Ma-a-a, inga koya kufwida katalibonyi, taalindanwi aawa."

Bakaswaangana ambongolo. "Ino kayi mutijanzi?" "Chita, ambebo ndamvwa biyo mubwa pele awalo tazi kabotu cinicin naa ncinzi cicitikide. Mubwa wamvwa kunkuku pele ayalo Nkuku yamvwa boo caamba Sulwe ati wamvwa cintu caloka mpoonya ajwi lyaamba kuti, 'Sulwe tija!'"

Mpoonya aawo ayalo mbongolo yakagwalamuka yatalika ayalo kutija. Ummm, kwakaile kuunda kasuko mujulu.

Bakaswaangana ang'ombe yabakonka. Ng'ombe yakabuzya, "Mutijanzi kayi?" Mbongolo yakati, "Chita, ndamvwa boo caamba Hachi pele alyalo talizi bwinibwini pe, yamvwa biyo caamba mubwa. Mubwa wamvwa kuli Sulwe ati kuli cintu caloka kuzwa mucisamu alimwi ajwi lyaamba kuti, 'Tija Sulwe!'"

Ng'ombe yakoyoowa alimwi yakati, "Twamana!" Yakanyamuna mucila akugatamuka kutija ayalo.

Bakaswaanganya kaaze. Kaaze wakabuzya, "Ino ncinzi ncomutija kayi nomuluzya kasuko?" "Chita, ndamvwa biyo caamba mbongolo pele ayalo ilimumudima, kwiina ancoizi. Ayalo yaile kumvwa caamba Hachi pele alyalo talizi masimpe akubwene. Hachi lyamvwa boo caamba Mubwa pele awalo Mubwa tazi. Mubwa awalo wamvwa biyo caamba Nkuku pele ayalo Nkuku taizi. Inkuku yamvwa biyo caamba Sulwe ati kuli cintu caloka ajwi liti, 'Tija Sulwe!'"

Awalo kaaze wakalubweza lubilo antoomwe azinyama eezyi.

Kumane waawo bakaswaanganya musankwa uuchomvwa ncinga. Musankwa wakabuzya cakugambwa wakati, "Mutijanzi yawe nkomukomezya makoto ameso?" Zinyama zyakamvwiila zyakati, "Tatucizi ncotutija. Twaile kumvwa caamba Sulwe pele awalo tacizi kabotu naa ncinzi camubbutumusya ambuta yakwe. Sulwe wamvwa cintu caloka ajwi liti, 'Tija sulwe!'"

Musankwa wakalebauka kuseka eelyo akubaambila wati, "Mucelo waloka kuzwa mucisamu akaambo kamuwo. Mebo ndime ndaambila sulwe kuti, 'Tija sulwe, tija!'"