Mmutla o be o robetše ka tlase ga mohlare wa moapola. Apola e ile ya wela fase go tšwa lekaleng la mohlare.

Lentšu la re, "Tšhaba Mmutla, tšhaba!'' Mmutla o ile wa tsoga ka pela wa kitima ka lebelo le legolo kudu.

Mmutla wa kopana le kgogo. ''Naa o tšhaba eng?'' goa botšiša kgogo. Mmutla wa fetola ka go re, ''Ga ke tsebe. Ke no kwa selo se wela fase gomme lentšu la re, 'Tšhaba Mmutla, tšhaba!'''

Kgogo ya tšhoga. Ya thoma go kitima morago ga go kwa seo Mmutla o se bolelago.

Mmutla le kgogo tša kopana le mpša. Mpša ya botšiša, ''Naa le tšhaba eng?'' Kgogo ya re, ''Ga ke tsebe. Nna ke kwele seo se boletšwego ke mmutla, le yena ga a tsebe. Mmutla o re o kwele selo se wela fase gomme lentšu la re, 'Tšhaba Mmutla, tšhaba!'"

Mpša e be e makaditšwe ke seo e se kwago. Le yona ya thoma go kitima le Mmutla le Kgogo.

Ba kopana le pere. Pere ya botšiša mpša, "Naa le tšhaba eng?'' Mpša ya re, ''Ga ke tsebe. Ke kwele seo se boletšwego ke kgogo, le yona ga e tsebe. E kwele seo se boletšwego ke mmutla, le wona ga o tsebe. Mmutla o kwele selo se wela fase le lentšu le re, 'Tšhaba Mmutla, tšhaba!'"

Pere le yona ya thoma go kitima le tšona.

Di ile tša kopana le pokolo. Pokolo ya botšiša, "Naa le tšhaba eng?" Pere ya fetola, "Ga ke tsebe. Ke no kwa seo se boletšwego ke mpša, le yona ga e tsebe. E kwele seo se boletšwego ke kgogo, le yona ga e tsebe. E kwele seo se boletšwego ke mmutla, le wona ga o tsebe. O kwele selo se wela fase gomme lentšu le re, 'Tšhaba Mmutla, tšhaba!'"

Pokolo le yona ya thoma go kitima.

Tša kopana le kgomo. Kgomo ya botšiša, "Naa le tšhaba eng?" Pokolo ya araba, "Ga ke tsebe. Ke no kwa seo se boletšwego ke pere, le yona ga e tsebe. E kwele seo se boletšwego ke mpša, le yona ga e tsebe. E kwele seo se boletšwego ke kgogo, le yona ga e tsebe. E kwele seo se boletšwego ke mmutla, le wona ga o tsebe. Mmutla o kwele selo se wela fase le lentšu le re, 'Tšhaba Mmutla, tšhaba!'"

Kgomo ya tshwenywa ke seo e se kwago le yona ya thoma go kitima.

Di ile tša kopana le katse. Katse ya botšiša, "Naa le tšhaba eng?" Kgomo ya araba, "Ga ke tsebe. Le nna ke kwele seo se boletšwego ke pokolo, le yona ga e tsebe. E kwele seo se boletšwego ke pere, le yona ga e tsebe. E kwele seo se boletšwego ke mpša, le yona ga e tsebe. E kwele seo se boletšwego ke kgogo, le yona ga e tsebe. E kwele seo se boletšwego ke mmutla, le wona ga o tsebe. O kwele selo se wela fase le lentšu le re, 'Tšhaba Mmutla, tšhaba!'"

Katse ya thoma go kitima le diphoofolo tše dingwe.

Di ile tša kopana le mošemane a nametše paesekela. Mošemane a botšiša, "Naa le tšhaba eng?" Diphoofolo tša fetola ka go re, "Ga re tsebe. Re kwele seo se boletšwego ke mmutla, le wona ga o tsebe. O kwele selo se wela fase le lentšu le re, 'Tšhaba Mmutla, tšhaba!'"

Mošemane o ile a sega a re, "Apole e wele go tšwa mohlareng ka lebaka la moya. Ke nna wa gore, 'Tšhaba Mmutla, tšhaba!'"