Kanegelo ye e bolela ka Mothuši le lefelo la gagwe la go hlokomela diphoofolo tša ditšhuana.

Kgwedi yeo e fetilego e be e le nako ya leemaema kua lefelong la tlhokomelo ya diphoofolo. Nomsa, phoofolo yeo e nago le ngwaga o tee, e be e le yona ya mathomo ya go fihla lefelong leo. E be e otile ebile e nyamile.

Efela, go se go ye kae ke ge Nomsa e šetše e tieletše. E ile ya thoma go raloka le diphoofolo tše dingwe.

Ka letšatši le lengwe, yona kgweding yeo, go ile gwa tla helikoptara mo lefelong la diphoofolo.

Ka gare ga helikoptara go be go na le tlou ye nnyane, e khupeditšwe ka lepai le legolo.

Ndiwa, tlou, e be e na le matšatši a mahlano e belegwe. Mothuši o ile a e fepa ka lebotlelo la maswi.

Bošegong bjo bongwe, batho ka moka ba ile ba tsošwa ke go fihla ga Ambia.

Ambia e be e le thutlwa. E be e na le kgwedi tše hlano e belegwe. E be e lapile morago ga leeto la yona le le telele.

Ka lebaka la molala wa yona wo mo telele, Mothuši o be a swaretše lebotlelo godimo gore a kgone go fepa Ambia.

Ditšhuana tša mafelelo tša go fihla kgweding yeo e be e le dikwana, Kopi, Kepi le Keji. Dikwana tše di be di swerwe ke tlala.

Mothuši le bathuši ba gagwe ba be ba rata diphoofolo ka moka le tšeo di bego di seleka.

Batho ba moo lefelong la tlhokomelo ya diphoofolo ba be ba šoma kudu. Ba be ba na le tshepo ya gore ka letšatši le lengwe ditšhuana tše di tla kgona go itlhokomela. Morago ga moo diphoofolo tše di tla kgona go boela lešokeng.