Kolong ang'orot ayei apa ka ng'ide lusapa ng'iarei.

Akwaar apei abu tonyarau ng'isapa lu tama, "Ng'ide kang, anang ayong ng'irua luatonia. Ering'a nyetona asaki anyun esi anadakarin kus kapesi toduko ng'awiyei kus elap epei arumoret tobong'ut."

Apet topudosi. Abu loeking'aren toyep ng'akito alokwaas erot ani erumor toduk anewi naapolon.

Abu loang'iarei topudo nikalapatan kisiek eboyor loajokon ka ng'adakarin nace. Tolot lotung'a lugelayek nakaneni abu tarau epei ang'adakarin kang'una.

Adaunet elap, apot ng'ikaitotoi luarei ng'ulu tobong'ut nikapakec. Abu apakec tama, "Itemokin iduko esi ng'awiyei kusia?" Totacut tamasi, "Ee, kiduk."

Abu apakec kirukosi ka edia loapolon. Abu torukou edia keduk ng'ikais. Aniirimit apakec ng'ikais, "Abu king'itakin tama eyei itwan nea?" Totac tama, "Emam."

Kirimo konapei, ing'ita ebala, "Eyakae nea?" Tama nabo, "Emam."

Abu akoro toduik apakec lokijon kotere emam itwaan anadakar kang'ina niipokini apakec.

Ekisidi kang'una, abu edia lo eking'aren torik kec. Nadakarin nakolong abu ng'es tonaikinotor kang'itung'a. Anang'et neni, abu tolimok ng'itung'a ang'adakarin kang'ina tama, "Apakakang lo katalokatokang." Ekisidi kaneni apon kipeyeunae keci lokijon, taarakinae emesek ka ng'amuja nace.

Apot toloto nawi nace na ang'aarei. Tosubakinae loger awi anace anaeking'aren.

Arumoret akimuj apot kimwoko ekisidi tobong'o loreria kec.

Abu apakec tama, "Akiroit nadira nakolong etamit ayong ng'esi na. Meere adukor ang'akais anakaalak kori anaajokak. Aria ekitetemes eboyor aloajokon ka ng'itung'a daang."