Cango, cango, yo loka Paracam obedo jal m'ilwoŋo ni Otoyo. Go omaro cemo swa. Ma tektek mere go omaro camo riŋo.

Ndir acel, rwoth ma loka no olwoŋo jo piny pere je kidho i kalima ma nywomirok pa wode.

Otoyo doko owinjo ka ji luwo kwoŋ kalima ma nywomirok man ma nitie loka ma ger m'ilwoŋo ni Paracuc. Otoyo oparo swa ni, "Kalima ario i ndelo acel!"

Otoyo won oluwere ni, "Aripo bedo i kalima ario je." "Kutho a le telo kidho Paracuc aka nyaka adwoki Paracam."

Otoyo omondo cew odikini to wotho kidho Paracuc. Munyo otundo oneno ni jotedo oyido nyaka jotedo. To Otoyo yero ni, "A le gik cen Paracam aka anodwoki rumacen."

Otoyo owotho dok Paracam munyo geno ni lanwaŋo riŋo ocek. Kare no kec neko go. To munyo otundo onwaŋo jono bende fodi jotedo cemo.

To Otoyo paro ni, "Munyo nende aay Paracuc oyido jocako tedo. Ripo bedo ni cemo no otieko cek pama." Ameno Otoyo doko owotho to gik Paracuc. Kec oyido nyo neko go maa.

Munyo Otoyo otundo Paracuc kendo, ji oyido jocowo cemo. Wendo yido jomiyo mweha gi jamweha mic. Otoyo kobedo gi mic ma omiy. Oyido go omito cemo kende.

Otoyo owinjo malith swa nwaŋo ni okeŋ cemo. Owire gik yu Paracam. Owotho moth paka oyido kec neko aka doko ool.

Munyo otundo Paracam oyido ji jowero aka jo mielo.  Oyido jo tieko camo cemo je!

Munyo Otoyo owinjo ni cemo orumo, opodho to tho atha. Okeŋ riŋo ma kalima ario je. Munyo ocerino omiy go nyuka nyaka mathin i kikombe.

Kir konon Otoyo fodi kec neko aneka.