Document

Wúm yé visə̀ vé juù

Nambi Sseppuuya Community Resource Centre

Wiehan de Jager

Yì-iì dzə̀ é ghan símóʼ sí, yàá wùmòʼ wáa dzə, a wù kòŋ wan wan və é ŋàŋ. Wù nèn fò wun fómo, a dzə̀ wúm. Wù lòo fo, e nèn yòŋ sho jii, à wíy kuy, e koóy vifá ve visə̀ vé juù, vé a dzə̀ fó wùm fen. Wan və̀y sə́ wúm rəy, e nèn a dù.

Wù lòo dù, e tòmbìy tàrnín wùn à wír ámóʼó, aá koy laàlaŋ. Á nen lòn wúm rəy, wù fó. Áwune nen màʼ ji á tsə́m a laàlaŋ sho, yí nèn bvə̀ʼə́m.

Wan və̀y nèn tòŋ jii, "Ey-ey-ey! E yòŋ jii, vèn fèn wày ne mo é kinyò! Wúm rə́ne yòʼ kì dzə̀ yém. Kì dzə̀ yé yàá wom. A bó yàá yoʼ lò fòo mò bey kisáŋ. Wù kì fò ji yí wíy sə a mo é m koóy vifá ve visə̀ vé juù."

Wír ve á kì koy laàlaŋ víyi nèn fò kicí ke á kì koy laàlaŋ sho, e wan və̀y. Wù nèn lò a dù.

Mo wù du, e nèn yèn vé kimbome, á nèn lòn kicí kiy, wù fó. Á lò ji á bóm lav sho, kí nèn bèʼkír.

Wan və̀y tóŋ jii, "Heey, heey, heey! E yòŋ jiì, vèn fèn wày ne mo é kinyò. Kicí kin ki yòʼ kì dzə̀ kém. Dzə̀ ké wìr ve á kì koy laàlaŋ. Áwune yoʼ lò fòo mo kisáŋ. Á kì fò, bìʼ fo áwune kì bvəʼən wúm yém. Fə̀m wúm yee shooy, yòʼ kì dzə̀ yém. Kì dzə̀ yé yàá wom. A bó yàá yoʼ lò fòo mò bey kisáŋ. Wù kì fò ji yí wíy sə a mo é m koóy vifá ve visə̀ vé juù."

Vé kimbom vìyi nèn fò mbeʼ wùy e wun. Wù nèn a dù sho.

Wù lóo dù, e yèn gày. Gày və̀n nèn lòn mbeʼ wùy fo wun, wù fó. Gày nèn fòo nàʼ, nàʼ nèn kfə̀r mbeʼ wùy rə̀y e dzə̀m.

Wan və̀y tóŋ jii, "É.. É..É..! E yòŋ jii, vèn fèn wày ne mo é kinyo. Mbeʼ wùy rə̀n yòʼ kì dzə̀ yéem. Dzə̀ ye vé kimbome, a vé kimbome yoʼ lò fòo mò kisáŋ. Áwune kì bèʼ kicí kém. A kicí kee shooy ki yòʼ kì dzə̀ kém.
Kì dzə̀ ké wìr ve á kì koy laàlaŋ. Áwune yoʼ lò fòo mò kisáŋ. Á kì fò, bìʼ fo áwune kì bvəʼən wúm yém. Fə̀m wúm yee shooy, yòʼ kì dzə̀ yém. Kì dzə̀ yé yàá wom.
A bó yàá yoʼ lò fòo mò bey kisáŋ. Wù kì fò ji yí wíy sə a mo é m koóy vifá ve visə̀ vé juù."

Gày nèn fò nàʼ sho. Wù sə́, e nèn a dù.

Kù mo wù du fo laʼ, e nèn tò é ŋkǎʼ vijin. Kfəə́ jìn woo wiíyi nèn lòn nàʼ və̀y fo wun. Wù nèn fò aáwune. Á seé, e nèn kfə̀r e dzə̀m.

Wan və̀y tóŋ jii, "Ey! Ey! Ey! Vèn fèn wày ne mo é kinyò. Nàʼ və̀n yòʼ kì dzə̀ wóom. Dzə̀ wo gày. A bó gày yoʼ lò fòo mò kisáŋ. Wù kì fò bìʼ mbeʼ wùy yem. A mbeʼ wùy rə̀n yòʼ kì dzə̀ yéem. Kì dzə̀ ye vé kimbome. A vé kimbome yoʼ lò fòo mò kisáŋ. Áwune kì bèʼ kicí kém. A kicí kee shooy ki yòʼ kì dzə̀ kém. Kì dzə̀ ké wìr ve á kì koy laàlaŋ. Áwune yoʼ lò fòo mò kisáŋ. Á kì fò, bìʼ fo áwune kì bvəʼən wúm yém. Fə̀m wúm yee shooy, yòʼ kì dzə̀ yém. Kì dzə̀ yé yàá wom. A bó yàá yoʼ lò fòo mò bey kisáŋ. Wù kì fò ji yí wíy sə a mo é m koóy vifá ve visə̀ vé juù."

Wír vé jìn woo wiíyi nèn yòŋ jii, bó kifá ki yoʼ dzəə bèr fə̀m à shishàr sho ke dzə̀ vèr laʼ wò sho. Àshè, bo vèr-íì fó wiíy e wò. Á nèn fò wiíy sho. Kí nèn ghèén mo á yii maʼ ŋgàn jii, "A kinyo ki fə̀m kár e le, bo kí kù wíy kar ntéŋ ntéŋ, e kfən, fo ki-iì kèʼèn."

You are free to download, copy, translate or adapt this story and use the illustrations as long as you attribute in the following way:

Wúm yé visə̀ vé juù

Author - Nambi Sseppuuya Community Resource Centre
Translation - Beatrice Tafon Takeh, Mbinkar Emmanuel Keelen
Illustration - Wiehan de Jager
Language - Lámnsoʼ
Level - Read aloud

© Text: Ugandan Community Libraries Association; Illustration: African Storybook Initiative 2014
Creative Commons: Attribution 4.0
Source www.africanstorybook.org
Original source http://ugcla.org