Document

Taàŋgám fó vimfèr e wíri

Ghanaian folktale

Wiehan de Jager

Yì-iì dzə̀ fó yàngùʼ, nyùy mbàʼ báʼtí vimfèr vidzə̀m, e fìn e ŋkùv, aá fér e kicí kí. Wù fìn bèy, e nèn kòʼ, e lèm e ntoò yùv.

Wír veé nsay fène nèn bùŋ vimfèr vé a fèr. Á nèn kù a dzə mendzən mendzən. Áwune yiì lò, e yòŋ ji Taàŋgám wàá ku sə̀ á áwune, bìʼ fo wù kér a vifií.

Taàŋgám nèn yòy làv, a wù dzə̀ ben e daadà, a wù yòʼ lerìrì. Wù yóy bey, e nèn lèv shó, e kòʼ. Wù meé e yuv, e nèn dzə̀r e nyùy mbàʼ jii, "Òó mbaà, a dzə̀ m kòóy vimfèr fo wò a?" Nyùy mbàʼ nèn shèʼ Taàŋgám sheʼén, e lò, e sùúy sho jii, "Vimfèr vìn vi lùm feyì. A dzə̀ shiwánlè moo wò bèn, la shí yòʼ yù fóo làʼ."

Taàŋgám yuúrí, e lò dzə̀r shó jii, "Vimfèr vee shoon vi dzə̀ mbàm sisìʼ?"

Nyùy mbàʼ bìnèr jii, "À kér fóo wìy e nyám si sitaár e fo e mò. Dzə̀ nyám se bó yòʼ dzə̀ wìr tàv e keèrí. A kfə̀n dzə̀ nyám se dzə̀ sí yùyrí wir." Sí dzə̀ jii, "baá wo wù kér sóŋ ye yí njím moo kòŋ, kimfaàmfàʼáy ke kí lo kí té wír, wùn à ŋgvəme wo dzə̀ wú mèy wír e fur."

Nyùy mbàʼ shéʼ ben, nsaŋ si wáa nyar. A wù kwaʼ ji kifá ki yòʼ dzə̀ á sho ke dzə̀ kí sə̀ʼ vimfèr və́.

Taàŋgám nèn lèv e wun làv fèy, e sòn ji weè weè, e sə̀ʼə́y e kitu ke nsay. E bìʼ vinyo vinén vinén, e nèn yèn kinyo kée yiì.

Wù nèn tùŋ bií, wú shoó. Wù daá e ŋgay se vici sí, e nèn fəə̀sì ŋaʼrì sí é kitu wo, ye bó yòʼ dzə̀ wìr kìíy ji bií dzə̀ á fo. Wù nèn lò e ŋkuùr a dù fo laʼ ji wun wáy á kifá e shuù. Yì wáa ran, a baá gbú ne e bii fey, a woʼ wún bii kibí kibí, a mùm ji wun fəə́, la dzəə̀ yòʼ a dzə.

Taàŋgám nèn yòŋ sho jii, "ŋkar yèm, màʼtì, é m sə́ wò. Kú neèm e vici fen, e m səŋ wò, e fə̀ə́r." Taàŋgám nèn ndzə̀m baá e vici fey e làv wo wù yoyin, a wù yòʼ lerìr və̀y. Wù nèn sə̀ŋ, e kòʼ shó a dzə̀ é ntoò yuv, e dìn e nyùy mbàʼ. Nyùy mbàʼ shéʼ, e lò, e dzə̀r shó jii, "nyám see sibaà sí bèé?"

Taàŋgám nèn sə̀ʼéy e kitu ke nsay ji wun taʼ a ye yì meen ji baà. Wù siì bìʼ vinyo vinén vinén, e nèn yèn kinyo kée yiì.
Wù nèn lì kighín, a mendzə́v me rún shó, e nèn kòʼ shó e kici fo vimfaàmfàʼáy vi dzəə̀n. Wù kóʼ bey, e cùtì mendzə́v memoʼ mè e vimfaàmfàʼáy vi kitu, fo laʼ sév sí dzəə̀n. Wù tín kifú ké kiŋgòm, e neèr e wun kitu, e nèn màysì kibér ke mendzə̀v, e cùtì wún və́ e dzə̀m.

Wù nèn jàŋ vimfaàmfàʼáy vìy jii, "Hey, vèn wiy, e yèn búʼú. Wuú sí lo. Vèn nəə́ cér e mǒ kighin, é m sə́t́í ven, é vèn fíʼ a dzə à yuúmén." Mo bó vimfaàmfàʼáy vi yòʼ yii koŋ ji mendzə́v me kum áwune, ví kú nèn keèmè, e nə̀ə́ e Taàŋgám kighin.

Taàŋgám ku nèn ndzə̀m làv, e nsər kighìn, é dzəə ye bó yòʼ dzə̀ vimfaàmfàʼáy vìn ví fəə̀, a ví fə̀m búʼ e le. Wù bèʼèy, e kòʼ shó e yuv, e dìn e nyùy mbàʼ. Yii bèy, Nyùy mbàʼ dzə́r jii, "Ké bàm kee kifá ki b̀èé?" (E ghan sin, bó nyuƴ mbàʼ yoʼ kfə̀n shèʼ é ŋàŋ.)

Taàŋgám nèn siì sə̀y é kitu ke nsay, e bìʼ vinyo vinén vinén, e làa yòʼ yen kinyo kée yiì. Wù bí wíiy və shó, wù fó wun nshù ye juŋ. Áwune adzə̀me nen tàʼ tám kici, a wú fáŋ, e dàr, e kfə̀n a dzə e juŋ. Á kfən tàʼ sa akfəə̀ aá taŋ feyì. Á dù e mèé e ghaa ndzəv fo yó si yii dzə́, e nèn kèʼ mbìʼ jii,

"Tám kici və́ne dàr!"

"Aày wú yoʼ dàr!"

"Eè, wú dàr!"

Shintàm shi lòo dàr, yò nèn wìy, e dzə̀r ji áwune sà bìʼ mbìʼ a dzə̀ kùm ka á? Taàŋgám bìnèr jii, "m kì biʼ mbìʼ a dzə̀ vèr wiiy wom. Wù yoŋ ji kicí kin ki dàr, e shàa wò, a m yoʼ biìmé."

Yò bìnèr jii, "ké ru kí, m dàr, e shaà kicí kin. M dàr e ŋàŋ, a m kfə̀n dzə̀ yó ye faŋèn. Vèn neer ri kicí kén kí e mǒ ghaŋ, e nèn fìʼ."

Taàŋgám neér kicí kiy, e nèn lì akfəə̀ və́, a kur yó sho, ji yì fiʼ neèm a tìítiy. Mo wù kurin, e màysì, e nèn lì, e kòʼ shó koʼón é yuv.

Nyùy mbàʼ leéy, e mèŋ kinyo kée kfə̀n e suúy. Wù nèn biìmé ji sì á vilaʼày ve wun-ee dzə́rí mo Taàŋgám wìyìn ne sho. Á bèy, wù nèn dù fo ŋkùv və wo á fèrìn e kicí kí və̀y dzəə̀n. Wù mvə́ʼ nsər, e nèn lì vimfèr ve ví dzə̀ən shó vidzə̀m e fò e Taàŋgám.

Taàŋgám bèʼèy vimfèr vìy, a səy sho e kitu ke nsay moo wír wo wù soon rə́r bey. Wù wìy sho, e nèn a fèr e yeèlav və, a fèr e wìr dzə̀m, e kfə̀n a fèr e nyám si sidzə̀m.

Vimfèr vi-iì dzə̀ ji á wáa fèr, yòʼ dzə̀ ji á báʼtí e wày é ŋkùv, é ví wáa neŋ fo.

You are free to download, copy, translate or adapt this story and use the illustrations as long as you attribute in the following way:

Taàŋgám fó vimfèr e wíri

Author - Ghanaian folktale
Translation - Beatrice Tafon Takeh, Mbinkar Emmanuel Keelen
Illustration - Wiehan de Jager
Language - Lámnsoʼ
Level - Read aloud