Document

Taàŋgám wùn K,iluŋŋgùrúʼ kí

Ghanaian folktale

Wiehan de Jager

Taàŋgám wùn Waàŋgáa-aà dzə̀ ŋkar si. Áwune-eè dzə́ e gwan, e ntèʼ yìmòʼ, a yì dzə̀ nyaáŋ.

Waàŋgáa-aà kér kimà ké sum, a wù lim nyóo fó, lim vifá ve kfərín ví, à ve nyoŋén ví.

Wù-uù lo, wù wàa fo vifá e Taàŋgám woo ŋkar rə, kijuujùŋ feyì. Taàŋgám nèn lò kfə́ a yu bír, e nèn a siimé vikuʼùy vé Waàŋgáa.

Á bèy, Taàŋgám nèn tàʼ dzə́ə yée ghan sho e vifií ví, bóo faàsì súm Waàŋgáa. Wù nèn faàsì rú.

Kitan ki nèn lò, e koò Waàŋgáa, a wù yòʼ fə̀m kér lav ye á shiíy sho. Taàŋgám nèn a yu wún lèn ji sí kér a wun súm Waàŋgáa, à nyóo sí wùn à vifá ve kfərín ví, à ve nyoŋén ví.

Taàŋgám nèn wìy dù e way ji wun fiinè a nyóo sə́ wùn à vifá ve kfərín ví, à ve nyoŋén ví.

Wù dù bèy, e kàv mbàm sikuʼùn, e nyòʼ e kimà ké ŋkaà.

Wù nèn bày mbàm símóʼ sí, e yùn ŋgwàsáŋ ji wun du a yiír a kfəə́ rə́ sho. Wù yún bey, e nèn neèr e kitu ke mbàm se sí dzəə̀n é ŋkaà.

Taàŋgám béʼéy ŋkaà rə, a dù sho fo laʼ, a yòv, a wúne boŋ wun.

Wù-uù kwaʼtì a dzə̀ vifá ve wù lo, e yun e mbàm sə́ sí.

Wù lòo dù wuú nèn kèʼ a ŋwàʼrì.

Mo yí ŋwaʼrì bèy, kiŋkò ké wuu kí nèn lò, e keèsì fo yuv.

Taàŋgám nèn tìír ŋkaà e ghaa dzəə, e dù ji wun bee á wuú é sar kici. Wù-uù dzə́ fo, kù maʼ sí fo ŋkaà rə tíyí, bìʼ fo yì-iì dzəə̀n e shií féyì fo wun.

Wuú nèn siì tàvkír tavkín, wún Taàŋgámé rə̀, kidzə́r kí nèn kèʼ a dzə̀r wun. Wù nèn nyèŋ, e nə̀ə́ e bii.

Taàŋgám nəə́ bey, e nèn sùúy jii, "m ló a dzə e bii fen, e meé mo wuú yií tin. Kifá ke dzə̀ kí kùm mbàm sém kí yòʼ dzə̀, bìʼ fo ŋgwàsáŋ sí néŋ e kitu wo."

Shintàm shi lòo dàtìr, Kilùŋŋgùrúʼ kí nèn a feŋ, a shaà, e lòo màʼ sí e nèn yèn ŋkaà e ghaa dzəə.

Wù yén ji mbàm si dzə̀ á e ŋkaà wùn à ŋgwàsáŋ.
Wù nèn sùm ŋkaà rə̀y e vav sə́ sí, a shìy ji wuú wàá tín.

Taàŋgám lòo fəə fo bii, e nèn yèn Kilùŋŋgùrúʼ, a wù dzə́ e wun kitu ke ŋkaà. Taàŋgám suúy jii,
"Eemò, eemò, ŋkar yèm, beerì wò wo à kì kiŋsìn ŋkaà yem."

Kilùŋŋgùrúʼ kí yóŋ jii, "Taàŋgám, yú ó. À yoŋ ji ka féyì? Ji dzə̀ ŋkaà yè à? Ŋkaà rə̀n dzə̀ yéem. M bòŋ boŋen fo ghaa dzəə fen."

Taàŋgám yuúrí kinyo kìn, kí gháʼ wun. Wù nèn sùúy jii, "m yoŋ e wò yóŋen, ŋkaà rə̀n dzə̀ yéem."

Taàŋgám nèn ŋàʼáy e nyári wùn, e dù e bùn Fon, e naàrì mo Kilùŋŋgùrúʼ kí kì taʼ e shoŋ wun.

Kilùŋŋgùrúʼ kí nen dzə̀r e Fòn wùn à vibay və́ ví jii, "a dzə̀ wìr ghàn é le, bóo tiír ŋkaà e ghaa dzəə, a mbàm si dzə̀ shó sirúnén wùn à ŋgwàsáŋ? E kù tìír tiirín bey, là wír wo wù wáa shìy?"

Taàŋgám bìnèr jii, "m kì shiy ŋkaà yem. Mbàm se sí dzəə̀n shó si dzə̀ sém, a ŋgwàsáŋ dzə̀ wóom."

Kilùŋŋgùrúʼ kí suuy kfə́ jii, "m kì dzə́, leey ŋkaà yem, à wíy ké wíyin, e nèn a tav ji dzə̀ á ŋkaà yè."

Fòn wùn à vibay vi yuúrí kinyo kìy kijuujùŋ fo áwune vee abàá, e nèn yòŋ ji áwuné fəə́ á fo ndzə.

Fòn wùn à vibay vi nen lì ghán e tàr kinyo kee shooy.

Á tár bey, e nèn yèn mo dzə̀ á tìnén kinyo kee shooy.

Á nen yòŋ ji Taàŋgám wùn Kilùŋŋgùrúʼ kí wiy á e bàm.

Áwune wìy, Fòn wùn à vibay vi nèn yòŋ jii, "vèr biìmé kinyo a dzə̀ ke Kilùŋŋgùrúʼ kí suuyì. Wù yòʼ dzə̀ shóŋ. Taàŋgám, à kì taʼ, e faàsì kifá ke wìr fáasin, a yòʼ dzə̀ ké."

Taàŋgám yoʼ kìíy mo kí ghanen, bo vinyo vi wáa kìʼ e dzəə yee ben. Wù nen lò e bùr a dzə̀ tóŋ.

Sáʼka ku nèn ghànén ji nsaʼ koò á ne Taàŋgám.
Wù ŋaʼáy e lòo dù, e nèn yù mo Waàŋgáa shéʼé, kù shéʼ sheʼén.

Waàŋgaá nen lò e kfə̀n é bàm e wun sum, e nèn a lìm nyóo, a lìm vifá ve kfərín ví wùn à ve nyoŋén ví.

Taàŋgám nèn siì kfə̀n ji ŋgaà kitàn, a wù yòʼ kfə̀n kér ŋkar.

You are free to download, copy, translate or adapt this story and use the illustrations as long as you attribute in the following way:

Taàŋgám wùn K,iluŋŋgùrúʼ kí

Author - Ghanaian folktale
Translation - Beatrice Tafon Takeh, Mbinkar Emmanuel Keelen
Illustration - Wiehan de Jager
Language - Lámnsoʼ
Level - Read aloud