Document

Ghám Akai Ye Tayíné

Ursula Nafula

Catherine Groenewald

Akay-iì dzə̀ e térí, a yè wov lo, wù wàa neèr wun, wù wàa buuné e ghàm, a yí bóŋ féyì.

Fər yè wov woo wiíy-iì bà gham rə̀n a dzə̀ e viyáŋ vi.

A gham yee shoone kér nshòm si. Nshòm yìmòʼ-oò baaŋè kfə̀n tókirì, a yìmòʼ səə́ne moo mbàʼ, a yìmòʼ səə́ne ji lìŋ. Yìy à Akay-iì kér gham si é lav sinén, yii bèy a rə̀ne dzə̀ kfə́ jeéy.

Láʼ yé à Akay-iì dzə̀ é kirə̀ʼ a nsay yee fó yúm féyì, kfə̀n lumè, a yì dzə̀ tíy tíy.

Ŋgam visíy-iì dzə̀ fó feyì, bóo lì sa aŋgám ámóʼó wùn à yó si.

Mo wíri fə̀m-eè fan vifá vìn léʼ leʼén fo ví té wír, bó yòʼ-oò dzə̀ ví kùm Akay gheéy.

Yè wov lo, wù wàa suúy jii, "Gham rə́ rə̀ne lo, yí kìŋsìn á fo kinyo ke bi kí koóy Akay."

Akay-iì dzə̀ wán, a wù fiír é ŋàŋ.

Wù-uù kìíy fo ndzə́v ye tuŋéné yee fó mentsə̀m é dzəə̀n.

Wìy lòo dzə e kishiíy kímóʼ kí, vishí vi bír Akay. Wù-uù fəə̀ ji wun du e yen yàá və, e làa yòʼ meé fo. A wù kì fəə̀ bey, e nèn lày aàgwan.

Wun woo Akay nèn lò a fàn fànèn.

Wù nèn dzə̀ʼə̀m e sar kici, a shìy ji wìr wáa wìy e sə̀ á wun.

Ntàm lòo dàr, wù nèn buùné, njèm shí wun.

Njèm yee shooy-iì dzə̀ jii, Wù kì néŋ a e wun ghàm yee jeéy rəy, a wiíy wùmòʼ, wo wù shwínen yàá və rə́si a wun.

Wiíy woo shooy nen ŋwèʼ shéʼ, e fò wun vín kàmer e kighin ke kuʼùn kí kirúnén.

Kù mo Akay ràmsìn kiwó ji wun sə́ á vín rə̀y, e nèn yìmèn fo mbuùné.

Akay ku nèn a mvə̀ʼ sí ji weè. Wù lòo leéy yúv, e nèn yèn shiwán shé shinə̀n, a shí náŋsín wún, e dzə̀ʼə̀m e tam kici. Nshòm shinə̀n shin-eè səə́ne moo mbàʼ.

Mo Akay ŋaʼayin é yuv, shinə́n shiy shi nèn dzə̀vtì vav, a feŋ, a dù, a dìn dzə́ə e wun. Wù nèn kù a jùmrì shinə́n shiy.

Akay dù e mèé e kirə̀ʼ kímóʼ kí, a dzə́ə sí jávsín fó sibaà. Shinén shiy shi nèn màʼ gham yímóʼó fó yuv, a yí shwínén yé Akay.

Akay lòo lì gham rə̀y fo nsay, e nèn yèn mo wìr tiirin kiwuú e dù. Wù ku nèn kìíy ji dzə̀ á kiwuú ké yè wov.
Wù lò ji wun waà du, e kù nèn yèn wan ndzə̀v ye tuŋéné fo áwune yii tú mendzə́v.

Wù ló ji wun nəə e laʼ, kfəə́ rəə́ wáa yòv, a cèŋ, a səəsí wun.

Á nen gwàr bvə́y, e tòn ji á shéʼri á kfə́n ye wan wov kfənen é bàm là kinyo.

Akay ku dzə̀ʼə̀m e wun ghàm yee jeéy rəy, a kfər lúm kintin ke bvəy ye á tònèn, wúné wáa bòŋ wun.

You are free to download, copy, translate or adapt this story and use the illustrations as long as you attribute in the following way:

Ghám Akai Ye Tayíné

Author - Ursula Nafula
Translation - Beatrice Tafon Takeh, Mbinkar Emmanuel Keelen
Illustration - Catherine Groenewald
Language - Lámnsoʼ
Level - First paragraphs