Hapo kale aliishi mzee mmoja aliyeitwa Lotum.  Mkewe aliitwa Akiru.

Lotum aliwafuga mbuzi, ngamia, ng'ombe na punda.

Waliishi kwa muda mrefu bila kujaliwa mtoto. Baadaye, Akiru alijifungua mtoto mrembo.

Lotum alifurahi na kujivunia mkewe.

Siku moja, Akiru alimwacha mtoto nyumbani pekee ili aende kuwakama ng'ombe.

Kwa kawaida, alimwachia kibuyu cha maziwa.

Kila alipoachwa nyumbani, mtoto angeamka na kunywa maziwa yote kisha aanze kulia.

Mamake angekimbia chumbani kumtuliza.

Kila wakati Akiru alikipata kibuyu cha maziwa kikiwa kitupu.

Alishangazwa sana asijue ni nani aliyeyanywa maziwa yote.

Baada ya muda, Akiru alimjulisha mumewe Lotum mambo hayo.

Lotum akaamua kupeleleza.

Lotum alijificha chumbani humo. Mara alimwona mtoto akibugia kibuyu cha maziwa mdomoni.

Alishangaa kumwona mtoto akiyanywa maziwa na kuyamaliza.

Lotum na mkewe waligundua haya.

Waliamua kuondoka usiku mtoto alipokuwa amelala.

Walimwachia mtoto wao ng'ombe mmoja, ngamia mmoja na mbuzi mmoja.

Mtoto alipoamka alishangazwa na jinsi nyumba ilivyokuwa tulivu. Akawaona wanyama alioachiwa.

Alikasirika na kuwaua ngamia na mbuzi. Hatimaye, alijitosa tumboni mwa ng'ombe.

Siku moja ng'ombe akiwa malishoni, mwanamume mmoja alimwona, akafikiria, "Nitamchinja ng'ombe huyu nipate kitoweo."

Mara akachomoa mkuki na kumfuma tumboni akafa.

Alipokuwa akimchuna ngozi, alisikia sauti kutoka tumboni mwa ng'ombe, "Usiniumize, nimo humu!"

Mtoto huyo alitoka tumboni mwa ng'ombe na kujinatisha kwenye kichwa cha mwanamume huyo.

Mwanamume alijawa na hofu akatoroka kabla ya kuila ile nyama.

Walipofika nyumbani, mtoto alijinasua na kukaa mwambani. Mwanamume alimchinjia mtoto kondoo dume aliyenona.

Mtoto yule alikula, akashiba, akafurahi.

Usiku huo alitoweka asionekane tena.