Alose kolong ng'apesur, Alio ka Akiru aokun ng'akipi anang'olol.

Abong'unet, tobur kechi alorot kiyang'asi anataaba anaapolon.

Asaki Alio anyoun alosit nawi, nakaneni ikwa kirum ng'esi ataaba.

Kipung'ar Akiru nawi anyarare ata-ka-Alio.

Na adolunio itokeng nataaba, toriamu Alio irumit ataaba kire.

"Adukokini ayong alaar kiriam ataaba nyelomuneta ng'itieng lu amoni," tolimok itokeng Alio.

Kong'ina, toduk alaar kipeak ekidor epei bon, lo itoruni ng'esi elomuni tooma.

Tolimok ng'esi Alio tama, "Na abunio ayong, aeokini ayong dio tang'aaria iyong ekidor." Eos ng'esi lo: "Ika koku nachirima, bala ekiena, Keekee- i-yah! Tang'aara-e toto kon, kainak ng'akon kile!"

Kichikak nabo itokeng tama, "Nying'ao ibore nipe nyiyeni iyong." Kong'ina, nacha ebunio itokeng toeok, tang'aar ekidor dio naki ng'esi Alio akimuj.

Nakaneni, adukeene Ebuu esemeene, nabo apupeene ata-ka-Alio einuni ng'esi akimuj.

Toro ng'esi akitatama eos. Kitatami lokojokon ng'irwa nakaalak.

Tolimokis ng'itieng luche ng'esi atamar kiliko echut lo ariyet toeokinio ejok! Nakaneni kiliko ng'esi echut lo ang'olol bu toeok. Nyeng'aara ekidor.

Kiliko ng'esi echut lo ang'olol dio tobong'u toeok. Nakaneni nyeng'aara ekidor. Ekisidi kiliko echut lo ariyet.

Bu toeok, tang'aar ekidor. Tanyam Ebuu ng'olo Alio.

Na abunio itokeng nabo, toeok nikooyen. Nakaneni emam itwan ang'aa ng'esi.

Tanyara aberu ng'ina ekiriam ang'itiang kadaang. Kinokaki akim naapolon nadui. "Echakakin etiang'it lo anyami Alio nakim tonomia," tolimok ng'esi kechi.

Toporoporoto ng'itieng daang eosi:    "Ata-ka Alio - iouuu yah! Anikanyamit ikon koku, achakakin nakim-na! Chi-gir-rr!" Todol apak na ekwee.

Topor ekwee, dio akim kiwang'a ng'esi ekosim. Towaanik ng'esi tama, kwa-a-ak!

Esal kech kadaang bu Ebuu. Napei epori ng'esi, tachakakin nakim.

Towanik Ebuu esaki aking'arakino, nakaneni amam ikeng'arakinan. Topetaros ng'itieng luche!