Ngalelinye lilanga tonkhe tilwane tasendle tahlangana titewukhetsa inkhosi. Tatsatsa sincumo sekutsi libhubezi libe inkhosi.

Kubungata kukhetfwa kwenkhosi lensha, taba nemcimbi lomkhulu lowatsatsa liviki lonkhe. Tadla, tanatsa, tacula tabuye tadansa.

Ekupheleni kwemcimbi, tonkhe tilwane tabuyela emakhaya.

Inkhosi bhubezi nayo yabuyela ekhaya. Ngelilanga lelilandzelako, ngalesikhatsi impisi ifika endlini yenkhosi, yatfola inkhosi isembhedzeni igula. Inkhosi (yabeka ngelivi lelibutsakatsaka) yatsi, "Nginesifo lesimatima angati kutsi kumele ngenteni."

Impisi yatsi, "Awu ungakhatsateki nkhosi. Logwaja utawulati likhambi lekwelapha lesifo."

Sizatfu sekutsi Asho njalo kungobe bekafuna kufaka logwaja enkingeni. Impisi beyati kutsi logwaja angeke akhone kuyelapha inkhosi.

Inkhosi yase iyamamatseka yabuye yatfumela impisi kutsi iyobita logwaja.

Impisi yagijima yayobita logwaja. Yafika kulogwaja yatsi, "Asambe siye enkhosini ngobe inkhosi iyagula. Ingitfume kutsi ngitokubita." Logwaja wajaha endlini yenkhosi.

Inkhosi yatsi, "Ngijabule kakhulu kukubona sitsandvwa sami logwaja. Ngikubitile ngobe imphilo yami isengotini. Nginesifo lesingalapheki. Impisi ingitjele kutsi wena unalo likhambi lekwelapha lesifo sami."

Logwaja waphendvula watsi, "Ucinisile nkhosi. Ngingaselapha lesifo. Kepha kumatima kutfola umutsi."

Libhubhezi laphendvula latsi, "Ungakhatsateki logwaja ngekungatfolakali kwalomutsi. Tinyoni letindizako ngito letitawubanjwa. Kwanyalo sitekele ngalomutsi!"

Logwaja waphendvula watsi, "Ewu! Nkhosi yami, nangitsi lomutsi awutfolakali angisho kutsi ukhashane. Wena kute ulapheke kanye nje, kufanele utigcobise ngenhlitiyo yempisi."

Impisi yatsi nayiva loko, yacala yachachatela. Ngobe nguye lotjele inkhosi kutsi logwaja unawo umutsi wekwelapha lesifo. Akunamsita ngalutfo kutsi aphikise logwaja mayelana nalomutsi.

Yase impisi iyabaleka. Kute kube ngunamuhla, impisi itsandza kudla bologwaja kepha atihambelani nemabhubesi.