Kudzala kwakukhona libhubesi lebelinemandla futsi letfusa kwendlula letinye tilwane. Lelibhubesi belidla noma ngabe ngusiphi silwane. Kodvwa ngalelinye lilanga ekuseni libhubesi ngalesikhatsi lifuna lelingakudla labanjwa lugibe.

Libhubesi labhonsa kakhulu ngenca yetinhlungu. Latama, kuhlutfula kulolugibe. Lolugibe lwaya ngekufutsela kakhulu emlenteni walo lelibhubesi. Libhubesi laya ladzinwa labuye laba netinhlungu kakhulu emlenteni walo. Ekugcineni laphela emandla.

Kwandlula emalanga libhubesi lishiswa lilanga. Libhubesi labulawa yindlala nekoma kungekho longalisita. Libhubesi lacala kuphelelwa ngemandla. Libhubesi laphelelwa litsemba njengobe kuphela emalanga. "Ngitakufa ngibulawe yindlala nekoma lapha kulolugibe," laticabangela lodvwa.

Ngalelinye lilanga ekuseni, libhubesi leva umsindvo usondzela ngasehlatsini. Libhubesi labona ingulube yesiganga ihamba nemfati wayo Kanye nebantfwana, bakhuluma bahleka. Lomndeni wetingulube tesiganga bewuya emfuleni kuyotinatsela emanti ubuye udlale ngeludzaka lingakashisi kakhulu lilanga.

"Ngulube yesiganga! Ngicela ungisite, ngulube yesiganga. Ngicela ungikhulule lapha kulolugibe," kucela libhubesi. "Angeke," kusho ingulube yesiganga. "Wena usilwane lesigcilatanako. Utongidla ungente sidlo sasekuseni Kanye nemndeni wami uma ngingakukhulula." "Ngiyakwetsembisa, angeke ngente intfo lembi kangaka. Sitawuba bangani nangabe ungangikhulula," kwasho libhubesi.

Ingulube yesiganga yaba neluvelo. "Angitsandzi kukubona ukuletinhlungu, womile ubuye ubulawa nayindlala." Yase ikhulula libhubesi ngetimphondvo tayo letinemandla. Yasindzisa umngani wayo lomusha.

"Ngiyabonga kakhulu mngani wami ngekusindzisa imphilo yami," kwasho libhubesi. "Kufuneka ngiye emndenini wami, salakahle." "Hamba kahle mngani wami," kusho ingulube yesiganga. Yajabula kakhulu kutsi libhubesi selingumngani wayo. "Umndeni wami angeke uphindze ulibalekele libhubesi," ingulube yesiganga yayiticabangela.

Libhubesi lahamba lichuta liphelelwe nagemandla. Libhubesi laliphindze lilambile. Libhubesi labona bantfwana bengulube yesiganga badlala ngeludzaka. "Namuhla lilanga lami lenhlanhla," kusho libhubesi umlomo walo uphuma ematse.

"Yeyi mngani wami lomusha," kusho libhubesi. "Bengibambeke elugibeni emalanga nginganakudla. Ngiyacela ungiphe umtfwanakho munye ngitomenta sidlo sami sasekuseni?" Ingulube yesiganga yamangala kakhulu. "Ngikusindzise elugibeni manje sowufuna kudla bantfwana bami?"

"Ngiyacolisa mngani wami," kusho libhubesi, "kepha ngilambe kakhulu. Ngingabonakala ngibutsakatsaka kwanyalo kepha nginemandla kunawe." Libhubesi lavula umlomo walo lase liveta ematinyo alo lanqcolile. "Nangabe unganginiki munye webantfwabana bakho, ngitotitsatsela mine," kubhodla libhubesi.

Ingulube yesiganga beyati ayinaso sivinini nobe emandla elibhubesi. Angeke yakwati kusindzisa bantfwana bayo nasekuliwa. Kulungile ke! Ngitakunika munye webantfwana bami. Kodvwa kwekucala ngifuna ungikhombe kutsi wabanjwa njani kulolugibe kute gitewukwati kusindzisa lelinye lemabhubesi kulololugibe.

Libhubesi lacabanga ngebunandzi bemntfwana wengulube yesiganga. Lahluleka kubeketela. Libhubesi labuyela emuva kulolugiba lebatingeli. Latsi nalifika labeka lunyawo lalo kulolugiba kukhombisa umngani wakhe ngulube yesiganga kwekutsi wabanjwa njani kuleligiba.

"Kubuhlungu!" kubhodla libhubesi. Ingulube yesiganga yabese seyivala lolugibe elunyaweni lelibhubesi. "Ya! Ngikutfolekahle," kusho ingulube yesiganga. "Utawuhlala lapho kulolugibe uphindze ubulawe yindlala nekoma futsi. Sitawubona kutsi ematinyo akho lanemandla Kanye netidladla letikhaliphile tingakusita yini."

"Balekani Balekani Balekani kakhulu!" umfati wengulube yesiganga wamemeta bantfwana bakhe. "Phakamisani imisila nanibaleka kute babe wenu atonibona," kusho umfati wengulube yesiganga. Bantfwana bagijima kakhulu bancamula emahlatsi.

"Ngulube yesiganga ngicela ungisite!" kuncenga libhubesi liva kucija kwetidladla telugibe. "Ngitokwentela. Noma ngabe ungisindzisa kulolugibe." "Ayikho lenye indlela, Mcambimanga, angeke ngiphindze ngikukholwe futsi," kusho ingulube yesiganga. "Ngitawucwayisa naletinye tilwane kutsi tingakusiti ngobe usilima."

Ingulube yesiganga yabona bantfwana bayo babaleka. Balandzelana kanye namake wabo. Imisila yabo beyisemoyeni tentela kwekutsi babe wato atibone. Yajaha umndeni wayo babalekela endzaweni yekuphepha. Kuze kube ngulamuhla, ingulube yeiganga Kanye nebantfwana bayo tihlala tigijima tiphakamise imisila yato kute tibone kutsi tonkhe tiphephile.