Ipisi nenyoni khebaba bangani abakhulu, nanoma bebahlukene ngeendlela ezinengi. Inyoni beyikghona ukuphapha kodwana Ipisi yona beyikhona ukukhamba kwaphela.

Ngelinye ilanga ipisi, ifuna ukwazi okuthileko ngomngani wayo, yabuza inyoni, "Kgani yini into emhlophe le ehlala ingaphasi kwentamo yakho?"

Inyoni yaphendula, "Yinyama enonileko enamafutha engivame ukuyidla esbhakabhakeni. Sengiyidle khulu nje seyihlala isentameni yami." Ngokuzwa igama elithi inyama, amathe athoma ukuphuma emlomeni we pisi ngombana bekathanda inyama khulu. Ipisi beyifuna ngawo woke amandla ukudla inyama. Kodwana bekazakufikela ngubani esibhakabhakeni angana maphiko wokuthi aphaphe? "Ngiyakubawa mnganami," ibawa inyoni, "ngibawa ungiboleke amanye wamasiba wakho ukuze ngikhone ukuzenzela amaphiko wokuphapha. Ngifuna ukwazi ukuphapha njengawe."

Kodwana inyoni beyingadimani, yamupha amasiba. Ipisi yathungelela amasiba lawa yenza amaphiko. Yawabophelela emzimbeni wayo, beyalinga nokuphaphela esibhakabhakeni. Kodwana bekabudisi ngendlela emangazako begodu namasiba lawa bekamancani khulu ukuthi angamphaphisa. Kwafanele ukuthi ize nelinye iqhinga.

"Ngiyakubawa mnganami," ipisi ibawa inyoni, "ngingabambelela emsileni wakho nawuphaphela esibhakabhakeni?" "Akunakinga," kwatjho inyoni. "Ngyazi ukuthi ufuna kangangani ukuphapha." Asenze lokhu kusasa ekuseni. Nalifika ilanga, ipisi yabambelela emsileni wenyoni njengesithembiso senyoni baphaphela phezulu esbhakabhakeni.

Inyoni yaphapha, yaphapha beyadinwa. Kodwana Ipisi yathi, "Khewu phaphe uyephambili kancani mnganami!" Phela bekabona inyama emhlophe enonileko enamafutha ngaphezu kwabo, nomlomo wayo besewuzele amathe ngokurhala.

Nabafika esbhakabhakeni bafikelela iqatha lokuthoma lenyama enonileko enamafutha, ipisi yezwa ukusikinyeka. Elinye lamasiba asemsileni laphuma! Elinye laphuma godi nelinye godi. Inyoni yazizwa ilula, begodu izwa nobuhlungu emsileni wayo. Yavuma inyoni yathi: Masiba wenyoni, zisuseni. Masiba wenyoni, zisuseni. Kodwana ipisi yaphendula iphikisana nalokhu ekutjhiwo yinyoni yathi: Masiba wenyoni bambelelani, ningasuki. Masiba wenyoni bambelelani, ningasuki.

Ekugcineni, amasiba khange asakwazi ukubambelela. Ipisi beyiphakathi esbhakabhakeni. Yeqela inyama leya enonileko enamafutha icabanga nayingayidla, inyama enonileko enamafutha leya izombamba. Kodwana ithe nayithi ibamba 'inyama' leya, ekuzwileko beku mamafu athambileko!

Ipisi bese iwa msinya kwanje. "Sizani, sizani!" irhuwelela. Kodwana bekunganamuntu oyizwako. Inyoni nayo beyilahleke emafini.

Ipisi yawela phasi ngokufohloka yathula imizuzwana. Yavuka izwa ubuhlungu obukhulu, iphuke nedolo begodu izele neembazi umzimba woke.

Kusukela ngalelo langa kufika nje, Ipisi iyahluza begodu izele iimbazi umzimba woke. Zange ikgone ukuphapha nanamhlanjesi. Begodu yona nenyoni abasese bangani.