Mundalo tsia khale, Italanyi yali isolo ya amani khandi yaribwa muno. Yatiiranga tsisolo tsindi niitsilia. Itsuli ndala lweyali ikhaba shiokhulia shiomabwibwi, yatirwa nolukhanda lwo muyimi.

Italanyi yaoola ekulu khulwo butsune. Yakhwesa khandi ikhwesa okhwiinyia mulukhanda lwo muyiimi. Olukhanda lwatsirira okhukasa khushilenje shie italanyi olwa yatsirira okhukhwesa. Italanyi yachonya ne iulira obutsune obukali khushilenje. Olunyuma, yafwa omwoyo.

Tsindalo tsiabira Italanyi niyekhala mumubasu kufwa. Yali inzala khandi obulo na yabulao uchihonia. Tsingufu tsiachiwamo. "Ndalafwa khulwa inzala nobulo mulukhanda luno," niyeparira.

Istuli ndala, Italanyi yaulira oluyoka okhurula mufitsakha hambi ninaye. Yaulirisia khandi nalerenjera khu hambi. Yalola Injiri niichenda halala no mukhaye na abaana baye, batonya batsekha. Oluyia lwe Injiri lwali lutsia mumwalo okhunywa amatsi no khubaya mumatoyi omubasu kulakhachaka okhufwa.

"Injiri! Nochama khonya! Injiri!Nochama rusia mulukhanda luno," Italanyi isaya. "Shenyala ta. Oli isolo imbi. Olandia halala no luyia lwanje nga shiokhulia shio mmabwibwi nekhuinyia mulukhanda." Injiri ikalusia. "Ekhulaka mbu shenyala okhukhola shindu shibi nga esho ta. Khulaba abetsa niurusia mulukhanda," Italanyi iboola.

Injiri yabererera Italanyi. "Sheyanzisibwa okhuulola mubutsune nga ibo, nofwa obulo ne inzala ta." Injiri yakhwesa olukhanda okhurumushira tsinzika tsiaye tsirambi okhuhonia Italanyi. Injiri yahonia omwitsa waye omuyia.

"Orio omwitsa wanje okhuuhonia," Italanyi iboola. "Khatimba enzie khuluyia lwanje, olindwe." "Chenda obulayi omwitsa wanje," Injiri niikalusia. Yasangala khubeera Italanyi yali omwitsa waye. "Oluyia lwanje shilwirukha italanyi khandi ta," niipara.

Italanyi yatsia niitiechera khandi indeshere. Yali khandi inzala. Mufise efio, yalola abaana be Ingiri babayanga mumatoyi. "Luno ne inyanga yanje yeikhabi," Italanyi iboola niiratsa amare.

Italanyi yalangisia, "Yiwe Injiri, omwitsa wanje omuyia. Ndabere mulukhanda tsindalo tsinyinji oukhalia ta. Endi omuteshere oulayiima tawe. Onyala wachama umbe mulala khubaana bo nga shiokhulia shio mmabwibwi?" Injiri yauka. "Ndakhuhonia okhurula mulukhanda ne wenya okhulia abaana banje?"

Italanyi iboola, "Umbere omwitsa wanje. Abula endi inzala muno. Endi omuteshere khufise fino alali endi na amani okhuushira." Italanyi yasama omunwa kwaye okhumanyia ameno amangafu amengu. "Nolamba mulala khu baana bo, endebukulira omwene," ioola.

Injiri yali imanyire ibula tsimbiro nende amani ka Italanyi. Shiyakhanyalirwe okhushinga abaana baye mwihe. Injiri iboola, "Obulayi. Ndalakhuheresia mulala khu baana banje. Alali ndenya umanyie nga watirwa nolukhanda, kho enyalirwe okhuhonia italanyi yiindi khulukhanda luno."

Italanyi yakanakana obunulu bwo omwana we ingiri omutoro mu munwa kwaye. Siyenya okhulinda ta. Italanyi yakalukha khulikhanda injisiamo eshilenje shiaye okhwechesia omwitsa waye nga yatirwa.

"Wuui!" Italanyi yaoola. Injiri yali niikalire eshilenje shie Italanyi khulukhanda. Injiri iboola, "Aha! Ekhunyolere. Olaonga mulukhanda ilo inzala nobulo khandi. Khulole kakhaba ameno kao ka amani nende amatere amamemu kalakhuhonia."

"Yirushe! Yirushe! Yirushe mutsie!" Omuteshi wa Injiri yaibuushira abaana khu mwoyo kwekulu. "Chinje tsisuru ekulu nimwirukha papa wenywe abalole," khandi nalangisia. Abaana berukha tsimbiro okhubirira mufitsakha.

"Injiri nochama khonya!" Italanyi isaya khandi. Yali mubustune khulwa mumunwa mwo lukhanda lwo muyiimi. Italanyi iboola, "Ndilakhola shiosi shiawenya niuhonia." "Tawe, ewe omubatsa! Shinyala okhuulirisia khandi ta. Ndalaboolera tsisolo tsindi tsilakhuhonia ta shichira oli omubatsa, "  Injiri iboola.

Injiri yalola abaana baye berukhanga halala nende nyinamwana. Tsisuru tsiabo tsiali tsichinjirwe ekulu kho abalole. Yayuka okhutsia wo luyia lwe lwali ne boosi berukha okhwihonia. Okhula luno, tsinjiri na abaana babo berukhanga bachinjire tsisuru ekulu okhumanyia buli mundu aonere.