Lulala yaaliyo omuhaana owesiina Nagudi naali wehyeju bugali weene.

Nabuli olu nyina gamutumanga ohuhola omulimo gwosi gatenguŋanga.

Oludaalo lulala nyina galwaaye. Nga olwo amutuma atiine ewa nguhwaawe amuletereyo amataati agenjabulo anyweho gahaba bulaŋi. Olwohuba ti Nagudi gaali wehyeju gasalaŋo hweyabuhira mu hwebbomba eyo hungira eja ewa nguhwaawe.

Owiire ni werire nga nyina atagiha ohweralihirira.

Nyina galoma abo hu hitehere bamuyeede ohuheja Nagudi.

Gaali mweŋenderefu kubanga ŋaaliŋo ehinyaŋa ehirya otuhaana owiire.

Abaatu bendula Nagudi aye nga omwene sigemanyiho ati wilire.

Esaawa j'ehyegulo nijolire nga ehinyaŋa hitagiha ohwendula ebiryo Hiba higenda, nga hiŋunyira olusu lw'ahahaana. Abe hitehere baali banatere ohwoola huhidiba ehyo  Nagudi gaali sigemanyiye niwirire.

Nagudi gaweene ehinyaŋa nihiija nga atagiha ohwiteera. Abehitehere baŋuliiye ahahaana niheteera nga batagiha ohuduluma nibaja eyiri ejanjaasi.

Abehitehere bagaana Nagudi nahiri muhidiba ni gesinduhire bugali weene. Era ohuŋwa hu ludaalo olwo geega ohuŋulira n'ohwisa munyina eŋono.