Kolong ang'orot, arai Eng'atuny etiang'it lo ang'ikiling'a nabo akerito ng'itiang luche daang. Erumunii ng'itiang luche dio tanyam. Nakaneni, apei taparachu niti esaki Eng'atuny akimuj, abu aloket ang'ikokolak kirum ng'esi.

Abu Eng'atuny kirurumak a etoil alo apolon iirarit nikaapilan. Kirii aloket esaki alachakin. Kirij aloket anakeju keng nachia irikinia ng'esi. Tobur Eng'atuny nabo topipiler akeju keng. Ekisidi dio tajali ng'esi.

Tolunyar ng'irwa lukaalak eurieni Eng'atuny anakolong. Tanyam ng'esi akoro ka akure nabo amam ekayuunan ng'esi. Kikar ng'esi lokojokon. Tajali Eng'atuny na ayakareta ng'irwa. "Atoani ayong kotere akoro ka akure analoket ka naga," tatamak bon.

Ataparachu apei abu Eng'atuny kiira etoil anamoni anaapi. Tomisia ng'esi etoil nabo tokienyikinite ediye. King'olik Eputir ka aberu ka ngide keng iyanete tokianas. Aloose Eputir ka awi keng nang'olol akimat ng'akipi ka abolia alochoto ering'a akolong nyerirauna.

"Eputir! King'arakinae kare!" Kikalou Eng'atuny. "Talachakinae kare analoket kana," kimaimai Eng'atuny. "Nyepedori," tatachu Eputir. "Imoitana iyong. Kinyami iyong ayong ka awi kang, erai kalachaki ayong iyong. "Nyasubi ayong ng'akiro naaronok na ikote ng'una. Kiliwor ng'oni ng'ipaalon kilachack iyong ayong," kikong Eng'atuny."

King'olikinia Eputir Ng'atuny ng'isien. "Nyakajoikinit ayong akisemere iyong alochan, anakure ka atonere kotere akoro." Sodi kilajalajak Eputir aloket ang'ikel keng talachu Eng'atuny. Toyiu lopakeng lokitetet.

"Ejok noi ekone anikiunia," tolimu Eng'atuny, "alosi ayong nawi kang tokona, ejok noi." "Kape niajokon ekone," tatachu Eputir. Talakar ng'esi ani araunia Eng'atuny lopaekeng. "Nyeemi awi kang nabo Eng'atuny," tatamak Eputir.

Kichodoor Eng'atuny nawi enyamit ng'esi akoro. Abu ng'esi king'olik ng'ide a Eputir eboliasi alochoto. "Akwaar ekeny kang naga," tolim ng'esi akisuburakinet.

"Ekone Eputir, '' tanyara Eng'atuny. "Kerumit ayong aloket ng'irwa lu kalak nyimuja, nabo anonokuu akwaan nyerikae. Nakinae kare ikoku nikon ipei atanyam?" Tatalasi Eputir ng'akiro ng'una. "Kaiuuni ayong iyong analoketee ibongu nabo akinyam ng'ide kaang?

"Torimakinae ekone," tolimu Eng'atuny, "Kanyamit ayong akoro, anonok ayong tokona, nakaneni agogong ayong akidwang iyong." Tochii Eng'atuny akituk keng kidodiu ng'ikaturong'oi lunyang'ayek. "Pekiinaki iyong ayong ipei a ng'ide kon, alemari ayong bon ipei," kirurumak ng'esi.

Ayeni Eputir atamar nyapirana ng'esi kori amakar ng'ikiling'a lu ikote lu Eng'atuny. Ayeni atamar nyapedori akitojore Eng'atuny atodemu ng'ide. "Kainakini ayong iyong itaok ipei. Nakaneni, kidodikinae ayong mono ekurume lokirumit iyong aloket, atoyiunia moi eche Eng'atuny."

Kitamak Eng'atuny abobou a itaok Eputir anakituk. Nyemamakina ng'esi, tobong'o Eng'atuny naloket dio kiwaak akeju tooma naloket idodikinit lopaekeng kwa na erumit ng'esi.

"Woe!" kirurumak Ng'atuny. Kirijak Eputir aloket anakeju Eng'atuny. "Kong'ina! Kiriamun ayong ka iyong," tolim Eputir. "Kiboikin naloket ng'ina ka akoro ka akure nabo. King'olik ng'ikel ka ng'imager lukooyak kon king'arakinete iyong tokona."

"Towuta! Towuta! Towuta nikalonon!'' Kikek aberu a Eputir ng'ide keng. "Kisidiireta ng'ikosiman kus ikerete sodi king'olikinea apokus." tolimu Aputir. Towuta ng'ide lokojokon topedo ng'amon."

"Kingarakinae kare Eputir!'' Kimaimai Eng'atuny nabo epipilikinit aloket. "Kasubakinia ayong iyong ibore daang ni isaki iyong kiyuu iyong ayong." "Nyepedori ekaliokon! Nyakanupi ayong iyong nabo," tolim Eputir. "Echikichiki ayong ng'itieng lochie nyikiyuut iyong kotere imodiana yong.

Taanyung'a Eputir ng'itak keng ka aberu ibakiara namoni. Ediriyete ng'ikosiman kech king'olikinia ng'esi. Towut ng'esi ni ayei awi keng kilanyia akitu. Tanang ng'irwa lu, ekerete ng'iputiro ka ng'itak kech isidiirito ng'ikosiman kech king'olenakikinolor atamar kiya daang.