Kiibega kayima n daa boi ti ka yu'urɛ daa dɛna Palinyang. Palinyang wa daa de la ŋmaresi siyoobi ma'a gee ti nageyigeba daa ku a dɔgereba.

Tiŋa la puan nɛreba za'a daa kɔʻɔm kɛla mɛ la bia wa dɔgereba kum wa, ba daa fabeli la Palinyang n yeti ka beere ana se'em.

Ba daa laɛ a dɔgereba wa ba'asɛ la ba tiŋa la zuo daana Sausau daa yi a tiŋa la nɛreba zi'ire sɔsɛ la ba. Sausau wa daa de la nɛresɛka ti ba zɔta gee bɔʻɔra e girema la e tɔgeri se'em la, la a lɔgerɔ yia puan.

A zuo zometo daa kɔʻɔm wɔgɛ mɛ gã'a a poore zuo. Hali ba yeti a yuum ki'iri la goo puan gee ti ba nyaa ta pɔsɛ ŋmata tiisi basa gee nyaa mɛta yɛa.

A zi'irego la ti a daa yi la puan ti ligeri daana kayima ti ba daa yi'ira e ti Lokeyokoni n daa to'e Palinyang wa ti a ta bisera. Lokeyokoni wa daa tari la dayɔɔsi la poyɔɔsi.

A poyɔɔsi la n daa de sɛba n suŋeri ba dɔgereba yire tuuma puan gee ti dayɔɔsi la me daa bisera a nii la dusi la za'a yire la puan.

Palinyang daa zo'e la yire wa puan gee ti a puurɛ daa ni kɔʻɔm pee. Ba daa nɔŋɛ a yele mɛ ti eŋa me daa kɔʻɔm nɔŋɛ nɛra woo yele.

A daa ni nɔŋɛ la a tari dusi yese dunsɛkan ti ba ta obe.

Palinyang daa kɔʻɔm loe la naafɔ buyima nɔŋɛ bu yele sigɛ bu yu'urɛ ti Alinyang.

Alinyang daa de la nasebu n kiim nii la za'a. ŋwana daa basɛ ti bu daana la daa nɔŋɛ bu yele mɛ.

Daarɛ diyima ti kɔma wa bɔna dunsɛkan bisa nii ti i ɔbera yaama, ti saa kɔʻɔm pɔsɛ niira ti ba za'a zɔ lile tia ti saa da paɛ ba. Saa wa daa ni yue mɛ ti la nyaa ta ana lime.

Saa wa n daa ta go'e ti kɔma lɛbera ti ba ta ka'asɛ nii wa kɛ nii pugum fɔregɛ mɛ.

Ba paleŋa daa kɔʻɔm ɛkɛ mɛ ti ba pugum ka mina ba wan paɛ yire ti ba sɔ iŋɛ ba se'em ba san ka doose nii wa kule.

Ba daa ka mi nii wa tɔgelɛ zi'an bɔba la, kɔma la bayi daa yeti bama ye la ba ãseba yire gee ti bayi me yeti bama ye'esi la ba pugera zi'an.

Palinyang daa yeti eŋa nuu yeti a ɛ mɛ gee eŋa ka po tara ãseba bii pugera n wan kiŋɛ a zi'an.

Palinyang daa dikɛ la yɛm fii kɔlegɛ a miŋa nyaa daa ɛɛra gee yuuna yi'ira nasebu ti a nɔŋɛ bu yele la yu'urɛ.

Yuunɛ la n daa kini se'em n ŋwana:

Piii pi Alinyang!
Piii pi Alinyang!
Saka akula chi!
Saka orete chi!

Palinyang' wa daa kelum ɛɛra la bala la yu'uŋɔ wa gee yuuna.

A daa kɔʻɔm nɛ la nagebeto la dundu'urun zuo ti ba kɔʻɔm ma'ɛ. Gee ti a sina gee niira tɔla.

Palinyang n daa ɛ ta lͻŋera tiŋa la ti beere pugum yilegɛ mɛ. A daa ta nyɛ nii wa la tiŋa la dunkiinaba yire.

Ti a daa belum e ti a basɛ ti a pe'e nii la kule ti dunkiinaba la daa zagesɛ.

Palinyang daa pugum ka le mina eŋa n yeti a iŋɛ se'em. A daa kɔʻɔm le pɔsɛ yuuna mɛ gee ŋmɛregɛ lɛbera kula.

Alinyang, nasebu n kiim nii la za'a la n wum Palinyang kɔa. Alinyang daa kɔʻɔm nyaa kɔʻɔm sikɛ tuba gee pɔsɛ zɔta taba Palinyang. Ti nii la za'a daa kɔ'ɔm za'ɛ yaŋa la basɛ gee lagum pɔsɛ zɔta taba Palinyang. Ti a daa nyaa pe'e i kule.

Ba daa ta paɛ yire la ti tiŋa la nɛreba daa kɔ'ɔm lagesɛ mɛ gura e, sɛla n sɔi la ba wum a kɔa la zãazaarɛ. Ba za'a daa kɔ'ɔm yuuna mɛ pɛgera Palinyang mɛ.

Lokeyokomi daa pu'usɛ Palinyang gee daa nyaa da tapɔɔ mɔlegɔ bo e ti a tara a gɔnɔ suna bini kina sukuu. Bala n yuum ta'asɛ ti palinyang' pɔsɛ kina sukuu.