Yire kayima n daa boi ti tia bɔna yire wa puan tara tiisi wɔla n za'asum gee ana suŋa ti nɛra woo kina dita.

Pugela n me daa boi yire wa puan ka daa kɔ'ɔm sum mɛ niɛ gee me tara halɛ suŋa ti budaa woo bɔta.

Pugela wa n daa kɔ'ɔm ta bi lebege pɔka ba'asɛ la budibepɔɔlɔ la budanya'asi n daa kɔ'ɔm kina ka yire lɛgera ka ti ba di.

A dɔgereba daa nyaa ku nuurɛ ti budasɛka n wa'am yire la na zi'ire ta ma'ɛ yinɛ gee ka makɛ kalum tiisi wɔla wa, kaŋa daana n wan di bama poyua wa.

Sɔɔleŋa wa daa kɔ'ɔm paɛ tiŋa woo mɛ. Budasɛka n daa wa'am yia la daa de la kaareba za'a zuo daana.

A daa de la budibepaalega n sum gee kelum tara lɔgerɔ. Ba daa bɔ e zaarɛ ba'asɛ la, ba daa dikɛ la tiisi wɔla wa tari wa bo e. A daa pugum ka zi'ire yue, ba ta yeti ba bisɛ ti a pugum di tiisi wɔla wa mɛ, ti ba sa'ɛ e ti a yese.

Dunkiima nɛŋa daana n daa tagelɛ, eŋa me daa sum la bala miŋa gee me tara lɔgerɔ. Pugela wa a daa nyɛ la, a me daan boti e mɛ.

Gee ba kɔ'ɔm tari dia wa bo e, a pugum ka dalegum gee di bu ti ba sa'ɛ e ti a yese.

Mina n daa tagelɛ la daa de la mina n tari zi'isi zo'e zo'e. A daan de la budasɛka n lɔrɛ gee ka nana nɛreba.

Pugela wa n daa nyɛ e la, a daa kɔ'ɔm pu'usa la yinɛ ti a di dia la ti ba sa'ɛ e.

Ba daa iŋɛ dia la wa bo budibela wa, a daa zagesɛ mɛ ka di dia la, ti pugela yɛm daa kɔ'ɔm bɔi ti a nyaa daa bɛlena budibela la ti a di dia la.

La daa ta paara gogo anaasi ti kom daa wuŋɛ budibela la ti a mɔregɛ koŋe gee daa di dia la ti ba sa'ɛ e.

Naba n daan de mina tagelɛ. A daan kuregɛ mɛ gee me le lɔre ka buke sɛla. Pugela daa kɔ'ɔm le iŋe a suure puan ti a di dia la ti ba sa'ɛ e ti a kiŋɛ.

Ba iŋɛ dia la bo e la, a nan zagesɛ mɛ gee kɔ'ɔm zi'ire bala ta paɛ zaanuurɛ. La ta ŋmɛ'ɛra gogo ayoobi la ti yeti ba pa'alɛ e nama dɔbelegɔ zi'an ti a dɔbelegɔ zi'an ti a dɔbelɛ a nama.

Ti ba pa'alɛ e ti a kiŋɛ.

E ta ze'ele bino zi'an lɛbera na la ti a nuurɛ za'a kɔ'ɔm nyuusa mɛ la tiisi wɔla wa ti ba daa baŋɛ ti a di dia la la nama dɔbelegɔ zi'an la ti ba daa sa'ɛ e ti a yese.

Dabesa ayi puan ti budibe-suŋa kayima daa le wa'am, budibela wa daa de la naba dayua. Ka daa sum mɛ gee me tara lɔgerɔ. Pugela wa n daa nyɛ e la a me daa kɔ'ɔm bɔta e mɛ.

Pugela wa daa kɔ'ɔm iŋɛ kalam yi e lebe kinkɛleŋa ta yele e ti a da di tiisi wɔla la, gee iŋɛ ba fii tare wa'am bo e.

La daa ta paɛ la gogo pia la ayi zuo tiŋasuka ti budibela pugum dikɛ dia la di.

Ti pugela wa sunsɔa daa kɔʻɔm nyie za'a ti ka kɔʻɔm ŋmɛ kaasega.

Yiimbeere ti kaara kayima nyɔregɛ. A daa de la zinnyaka gee me ka tara sɛla amaa a daa de la nɛremina ti ka yu'urɛ yese zi'an woo. A daa de la mina n nɔŋɛ tɔgum.

Pugela wa daa kɔʻɔm iŋɛ a suure puan ti eŋa n yeti a di mi'a. Pugela la daa iŋɛ tiisi wɔla la wa bo e gee kɔʻɔm yele e yeti a di ti ba sa'ɛ e ti a kiŋɛ.

Ba bo budibela tiisi wɔla wa a daa zagesɛ mɛ ti pugela kɔ'ɔm zi'a ti ka sunsɔa kɔʻɔm nyie za'a. La daa ta paɛ zuo tiŋa suka mɛ gaŋɛ basɛ ta paɛ gogo ayi wuntɛɛŋa ti a kelum ka di.

Gogo anaasi puan ti a daa soke ko'om yele. Pugela wa daa nyaa kɔʻɔm pu'usa yinɛ ti a di tiisi wɔla wa, a daa kelum bɔna la pu'usegɔ la zuo gee ti gogo ayopɔi ta ŋmɛ yu'uŋɔ.

ŋwana daa pa'alɛ ti kaara wa n sirum di mi'a sɛla n sɔi la a daa nyaŋɛ ŋmibe tum pugela la dɔgereba la n boti se'em la.

Pugela wa dɔgereba daa ka le tara sɛla n wan iŋɛ gee daa yarum dikɛ ba bia wa bo zinnyaka wa. Pugela wa daa belum a dɔgereba wa mɛ gee ba daa kan le nyaŋɛ iŋɛ sɛla.

Kaara wa n daa tari pugela la yɛ'ɛsa kula la, a daa yuuni la nyuunɛ n zã'asum gee pa'ara a nu'usi. Zama woo daa nyaa yese la sore zuo ti ba ta nyɛ budaa wa la ka pɔga wa.

Nɛreba wa basɛba daa de la nɛreba n tuni bɔʻɔra nab dayua. Ba daa tari la ligeri la dusi wa'am na gee yele kaara la tti a san sakɛ a tara gee basɛ pugela la.

Kaara wa daa ka gu'um gee daa sakɛ to'e ligeri la la dusi la daa kiŋɛ.

Tuntuneba la daa nyaa malegum tee la lɔge-suma yɛ pugela wa gee tari e kiŋɛ naba zagenyɔren, saɛ kɛ naba dayua la zi'an.

Ti la iŋɛ fii ti ba daa kiŋɛ ta yi a dɔgereba ti ba bama me kɔʻɔm maasum wa'am na maalɛ pɔgedire malema bo ba bayi la.