Basetsana Makgalemele o belegetšwe motsetoropong wa Soweto. E be e le morwedi wa bararo go batswadi ba gagwe. Ba mo neile leina le gobane ba be ba na le bana ba basetsana fela. Ka setšo sa Setswana, go reela morwedi leina le go dumelwa gore ngwana yo a latelago e tlo ba mošemane. Se se diregile ka nnete. Ngwana yo a tlilego morago ga gagwe e be e le mošemane. Batswadi ba gagwe, bagolo ba gagwe le kgaetšedi ya gagwe ba be ba mmitša Bassie.

Bassie o be a na le dihlong ge e sa le yo monnyane. O be a rata go opela le go bina ge a le ka phapošeng ya gagwe. Tšatši le lengwe ge ba be ba le sekolong, mohlahli wa bona wa kgwele ya matsogo ya basetsana o ile a laela basetsana ba babedi gore ba kgethe dihlopha. Basetsana o be a eme ntlheng ga lepatlelo ka kholofelo ya gore yo mongwe o tla mmitša a re, "Tla o raloke le rena!" Go be go se na yo a mo nyakago sehlopheng sa bona. Ba be ba sa tsebe gore Basetsana o tlo ba yo mongwe wa batho ba go tuma mo nageng.

Mo mafelelong a beke, yena le bagolo ba gagwe gammogo le kgaetšedi ya gagwe ba be ba thuša batswadi ba bona go lefa mekitlana. Mma wa bona e be e le morutišigadi, gomme tatago bona e le mootledi wa pese. Ba be ba thuša ka go rekiša disangwetše lepatlelong la kgwele ya maoto. Ba be ba rekiša ka lebelo gore ba kgone go raloka le bana ba bangwe ge papadi e seno fela.

Ge a na le mengwaga ye lesometshela, Bassie o be a le botse kudu. O ile a thopa difoka tše pedi mo ngwageng: e lego Mmasebotsana wa Soweto le Mmasebotsana wa Afrika borwa wa MothoMoso. Bobotse bja Bassie bo be bo se ka ntle fela. Boteng bja gagwe le bjona bo be bo le botse. Le ge a be a le Mmasebotsana, ga se a ka a lebala ka setšhaba sa gabo mo a goletšego gona.

Bassie o be a le bohlale kudu. O be a šoma ka maatla dithutong tša gagwe sekolong, kudu thutong ya gagwe ya mmamoratwa: thutamahlale (saense). Mphatong wa marematlou, o ile a thopa sefoka sa maemo o godimo ka yona thuto yeo. Ga se tšeo fela ka yena, o ile a kgethwa go ba hlogo ya basetsana baetapeleng kua sekolong. Mosetsana yola wa dihlong o be a fetogile a tsebega sekolong ka moka.

Tatagwe o be a phela a hlohleletša bana ba gagwe gore ba bale. O ile a fa Bassie puku ya go bitšwa The Power of Positive Thinking. Bassie o ithutile go tšwa pukung yeo gore go ba le tshepo boipoto go thuša go tšweletša ditoro tša motho. O ile a lora a thopile sefoka sa Mmasebotsana wa Afrika Borwa. Toro yeo e ile ya tšwelela ka go fetoga nnete, gomme a ba a hwetša meamo a bobedi phadišanong ya bo Mmasebotsana wa lefase!

Mmagwe e be e le mohlohleletši wa gagwe. Bassie o hlalošitše mmagwe ka go re, "Ke mosadi wa Mothosa yo bogale wa seroto." E be e le morutišigadi ebile Bassie o be a nyaka go swana le yena, fela dilo ga se tša sepela ka tsela yeo. Morago ga go thopa sefoka sa Mmasebotsana wa Afrika Borwa, o ile a ba mogaši wa thelebišene. E be e le seroto mošomong bjalo ka mmagwe. Mošomo wa gagwe mo thelebišeneng o dirile gore a bule khamphani ya gagwe tšweletšo go tša thelebišene. Ka se sebaka ke yo mongwe wa basadi bao ba atlegilego mo go tša kgwebo.

Basetsana o dumela gore motho o fiwa mpho gore a tle a e fetišetše go ba bangwe. O dira se, ka go ithaopa a neelane ka nako ya gagwe, tšhelete le go bulela bao ba sa šomego dikgoba tša mešomo. O ikamantše le diprojeke tše mmalwa setšhabeng le Motseng wa gabo. Projeke ye e lego pelong ya gagwe kudu ke ya Nelson Mandela Instutute.

Basetsana o be a tsebana le Nelson Mandela kudu. Nelson Mandela o ile a mo ngwalela lengwalo la go mo lebogiša morago ga go thopa sefoka sa Mmasebotsana wa Afrika Borwa. O be a mmitša "Kgošigadi" ka lengwalong leo. Bobedi bja bona, ba be ba rata bana le thuto kudu ebile ba dumela gore setšhaba seo se rutegilego se tla thuša go lwantšha bohloki.

Basetsana o nyalane le Romeo Khumalo. Bobedi bja bona ba ile ba hlama lekala la Romeo and Basetsana Khumalo Family Foundation. Lekala le le hlokomela ditšhiwana - bana bao ba hlokago batswadi.

Bassie o ile a kgona go nea lapa la gagwe le mošomo wa gagwe šedi ka go lekana. O na le kgwebo ya gagwe yeo e bitšwago Basetsana Women Investment Holdings. Basetsana le Romeo ba filwe bana ba bararo, bašemane ba babedi le mosetsana. Basetsana o rata karolo ya gagwe ya go ba motswadi go bana ba gagwe gomme o re go ba mma "ke maemo a hlatlogilego kudukudu."

Basetsana o re sephiri sa go mo tlišetša katlego ke "hlohleletšo, maikemišetšo le lerato la dilo tšeo a di dirago." Ntle le katlego ya gagwe, o sa na le boikokobetšo mola ka lehlakoreng le lengwe a kaonafatša lefase. O re bobotse bja motho bja ka ntle ga se bobotse bja nnete. Bobotse bja motho ke pelo ya lerato le go abelana ka tsebo. Ke ka lebaka leo Basetsana e lego kgošigadi ya rena.