Kgalekgale, go be go na le mokgekolo yo a bego a rata motlogolo wa gagwe kudu. O ile a mo fa mpho ya lee gomme a re go yena, "Go tšwa leeng le, o tla hwetṧa magadi a go nyala ge šetše o gotše o le monna." Mošemane o ile a tsena tseleng a sepela.

Tseleng o ile a gahlana le batho bao ba bego ba fula dithetlwa tše ntsho gomme ba kgopela lee la gagwe. O ile a ba fa, ba thuntšha dithetlwa ka lona gomme la thubega.

Mošemane o ile a lla, a re, "Ei!Ei! Le mpaketše mathata! Lee leo e be e se la ka. Ke la koko. Koko o mphile lona gore ke hwetše magadi a go nyala mosadi."

Batho bale ba go fula dithetlwa tše ntsho ba ile ba mo fa phata yeo ba bego ba e šomiša go fula dithetlwa ka yona. Mošemane o ile a e tšea a tšwela pele ka leeto la gagwe.

O rile a sa sepela, a gahlana le banna ba ba bego ba aga ngwako gomme ba kgopela go šomiša phata ya gagwe. Ba ile ba e šomišetša go aga ngwako gomme ya robega.

Mošemane o ile a lla a re, "HeeHeeHee! Le mpaketše mathata! Phata yela e be e se ya ka, e be e le ya banna ba go fula dithelwa tše ntsho. Ba mphile yona gobane ba thubile lee la ka. Lee leo ke be ke le filwe ke koko gore ke hwetše magadi a go nyala mosadi."

Baagi ba ile ba mo fa ngatana ya bjang bja go rulela ntlo. Mošemane o ile a tṧwela pele ka leeto la gagwe.

Ge a le tseleng a gahlana le modiši yo a ilego a mo kgopela bjang bja gagwe. Modiši o ile a bo fa kgomo ya gagwe gomme yona ya bo ja ka moka.

Mošemane o ile a lla, a re, "EEE! O mpaketše mathata! Bjang bjo e be e se bja ka. Ke bja baagi. Baagi ba mphile bjona gobane ba robile phata ya ka. Phata yeo e be e se ya ka. Ke e filwe ke bafudi ba dithetlwa tše ntsho gobane ba thubile lee la ka. Lee leo ke be ke le filwe ke koko gore ke hwetṧe magadi a go nyala mosadi."

Modiši o ile a fa mošemane kgomo ya gagwe. Mošemane o ile a tsena tseleng a tšwela pele ka leeto la gagwe.

Ge a le tseleng, a lebile gae, o ile a hwetša batho ba keteka mokete wa lenyalo. Ba leloko la gabo ngwetši ba ile ba mo kgopela kgomo ya gagwe. Mošemane a ba fa yona. Ba ile ba e hlaba ba ja nama ya yona ka moka.

Mošemane o ile a lla, a re, "EiEiEi! Le mpaketṧe mathata! Kgomo yela e be e se ya ka. Ke e filwe ke modiši ka ge a lešitše kgomo ya gagwe bjang bja ka. Bjang bjo ke bo filwego ke baagi ka ge ba robile phata ya ka. Phata yeo ke bego ke e filwe ke batho ba go fula dithetlwa ka ge ba thubile lee la ka. Lee leo ke be ke le filwego ke koko gore ke hwetṧe magadi a go nyala mosadi."

Ba leloko la gabo ngwetši ba re go yena, "Ga re na se re ka go lefago ka sona. Fela re tla go fa ngwetši." Ya ba ge go phethegile la mogologolo la go re, "O tla putswa go ya ka ditiro tša gago mafelelong."