Kolong ang'orot, ayei edia lo anyaritae Demane. Ayakar nakatokeng namu na anyaritae Demazana.

Na atonia itiokech ka apakech, apotu toloto akiboikin ka amaekech. Na kaneni asubere kesi naronok. Ebung'ao kesi ang'akito anakoyak, nabo ainanakinio euji lodiochich ainakinet apei alotooma akwaar arai akimuj.

Apotu tanyut akope na elomete. Apotu kesi toema na eirareta atamar ayakasi ng'ikanyim lu alomito lomoru. Sodi apotu tosubakis ekidor epei togolioto epiding, kimiekis ng'ipukei ng'iarei lu itoruni ekuwam ka akicha. Abu Demane kichikchikak nakatokeng, "Kiboikin nakope mono alosi ayong erikas, nabo nyidorok akiring cha daang ng'ina. Eminasi ng'ikanyim eure akiring."

Nachatabong Ayauni Demane ibore cha daang ni arene-apoo kori ngikieny luchik kori atapen nachi. Ani ebunit nakope aeo ng'esi: "Demazana, Demazana, ikoku a itiokang, tang'akinae ayong akope na. Epedorete ng'ikelikorok alomar tooma ng'esi. Eyakar ng'esi ng'ipukei ng'iarei."

Abu Demani king'olik asilis akiboi anakope aparan daang. Na kaneni akwaar apei, na ayakaria lokatokeng, abu tolot nikalapatan akilaar. Abu tanyu ayanae na eboliar nabo ng'ikito ng'idis lu edoki. Abu ng'esi kiira atamar ayakar alolom anbo alakara. "Ng'aye ro", abu kitam, "Emam ng'ikanyim. Epedori atamar alimunit amaekang atamar eyakasi ng'ikanyim sodi atoemeta sua."

Aparan nache abu ng'esi totiaku pe eemit akinokakin akim kipiararor. Na kaneni abu kinokak akim tooma akope irijakinit ekidor – atoyakar cha niajokon. "Ayeni atamar emam naronok kewak cha akiring adio nakim. Ejoker noi ayakar akimuj nakakonon."

Na abunio lokatokeng nawi, abu toeok kona palem. "Demazana, Demazana, ikoku a itiokang, tangakinae akope na. Epedorete ng'ikelikorok alomar tooma. Eyakar ng'ipukei ng'iarei." Abu tang'ak ekidor nabo kilom ng'esi. Napei eng'olikinia akiring na ipotoe, abu Demane king'is, "Ikokini iyong isubakini nu emam akim ai?" "Etooni ayong akiring anikalapatan anakolong aloking'a akope," tatachu Demane atipei. Aburunit Demane noi apega, nabo kiboikinos kwap kimuja apei.

Aparan nache abu kinokak akim nabo kidorok akiring. Napei arumoria ng'esi abu kiira etoil eeo anikalapatan, "Demazana, Demazana, ikoku a itiokang, tangakinae akope na. Epedorete ng'ikelikorok alomar tooma. Eyakar ng'ipukei ng'iarei." Na kaneni pe ekoni etoil gn'olo alokatokeng. Tma Demazana, "Emam. Mere iyong lokatokang; nyikoni etoil kon lokeng." Ayeni ng'esi atamar ayei niajokon anakope.

Wadiochichi nabo aeo itwaan anikalapatan akope, "Kimiekinae atolomu tooma nakatikang. "Demazana, Demazana, ikoku a itiokang, tangakinae akope na. Epedorete ng'ikelikorok alomar tooma. Eyakar ng'ipukei ng'iarei." Ekoni etoil ng'olo alokatokeng, abu bocha tang'a ekidor."

Abu ekile lokavhakan kilelebun lokidor akope. Abu togirakin Demazane roko nyematara nikalonon. Ayakar Demazane alolomu namudaret ekuron anakim. Ani iwokoritae ng'esi, achakanakini aenakini ng'esi ekuron nege ka ama alorot.

Aparan ng'ina ng'una apedori Demazane akisub arai akirumun amalij ng'ina eleleba aoewokit kesi anabusek ananinik aloseget keng. Na anang'unia ng'esi nakope, abu torukau nakatokeng kolong keaka. Na kaneni edodiunit ekuron ni ewapit ng'esi tani nakito. Abu kiwap ekuron alorot tani ni eng'olikinia ng'esi ekim anikalonon.

Eboi ekile loapolon noi lokachakan diyete akim eting'it abusek napolon. Abu Demane kidiria lokile ng'olo, nabo ing'alae ikoni ichodo, "Kelipit kare, apa, ipedori iyong aking'arakin ayong a? Awanan ayong akeju. Eitanit ayong ng'akipi ng'adis." Totachu ekile, "Kasakakini ayong iyong ng'akipi ng'adis kilimu iyong atamar nyipedori akitap abusek kang." Abu nabo kiwak abusek loge tooma akai keng.

BNapei eidakinia ng'esi, abu Demane totub auno na abusek nabo alotooma tolomu nakatokeng. Abu Demane kilokony abusek ng'ina ka nakeng na eleleba ao, apotu nabo lokato ka nakato toduka aking'olikin ng'una esubakinosi.

Na ayaunia ekile ng'olo ng'akipi apotu kirukut ka lokokeng ka nakokeng. Abu tolimok nakokeng, "Iyei ibore niajokon nabusek na eyei nakai nayok. Kape! Yau!" Abu tanga abusek loge aking'olikin ibore ng'ini, na kaneni abu ao tokony akan keng, abu nabo tanyarai, "Kikonyi ng'esi." "Kape king'arak ng'esi!" abu tobelak lokokeng. Apotu nasek eking'aren nabo tosubakin.

"Nyikilemasi ayong kwa na ekabangabangat," abu ng'esi tochalak nabo toloma tooma akai. Abu togol akai nabo tang'a abusek elope. Abu ao na ang'oit toporu nikalapatan tokonya akou, ekume ka ng'akonyen keng. Emuduki, abu toporoporok, igoro apipiul.

Abu tolot toporok ising'arenit akou tooma nabwel na epokia akou keng alochoto. Abu king'olia natutube ekitoe na ekoni atorom ekitoe sodi teten amolij ao. Akolong'it nakoyen arumoret ng'una emujenete Demane ka Demazane ao nakabon anamolij.