Jaman kureyen, bǝla Arnadi canidǝ kwa laa cunju Kondo-a kamunju Fanna-a kasarga. Yalla arakku casambo. Samma ferowa.

Fanna curo tadanju tulurre ngoyenniya, Kondo tiro: "Fero gade kembumba fanni kollǝmi" yeno. Amma konga kembumba, sala kura laa dabbarjǝgǝkki.

Sa njamboye kadinniya, Fanna leje ngosoma laa kiro. Fero ra tadaro kiworo.

Kawuwa tada-a fero-aye cǝwando. Yalladǝro Adam-a Auwa-aye cu casakko. Yadǝ Adamba curuiya karwukǝji fanji, amma Auwaa curuiya sai karwukutta. Karwunjun awo falma dioyedǝ yeno.

Fanna Auwaa ngosomadǝro koljiye Adamba kwanjuro kikkado.

Karwukǝjiaro dǝladǝa Kondoro fǝleyeyeno. Kǝjifandaro jama bǝlaye capce cu tadanjuro njakkoro.

Adam wuraje baɍimi shawaro walyen. Auwa ye fero shawaro walyen.

Yim laa nansǝni cidi duwon, Adam fero shawa laa kiro. "Fero adǝa kamuro ngokki cini karwunjun'."

Niyaro kiworǝnniya, aiya badiyen: "Mukhwana wefwe, Mukhwana. So yakhupa omunwa, Mukhwana. Nebebula omukhana, Mukhwana. Barulaka khulwanda, Mukhwana. Nebebula omusiani, Mukhwana. Barera mungo muno, Mukhwana. Iyeyi yakwa, Mukhwana. Iyindi yakwa, Mukhwana."

Adǝgaidǝ kadaro tǝdo. Adam awo cǝdi nojǝnni. Na yanju Fannayero cije leyen. "Fero shawa laa kirukkiya, tiro jande niyaye yiddǝkkiya, wuro aiya faldǝmaa sawison yessiyi." yeno yanjuro.

Yanju tiro: "Fero adǝye aiyadǝ ngaima" yeno. Nayi ynidi kawuwa. Banǝm tada gǝni wa fero cǝragǝnni. Adǝ nangaro tǝn dǝlanjun tia ngosomadǝro kolgǝkke nia fadoro na banǝmbero ngiwudǝkko. Tadadǝ ajapcǝna ngai.

Adam lawardǝa banjuro wulgeyenniya, badǝ jirenju baworo asuyen. Kamudǝa bowoje tandi yindin ngodagǝne ngosomayero lejane Auwaa fadoro kewudo.

Auwa fadoro kadinniya, banju-a amwurawa-a kani duwajane sala kedo. Sala adǝ kǝla yalla sammaye kǝldaye.

Saa diriyenniya Auwa tada mai ye gaɍiwu ye bǝladǝyedǝa niyayen. Larasu-a arsiyi kada-a fanjaro cuwudo.