Tijaanɩ a tɩ ŋǝ ɩŋɔrɩpicacaʊ gɩjibɔŋɔ.

Ɩŋɔrɩpicacaʊ ɩ lee ɖaa ɩŋɔrɩpi ɩ na wala aɖa alaa bʊkɔ bʊɖǝn koo bʊcǝma bʊɖǝn na faŋa ma na. Ɩŋɔrɩpi ɖe ɩ lǝŋ gaɖu jɩ páá na gatǝna.

Tijaanɩ a tɩ yɛɛ a prâ alaŋlaŋ kaasanayar a ta tɩ́ kpǝ̂r. Alaŋlaŋ kaasanayar a na mana mana na ce alaŋlaŋ.

Gʊsǝrǝ koo bʊto ɩ mana alaŋlaŋ. Alaŋlaŋ kaasana baja ba na kara alaŋlaŋ kaasana katoko na naa ba sǝ̂ra aɖa alaafɩya.

Toko ɖe a wʊɖa gʊsǝrǝ gʊsoŋsono gʊŋurka kʊ na bʊto bʊnyemka ncǝn.

Alaŋlaŋ kaasana katoko ɖe a tɩ tɔjɩ alaŋlaŋ kaasanayar gboo ashee ʊnyǝŋkrǝ, ʊsʊɖʊ n'alaŋlaŋ kantuli.

Alaŋlaŋ kaasana baja ba tɩ sǝ alaŋlaŋ kaalepree na mana na ma ; alepree baɖe ba lee ka ɩlɔɔrɩ mbaɖee ba lee ashee alaŋlaŋ kaasana ma.

Alaŋlaŋ kaalepree ba wʊɖa fisee kamotɛɛ bakaŋkra pɩ.

Ɩmotɛɛ ba na nyǝm alaŋlaŋ kaalepree alǝŋ gaɖu na gatǝna naa a sǝ̂ra atǝ alaŋlaŋ gaɖuɩ ɩ fana ma.

Fisee kɩmotɛɛ ba na jɩ bʊshi bʊ tuutuuma naa aye nyǝm alaŋlaŋ kaalepree ɖe.

Bʊshi bʊ ta naa shɩ̂ ʊtonu, ɩ na ɖoo n'ʊtonu ɖǝn na fisee kaŋkǝm.

Bʊshi kʊjɩʊ kɩkashɩ ɩ na nyǝm fisee alaŋlaŋ. Gɩ tɩ lo ɩfisee gboo na nyǝm ɩsateliiti alaŋlaŋ.

Ɩsateliiti tuutuuma ba tɩ mana na sir gatǝna. Aŋɔrɔ a lee sateliiti nɖee arɛ̀ k'a lee ma na.

Ɩsateliiti mbaɖee bɛrɛ ba lee ma, ba tɩ kaŋa n'atʊ atǝma ɖaa nɖee ɩ na pala arɛ̀ a yɔ̂ ʊto, asǝrǝ, ʊshilè n'aɖǝla kɩlaameri ma ; ɛntɛrnɛɛtɩ na teelee kʊlou na gatǝnbɔlɔka kabɔ kʊleu nɩ.

Ɩsateliiti ba na rɩ rɩ na sir bʊkɔ́ɩ bʊ wu pɩ ma, na kal baa ŋkǝlǝ́ mpaŋa.

Gasana gaɖe jɩ ba na yɩɖa wàà, ʊrɩʊ asir akal kʊnyɩŋca.

Tijaanɩ a yɔ ayɔkɔ tuutuuma ashee ɩŋɔrɩpi naa ayɔ bʊtǝnwor atʊshilè na kɩbanɩba nɩ.

A yɔ bʊtǝnwor ganaana mbʊɖee bʊ na sir ʊshilè na kal ma ; bʊni bʊ gǝŋ : Mɛrkiir, Feniisi, Gatǝna, Maasɩ, Jipitɛɛ, Satuuni, Uraniisi na Neptuuni.

A yɔ wàà, gɩŋɔrɩpi gɩɖɔŋkɔnɔ gɩ ɖa ka atʊshilè na kɩbanɩba nɩ, gɩni jɩ gǝŋ ʊshilè.

Atallaŋaja ɩɖǝn gboo ɩ tɩ sir ʊshilè.

Ntallaŋaja n lee ntala nɖee n ɖa alaŋlaŋ ma na. Atallaŋaja ɩɖe katuutuuma ɩ lee atulijala nɩ, ama kɩɖǝn ɩɖe sǝŋkǝla.

Atallaŋaja ɖe ɩ ta kûl gʊtǝnsǝrǝ gʊ fʊl gatǝna ma nɩ, ɩ na fǝɖa fǝɖa were na cam ʊtonu. Ɩ na ɖoo atoŋkǝlǝ nɩ kokoo ɩŋɔrɩpi ɩcuka.

Gaŋ na gaŋ na atallaŋaja ɩ na fǝɖa atǝn.

Ʊlamʊ nɖee ʊ ɖa atǝn n'alaŋlaŋ kagɩcɩɩca ma, ʊ yɔgɔ yɔgʊʊ.

Gaɖulǝŋka kɩkiɖeka kaaŋǝ ga lee gaŋǝ ŋgaɖee ga na kaŋa n'arɛ̀ a naa ŋǝ̂ ayɔkɔsʊra nɖee ɩ lǝŋ gaɖu yɔgʊʊ ɩnyine fɔɩ k' ɩ sǝ̂ra aŋǝ ma na.

Tijaanɩ a tɩ ceu alaŋlaŋ na gaɖulǝŋka kɩkiɖeka kaaŋǝ halɩ apɩ tɩ́ mâna ace alaŋlaŋ.

Ce livre a été traduit et publié par l'équipe anii de LINGO-Bénin à Bassila avec l'appui de "Der Gute Topf für Benin e.V.". Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 01 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.