Naa Jɛngbuni daa boli la binkɔbiri zaa na ni bɛ ti niŋ kompateesa. Lala compateesa ŋɔ daa niŋdila yuuni kam.

Yuuni kam Naa Jɛngbuni daa yɛn bola deen pal' shɛli ka binkɔbiri maa zaa dɛm.

Yuuni ŋɔ binkɔbiri maa daa yɛn zaŋla kpani n-labi zuɣusaa ka di chaŋ katiŋa di chandi tariga. Binkɔbigu kam daa kuli maanila o shili n-guhiri kompateesa maa dali.

Binkɔbiri maa shɛba daa pola pori n-ti taba ka lo alikaule taba sunsuuni zaŋ kpa ŋun yɛn di polo.

Kompateesa maa dabisili ni daa paai, binkɔb' shɛba bela Wabigu yaɣili, ka shɛba mi be Deei yaɣili, ka shɛba mi be Kparili polo.

Naa Jɛngbun daa yɛli toondana kam, "M bɔri ni yi labila kpani ŋɔ zuɣusaa yi labbu zaa ka di chaŋ katiŋa."

Ka sokam yaɣili kuli yɔhira. Ka Wɔbigu, Deei ni Kparili kuli chani kompateesa maa akpaakpu maa gbuni.

Yaɣa maa zaa daa pili taba ansarisi malibu. Bɛ daa lahi yiinila yila ka mali Wɔbigu, Deei, ni Kparili maɣisiri taba.

Kparili daa laya, ka dabiɛm gbaai Deei, ka Wɔbigu mi niŋdi ba yereyere.

Wɔbigu n-daa tuui labi. O daa labila kpani maa ni o yaa zaa.

Kpani maa daa yiɣiya ti lu katiŋa ha. Ka Naa Jɛngbun puhi ka paɣi Wɔbigu, ka Wɔbigu polo nim niŋ suhupiɛli.

Di saha ka deei maai o maŋa n-labi li. Ka kpani maa chaŋ ti yaɣi wɔbigu dini maa ni di lu shɛli maa ka naan lu.

Ka Wɔbigu pili kumsi!

Ŋun daa paya n-nyɛ Kparili. O daa labi kpani maa zuɣusaa, ka di lahi chaŋ katiŋa. O dini maa n-daa chaŋ n-gari Wɔbigu mini Deei dina maa. O daa luhi Wɔbigu mini Deei zaa. Kparili daa yɛliya, "Lala n-nyɛ li! N luhi bɛ zaa."

Kparili nyaandoliba daa wa waa, bɛ daa zaŋ kpaŋmaŋa pini maa n-ti Kparili.