Ayna wye-wye ba ba fi nna api gbo-gbo. A wye-wye ho lolo ba fi nna aba gmayi n mua bege, adoho lo kwa dna nkwo gmayi.

Osi n takada ye kwoin kwo kwa dabo tu Naeku bodo Naserian, adna amapuyi ngwaba, ba fi n akni ho a yi kwo ge Kenya. Amapuyi bo fi aba n adna aje bo fi dubu yimua-yimua.

Adna vinya dudu ba fi nba api nba min n onwuyi bodo n byai. Mba api ba min ba fi nkni bodo nkmayi.

Mba api n ba kpe sheyi ba min kwo nna gbe-gbeyi. Adna nkwo api muakpa ndu meta ngwa'ba har ngwa'tnu ya.

Adna nba pi ba na tnu-tnu gbo-gbo. Naeku bodo Naserian ba zhin a tnu-tnuyi nu. A tnu-tnuyi vinya ba zhin a yikwoza nu. "Yi zhin a yakun miyi nu, kuma yi ya wu azaje yakun mi!" Naeku wa dabo.

Adna ba mi yakun ba zhinaba ci-ci. Naserian wa cige, "Yi zhin ya mi ayakun dnagmai."

"Yi ba wufe she yi min a yakun wu," Naeku bo da. "Yi ya ya yi nyi abokun nkni -kni."

Naserian wa dnagbe-gbe, "Yi zhin ampani n agbekpegye ya nyi akni. Yi ya kna akni bechayi n mua-muayi!"

"Ntige yi ye yakun pa kwa shin, ya zhin ampani nna kniyi bodo wyeto nkwo fi nkni'i," Naserian wa dabo.

"She oba kni bodo wyeto gmaje ba yi, kwa wo dei-dei nge nzu. Adna mba api kwa muasa," Naeku wa be gbe.

"Yi kwu akni n ya nyi ya min kpa-kpa ncei zuwa she. Kpa-kpayi kwa wu kururu bodo nna lofi aba gbo-gbo," Naserian dabo.

"Adna kpa-kpa kwa muakpa nlo meta chuwagmayi!" Naeku wa dabo.

Adna kwo zhin ayna wye-wye n ba kuhun nnajeyi ba na zokwoyi gbo-gbo n ba ba zhin kpa-kpayi aba.

Naserian bodo Naeku ba zhin a tnu-tnuyi nu, ba min kpa-kpa. Adna nugbayi mba nu gwu kpa-kpayi. Anugbayi bodo ayinkwo ba ba knuya ba znai aba n ba-ba min kpa-kpa.

Adna a shigbe gayi ba ba dna sarauniya wye bodo adna byi-byi.

Kpa-kpayi kwo nna 'ba muabege. Ayakun lo ga saraunia, abi nba yakun lolo, bodo ayagi yakun. Kpa-kpayi ba si giaje.

Saraunia kwo nu zhin adna dnagmai, kwo kwa muasa.

Naserian wa cige, "Yi min kpa-kpa kwa gmiya gun shei ntige ese kwa lofi."

Naeku wa cige, "Adna kwo ye ese kwa bwa wye-wye." Naserian wa gwo du nge kpa-kpayi kwa shi ese to kwa guna nduwyi."

"Yi na afanu bayi aba n yi fi, yi ya gwo ayna bye-bye ya zhin nbaba ba zo ayna bodo," Naserian wa dabo.

"Dadayi!" Naeku wa da. "Ayna bodo ba zhin ampani n cei ba kpa adna ncei. Eyin nu zhin adna n yi ya nu ayna bodo."

Adna ba na Esu'yi bodo Sarauniya. A tnu-tnuyi ba ba ga ba nyagi dei-dei.

Sarauniya adna kwa bwa eye shiba zuwa eye shita. Wo ba myi wa she ozi n millionyi nwo wyei-wyei. Adna byi kwa kna be nna ozi nu kuma adna shigbe gayi kwa shi ba.

Naserian wa cige, "Adna ba pi yezhi n wan-bua dei-dei. Adna dohodohoyi kwo kwa bma zhin n kpa-kpayi mwa -mwa."

Naeku wa cige, "Adna dedehoyi n' tnu-tnuyi, kuma ba zhin kwo n karai. Ba ba zhin tnu-tnu bodo dei-dei."

"En," Naseria wa egbe dna. "Toh yi jezolo bokun nyi aba!"