Document

Gʊmɛnɛ kʊtucine jeŋjembu kʊja

Mimi Werna

Edwin Irabor

Ʊnyeŋkasoro n'ʊnyeŋkasǝmprǝ Mutia, Ɩɖaaya n'Arimu ba ɖa na rǝŋǝ ʊto kagʊcǝma. Ba sɔlɔ wàà, ba rɩ̂ ʊto kagʊcǝma. Ba tɩ yɛɛ ba kǝ̂ na gʊmɛnɛ ŋgʊɖee gʊ ɖa àlaŋ ma. Na 'bana a lǝ pɩ wàà : « Aaɩ. »

Na ba ɖa na saa 'bana a tǝ̂lǝ bagaja, k'a sara na. Halɩ Arimu a sukulsukul aɖoo nɖɔŋka na yɛɛ a kîɖe gʊmɛnɛ.

A tɩ lǝ wàà, a ɖôo ma, na 'bana a ri nɩ. Naa a taa 'ʊwǝlǝ kǝm, naa Arimu n'abanyeŋkasǝmprǝ ba rǝŋǝ gɩshɛbʊ, n'a lǝ wàà : « Masasara a ta sǝ̂ra ari anyɩn. » N'a lǝ acǝŋǝ na gɩlɛʊ wàà : « K'ɩ sɔlɔ ɩjɛɩ bapur kasuup na, aɖʊwaa masasara a naa rî anyɩn, ʊni na ma cʊ̂la ashee anyɩn. »

A lǝ gǝŋ na saa wàà, bapi ba tǝ ba tâba nɩ gʊmɛnɛ kagɩsɔɔ. N'a sǝba na tam na shee pɩ wàà : « Gʊmɛnɛ gʊ lee jeŋjembu kʊtucine nɖee ʊ wʊɖa ɩkashɩ na kiɖe banyɩŋkʊja ma na. Ama gʊ ɖa alaŋlaŋ na, k'ɩɩ sǝ̂ra akǝ na kʊ na. Masasara a taa rî anyɩn, gʊmɛnɛ ka gʊ sǝ̂ra akiɖe anyɩn na. » Na bapi ba ɖa na faŋafaŋa galei gaɖe laŋ.

N'Ɩɖaaya a lǝ 'bana wàà : « Jɩ̂ suuru, kǝ̂ gʊmɛnɛ kagɩsɔɔ ashee atʊ ! » Na Mutia a lǝ wàà : « Ɩɩŋ, n tɩ yɛɛ ma rǝ̂ŋǝ gboo. »
N'Arimu a kɔɔ pǝlapǝla 'bana.

Na 'bana a tǝlǝ na gɩlɛʊ wàà : « Ɩ cǝm, pâla ma ma ŋǝ̂. M̀m̀m̀... Tɔ, ambasɔlɔka, wâla ma. Gʊna atamka a kpa. »

Na Mutia a cu ace atɩ tɔɔ gɩpɛ ŋgɩɖee ba na yɩɖa wàà, Naha ma, ba cee na lo jɩ na ɖaa basǝlbɔrɩ ma. N'a tɔɔ jɩ ashee 'bana. Arimu a tɔɔ 'bana agɩsɔɔ kagʊɖaŋa ashee nɩ.

Ba sǝ atǝn shɛlɛm na ɖʊ gʊtɔ gɩsɔɔ ŋgɩɖee ba cee rǝŋǝ akpalá gʊyá ma. Naa ba ye sǝ̂ba, na Mutia a lǝ wàà : « Gʊna, sǝ̂ba ! » Na gɩsɔɔ gɩ sǝba.

« Tam ɖǝn nɩ, gʊmɛnɛ gʊ lee jeŋjembu kʊtucine na. Ʊtucine ɖe, ʊ foro gʊɖo ŋgʊɖee ba na yɩɖa wàà, Mbaɖeeɖee ma nɩ na. Ɩ lee gʊ wʊɖa ɩlǝmǝ na kiɖe bɛrɛ ma laŋ, ba na tʊŋa kʊ na. Ɩ ta naa shɛ̂ɖɛ, anyɩɩ ce atɩ nyem kabʊto. Ama k'ʊʊ na yɛɛ kalambaanɩ baja na.

Ʊtucine ɖe kajeŋjembu laŋ, yaauu aɖooɖooka a ɖa kɩpampaŋa na ! Bɛrɛ mbaɖee ba na pɩ atɩ na nyem bʊto bʊɖe ma, ba na nyem yaauu aɖooɖooka ɖe na, laalaa bapi. Yaauu aɖooɖooka ɖe a lee aránà, bʊkututo, bʊkelencaŋato, bʊtutolo, buruu, bʊkooreto na bʊcicibɔto.

Ʊshilé ɖǝn na ʊsǝmprǝ nɖawa mbɔnɔyar ɖǝn ba na yɩɖa wàà, Mbom ma, a kpa aɖoo na gapapiri gaɖǝn nɩ. 'Ʊkpaʊ nɩ n'a wa na atʊŋaka ɖǝn. Atʊŋaka ɖe k'a yɔ nɩ na, aɖe tɩ lee na nɩ shika. Ama atʊŋaka ɖe k'a rǝŋǝ ŋgaɖee 'ʊcine ʊ na lǝ nɩ ma na.

N'a faŋa nɩ ʊnyɩŋca àyó nɩ, naa lǝ nɩ wàà, a kʊ̂n ʊtucine kagʊpɔ. Ŋkǝŋ na Mbom a tǝlǝ naa fǝl bʊto sul.

A kpa ŋkǝŋ ma, n'a nyem bʊto gakupi gaɖǝn naa aŋǝ alaafɩya. N'a kiɖe kiɖe asir akal ashee agʊlɔ ɩjá wàà, ʊɖǝn k'a na kiɖe nɩ na. Ŋkǝŋ na a pom ntala nɖǝn alam bʊto nɩ, na bʊto bʊ tootoo. N'a kiɖe ɖaa bʊto bʊ lee gǝŋ ma, n'ɩ fana ashee nɩ. N'a taa nlakʊkǝlǝ nɖǝn alam bʊto nɩ acǝŋǝ, na bʊ kɔɔ tootoo acǝŋǝ.

Na Mbom agɩlopí gɩ ta jim bʊto nɩ. A tɩ saa maa a wʊ̂ɖa ŋŋuro nlaŋlaŋa, a pàá cî ayɔ na. A shɩ ta jim ma, n'ʊtucine ʊ tǝbǝ ashɛʊ àlaŋ, k'ʊ kɔɔ pɩ Mbaɖeeɖee ayɔ na. Ama ɩ tɩ pɩ ɩ naa ɖa gʊmɛnɛ ɖaa gʊ pra gato ʊto a ta nyɩ boŋo ma. »

Ŋkǝŋ na gʊna a lǝ wàà : « Aŋgɩsɔɔ kaayala jɩ gǝŋ. »

Na gʊna a taba pɩ wàà : « Ambasɔlɔka, mʊ lee ka ɩ sɔlɔ gɩsɔɔ gɩɖe páá gǝŋ ? Ɩ tɩ taba amʊ ma naa kǝ̂ jɩ baa tam apaŋa na. » N'Ɩɖaaya a lǝ wàà : « Aɖʊwaa ɩ tɩ lige amʊ ma naa kɔɔ na laakaarɩ ŋgaɖee amʊcine ʊ na lǝ amʊ ma. » Na Mutia a pele wàà, ɩ tɩ kaŋa n'aɖe a toŋo gʊmɛnɛ kato afǝlǝfǝlǝ.

N'Arimu a tʊŋa asaa naa lǝ wàà : « N sɔlɔ gɩsɔɔ gɩɖe, aɖʊwaa gɩ tɩ lige amʊ yaauu aɖooɖooka laŋ ! Jɩ̂ suuru, n tǝ ma sǝ̂ra aŋǝ kabʊɖǝn cei nnyǝmǝ nɖe aa ? »

Na gʊna a lǝ wàà : « Hmmm ! Ʊnyǝŋkrǝ ʊ ɖa nnyǝmǝ nɖe, gɩ tɩ gɩ nyêm yaauu aɖooɖooka gacǝŋ. » Na ba na taba bana wàà : « Gɩ wʊɖa n'akɩ ʊɖa aa ? » Na gʊna a lǝ pɩ wàà : « Nfɔlɩ ma kǝ̂ gʊmɛnɛ kaayala kagɩsɔɔ ashee anyɩn. »

You are free to download, copy, translate or adapt this story and use the illustrations as long as you attribute in the following way:

Gʊmɛnɛ kʊtucine jeŋjembu kʊja

Author - Mimi Werna
Adaptation - Malokia IBRAHIM INOUSSA
Illustration - Edwin Irabor
Language - Anii
Level - Read aloud