Amʊmpǝrǝ n ce atɩ ri gacikori n'asnaŋɔnja abʊmbɔnɔ. Ba ɖa ba ɖa ma ni, ʊshilé ɖǝn na gacikori ga ɖoo ŋŋɔ nɩ na yeeyee n'ʊciŋkǝrka. Ama gʊyeeyee gʊɖe nɩ na ga tɩ́ li.

Ŋŋɔ nɩ ŋkǝŋ na ga wa n'asnaŋɔnja abʊmbɔnɔ. N'asnaŋɔnja abʊmbɔnɔ a kim asǝla na jɩ naa alǝ jɩ wàà : « Akɔmɔ ɩ tɩ kpa amʊ páá. »

Na gacikori ga buye nɩ wàà : « Ʊŋono asnaŋɔnja abʊmbɔnɔ, n yɔ wàà, ʊ na yɛɛ yɛɛ á kûr amʊ. Ama n shee sɔlɔ wàà, ma cîi na ganyana. »

N'asnaŋɔnja abʊmbɔnɔ a taba gacikori wàà : « Á cîi na ganyana, baɩ laŋ ? K'ɩ ye amʊ na ! »

Ŋkǝŋ na gacikori ga buye nɩ wàà : « Baa n tǝ ma cîi, n sɔlɔ ɩ jɩ wàà, ma ɖâ gʊcǝma nɩ. »

N'asǝnaŋɔnja abʊmbɔnɔ a yɛɛ gaɖu asǝ naa asǝba gʊcǝma kʊkǝʊ.

Gacikori ga sǝba gʊcǝma gʊrɩka, ama 'ʊcine k'ʊ ɖa atǝn na.

Ɩsna baɖǝn ba ɖa ŋkǝŋ asǝla gaɖu. Ba rǝŋǝ gʊcǝma ma, na ba kim ace ba tɩ kiɖe bʊkɔ́ɩ bʊ na sara ma.

Asnaŋɔnja abʊmbɔnɔ a ŋǝ ɩsna baɖe ma, n'asampǝna ɩ kpa nɩ, n'a cu.

Ŋkǝŋ na gacikori ga tǝwǝ kagʊcǝma, aɖʊwaa ɩsna baɖe ba fʊra nɩ. Asnaŋɔnja abʊmbɔnɔ k'a kɔɔ kur nɩ na.