Nairobii kampá nɩ, bayifala baɖǝn ba ɖa, kǝ ba wʊɖa ɩfala na, kǝ ba wʊɖa batɔjʊka na, baɖe ba wʊɖa baŋkulo. Baɖe ba shɩ ɖa gǝŋ na yɛlɛŋshɩ baa njǝŋ.

Ʊshilé ɖǝn ba fol ʊpeli kʊpampaŋa ʊnyǝŋkrǝ ka akʊɖa gaja ma, na ba ta acar bashei. Ba na yɛɛ ba kǝ̂rǝ ʊnyǝŋkrǝ ma, na ba yɛɛ aŋɔ aɖʊ ʊtonu na shele.

Bayifala baɖe baŋkulo nɩ, Magosuwee a lee ka ajala kpataa.

Tam nɖee Magosuwee ayar n'anar ba ci apala nɩ ma, aɖe wʊɖa bʊja bʊnʊn. Babʊce kaŋkǝm na a ce atɩ ɖa 'ʊfà sul.

Ama 'ʊfà ɖe k'a toŋo nɩ n'ʊcine ʊɖɔŋkɔnɔ na. K'a na shee nɩ ʊjɩʊ gɩshɛbʊ na, naa naa ɖʊ nɩ atǝma ɩkaŋkra nɖee ɩ wu nɩ ma.

Magosuwee a ta shɩ lee gʊleu gʊɖǝn, shee 'ʊfà a kǝ nɩ.

A ta naa lǝ 'ʊfà wàà, aɖe tɩ yɛɛ a cê sukuru, aɖe kǝ nɩ gɩshɛbʊ naa lǝ nɩ wàà : « Akɩ ajore, akʊʊfaŋa gʊ tǝ gʊ sǝ̂ra atɔɔ akoɖǝn aa ? »

Gǝŋci Magosuwee 'ʊfà a naashɩɩ nɩ halɩ bʊja bʊriu, n'a tɩ cu 'ʊfà sul aɖoo aɖa mpá nɩ na yeeyee.

Mpá nɩ kʊɖaʊ ɩ sɔm ashee bayifala baɖe. Tuutuuma kǝ ba na ŋǝ ʊjɩʊ ba jɩ na. Tam ɖǝn, ba tɩ ri pɩ, tam ɖǝn gboo ba tɩ kǝ pɩ anaashɩɩ. Ba ta naa shɛ̂ɖɛ, ʊɖǝn a mana akiɖe pɩ.

Ɩtanɩ nɖee ba na nyiŋǝ na ŋǝ cei cei ma, ɩni nɩ ba na fʊra na balɔ ŋkulo nɩ, apele n'akoŋkono kayɔkɔ ba na pom na yala ma, kɩtanɩ.

Babʊboro n'akulo ɩsaaka nɖee ɩ na yɛɛ ɩ naa tʊ̂ŋa mpá ma, ɩ pala ka banɖulinya n kɔɔ kaŋkǝr awu ashee pɩ.

Ʊshilé ɖǝn na Magosuwee a fǝl aŋǝ baɖǝn baŋɔ ba wala atɩ ma, n'a waɖawaɖa naa aŋǝ mbʊpá ŋŋono nɖǝn alaa ncǝn, naa ashɛr kantuli naa aɖʊ 'ʊfǝlǝ nɩ.

A ta sǝ̂, aɖe ɖoo n'ambʊpá nɖe na kiɖe kɩfotoɩ ba laa ncǝn ma, k'a ye yɔ ʊtʊr na.

Mbʊpá nɖe n tɩ lǝ ʊpi nɖee a kpǝr naa apra alepree kabʊrja ma, agalei.

Aɖe tɩ faŋa wàà, maa aɖe gboo a prâ alepree kabʊrja.

Ɩɖe tɩ ɖa nɩ ɖaa maa aɖe na gǝŋ ayifala ɖe ba ŋɔn ataarii mbʊpá nɖe nɩ ma.

Ʊnyǝŋkrǝ ʊɖe ɖa, Magosuwee aɖe tɩ yeeyee na lee bara. Ŋkǝŋ na ʊsoro ɖǝn a ŋǝ nɩ naa akim asǝla na nɩ naa asala nɩ wàà : « Na galaɩ, amʊ na Tomaa. N tɩ lee ntǝma asǝla gaɖu atɩya. Gaɖuɩ ʊ naa ŋǝ̂ ʊjɩʊ na jɩ ma. »

N'a faŋa nɩ gafala penti kelencaŋa akpaakʊ buruu kaaja. A faŋa Magosuwee gafala ma, n'a lǝ nɩ wàà : « N sɔlɔ wàà, á pɩ̂ atɩ jɩ ʊjɩʊ. »

Na Magosuwee a taa agayɛ akiɖe gafala naa akiɖe Tomaa, n'a buye nɩ wàà : « K'á yɔ̂ na, n tǝ ma pɩ̂. »

Ɩŋɔrɔ ɩtʊrka nɩ, ʊpi ɖe a tɩ wa na Tomaa mpá nɩ. Tomaa a sɔlɔ a naa lǝ na mbaɖee ba ɖa mpá nɩ kǝ ba wʊɖa bakiɖeka gboo na ma. Aɖe tɩ ɖʊ gʊtɔ bʊlei mbʊɖee bɛrɛ ba na tam na shee nɩ ma.

A lee arɛ̀ asoŋsono na, jirmayar naa awʊɖa suuru. Na bayifala baɖǝn ba sǝba na ce gafala kelencaŋa akpaakʊ buruu kaaja nɩ, naa ba ŋǝ gɩshilikɔnɔ kʊjɩʊ na jɩ.

Magosuwee a sǝ ʊpeli kʊpampaŋa na kiɖe ambʊpá kɩfotoɩ ba laa ncǝn ma. Na Tomaa a pɩ atɩ sǝ asǝla na nɩ, naa ataba nɩ wàà : « Maakɔ kaalei jɩ mbʊpá nɖe n na lǝ ? »

Na Magosuwee a buye nɩ wàà : « Ʊpi nɖee a kpǝr naa apra alepreebʊrja ma, agalei jɩ. » Na Tomaa a kɔɔ taba nɩ wàà : « Baɩ na ba na yɩɖa ʊpi ɖe ? » Na Magosuwee a lǝ shɛlɛm wàà : « Kǝ ma yɔ na, kǝ ma yɔ ʊtʊr na. »

Ba naa tɩ́ wa, Magosuwee aɖe sǝba na tam abʊlei na shee Tomaa, na bʊkɔ́ɩ bʊ pala a cu aɖoo 'ʊfà sul atɩ ɖa mpá nɩ ma.

Tomaa aɖe shɩ tɩ ɖʊ nɩ gʊtɔ na rǝŋǝ bʊkɔ́ɩ a na lǝ ma, ama k'a pala Magosuwee a yɔ̂ bʊkɔ́ɩ a na yɛɛ a lêe ma na. Nɖǝn, ba ta naa jɩ̂ ʊjɩʊ, baɖe ba tɩ lee faawɩɩ akpaakʊ buruu kaafala nɩ.

Magosuwee abʊja tǝb kajɩŋgaarɩ kʊshilé na Tomaa a shee nɩ mbʊpá nfɔlɩ nɖǝn. Gapapiri gaɖǝn kʊpi nɖee a kpǝr naa apra abɔlkǝja ma, agalei jɩ mbʊpá nɖe n na lǝ.

Na Tomaa a tʊr mbʊpá nɖe kabʊlei akpalá gʊyá gʊyá ashee Magosuwee. Ʊshilé ɖǝn na a lǝ nɩ wàà : « N tɩ ŋǝ wàà, ʊ taa cê sukuru atɩ cerecere ʊtʊr, baɩ na ʊ na ŋǝ ? »

Na Tomaa a kɔɔ laa afaŋa nɩ acǝŋǝ wàà, aɖe a yɔ gaɖu gaɖǝn, gaɖuɩ bapi ba na ɖa na sǝra na ce sukuru ma.

Magosuwee a rǝŋǝ gǝŋ ma, ɩ ɖa nɩ a cê sukuru.

Ama a tɩ lige ŋgaɖee 'ʊfà a bʊŋa lǝ nɩ wàà, a lee ajore, k'a sǝra ayɔ akoɖǝn na ma. N'a na taba agʊlɔ wàà : « Ɩ ta jɩ̂ wàà, galei ŋgaɖe amʊfà a lǝ ma, ɩjá nɩ, n ta kpâ ŋkǝŋ, kǝ ba naa kǝ̂ amʊ aa ? Ɩ ta jɩ̂ wàà, gǝŋci, ma nyântra aɖa mpá nɩ na yeeyee. »

Magosuwee a lǝ ŋgaɖee ga na lee nɩ asampǝna ma, ashee Tomaa.

Ama Tomaa a lee koŋkaarɩ alǝ nɩ bʊlei alaa afaŋa nɩ wàà, maa a ta ɖâ sukuru ɖe nɩ, ɩ tɩ cǝ̂m awu ɖaa a naa ɖâ mpá nɩ na yeeyee ma.

Na ba shee Magosuwee ŋku nɖǝn akpaakʊ bʊtutolo kaafala nɩ, a ɖa, aɖe na bʊpisopi bʊnyɩʊ bʊɖǝn. Bapi ba ɖoo bɛrɛ tǝb ba ɖa gafala gaɖe nɩ ma.

Tantɩ Sisi gboo a ɖa ŋkǝŋ, aɖe n'ʊkúr, ɩsna beriu, ganyaʊ gaɖǝn na gacikori ŋgaɖee ga kpǝr gɩpǝla ma, gaɖǝn.

Magosuwee a sǝba sukuru. Ɩɖe sɔm ashee nɩ, aɖʊwaa a wʊɖa ayɔkɔ tuutuuma nɖee ɩ fǝl nɩ ma, kʊceruceru.

Nɖǝn, aɖe tɩ yɛɛ a pâla sukuru ɖe, ama aɖe taa akiɖe ɖaa a na yɛɛ a prâ alepree kabʊrja koo abɔlkǝja ma. A ta tâa akiɖe bapi banyɩʊ mbaɖee a ŋǝ bɩtaarii abʊpá nɩ ma, ɩɖe shee nɩ ɩkashɩ.

Magosuwee a sǝ akpaakʊ bʊtutolo kaafala kaakonu na tʊr sukuru kambʊpá nɖǝn.

Ŋkǝŋ na Tomaa a pɩ atɩ sǝ asǝla na nɩ, naa ataba nɩ bʊkɔ́ɩ mbʊpá nɖe kaalei ga na lǝ ma. Na Magosuwee a buye nɩ wàà : « Gapisopi ŋgaɖee ga na yɛɛ ga prâ afaŋaka ma, agalei jɩ. »

Na Tomaa a kɔɔ taba nɩ wàà : « Ʊpi ɖe a jɩ ka wàà, baɩ ? »

Na Magosuwee a buye nɩ na gɩlɛʊ mʊrʊmʊrʊ wàà : « A jɩ ka wàà, Magosuwee. »