O̩che̩nyilo̩ ee yo̩  no le̩ anya e̩pa.
Anya a ma ayi ache̩nya e̩pa,Ada mla O̩dachi .
Ayada ache̩nya no baa ya iho̩tu ku iyiwa ne̩hi.

Ada lo̩fu uklo̩ ne̩hi,o le yengee,ogbone̩ne̩ kla
le̩ ohilipu.
O̩dachi ,aya o̩ha,kwahi,lo̩no̩ o̩tu mla o ge blinyi.

Aonwo̩kpa  ya  iho̩tu Ada. O miye̩ e̩hi ale̩wa nma ohigbu uklo̩ olo̩fu ooya kunu.
 O̩dachi miye̩ oduma n. E̩ne̩ nu gbo̩ko ma imalanyi Ada.

E̩ne̩ ku Ada gbo̩ko du oche anu ogekwu a.
O̩nyada ku Ada  ya iho̩tu nu be̩ka  e̩ge̩ne̩ e̩ne̩nu  yaa n.

E̩ne̩ ku O̩dachi  che̩ le̩ Ada  ge ya odudu  uklo̩. O le̩ e̩ga  ko tutu  ino̩kpa n.
O̩dachi  ge je o̩kpa mla ohija  eko no̩ Ada  kla  ge ya uklo̩ a.

Nana  Ada ke  ya lo̩hi  ino̩kpka. O le ya lo̩̩hi  o̩jama kunu kla miye̩ e̩hi fiye̩.
E̩nya ya lo̩  ene ku O̩dachi ko cho̩nu gaga.

E̩chi eye,e̩ne̩ ku O̩dachi  le ta o̩kpa mla Ada nyo̩ gaa he̩ enkpo. E̩ne̩ ku O̩dachi  do̩ Ada ko ye̩ga eyipu-ipu  ku enyi ko he̩ enkpo̩ oyengee.
E̩nyi kwu Ada  kpo nyo̩ ogbee ku o̩kpa a.

E̩ne̩  nye̩ ga o̩le̩̩. O̩dachi do̩ka  e̩ge̩nya  no̩ o̩yine̩nu  no̩nya  yo̩.
E̩ne̩ nu ka ,"Ada yo̩ o̩kpa  mla anche̩nya  nu. O ge wa o̩le igbihaje̩".

Eko ne otu le bi a, O̩dachi  le ta o̩kpa  nyo̩ do̩ka ayadunu  no̩nya. O hi  iyenu, "Ada! E̩ge̩nya na yo̩?"
O̩dachi po ka ,"N yo̩ ogbee o̩kpa, E̩ne̩ kwukwu gwunta".

O̩dachi  ye̩ ga ogbee  o̩kpa  yo̩ ge  hi o̩yine̩ nu  no̩nya igwu."Ada! E̩ge̩nya na yo̩?"
O po ohi e̩do̩ eekpo, "N yo̩ ogbee o̩kpa, E̩ne̩ kwukwu
gwunta".

O̩dachi  ye̩ ga eyipu-ipu e̩nyi o̩kpa a. Enyi kwu o̩ pe̩ nyo̩  ogbee o̩kpa be̩ka Ada a.

O̩tu ku e̩ne̩ ku O̩dachi  le biya. O̩dachi  ho̩ abo̩ ohigbu ka o ma imalanyi Ada.
O gbo̩ko ya odudu uklo̩ abo̩hinu.