Iyange igenegh sev hungwa av shie u fam lu hii u gban yô, Beetse mogh zende u za nengen a anterev nav.

Za nôô shin kpeifi yô, tagher a zege iyô ne shin mi.

"U ngu zan hana?" iyô la kende pine Beetse nahala. "M soo u peren ifi ne," Beetse di na ikyar nahan.

Tsô iyô zamber a Beetse er, "We a rumun yô, ma m per vea we sha ciu mo me fatyô u peren sha tseeneke wam ga."

Er Beetse lu a mhôônom kpishi yô, a rumun er, "Ka shami, yô va m wase'u u peren ifi ne a se."

Tsô iyô la mogh kamber Beetse sha ityo maa ve per ifi ve gba yande la.

Mba peren mba been yô, Beetse kaa a iyô er a hungwa a se. Iyô di gema kaa a Beetse er, "Me kera hungwa ga, hemba doon mo pe m lu ne."

Ishima ta Beetse kwe. A hen ken ishima er, aluer un gbidye iyô ne kpa un a fatyô u bulan iyol na. Shi un a kôr i kpa i a fatyô u nyuman un.

Beetse gba keren or u nan a wa un kwagh u dedoo yô. Tsô a za kohol dwem.

Beetse sugh dwem, "Dwem u pande vee? Dwem rumun tsô a pine er, ankwagh ngu u u soo wer mo m wase'u yôô? Dwem gema pine Beetse nahan.

Beetse za hemen kaa nahan er, "M fa u ngu or u mimi, nahan m soo mer ma u er se ijir".

Beetse pase kwagh u iyange za hemen hen atô na man iyô yô, shi a za hemen a pine dwem mhen na sha mi.

Dwen kure ijir nahan er, "U per ifi a iyô sha er ashen i soo la, nahan kuma u i a hungwa shin inya hegen."

Iyô ongo nahan maa i nyiishi i sôr i kperegh Beetse sha ityo, i venda u hungwan shin inya.

Tsô ve kar ve yem pe icôngo yav lu memen yô, u za zuan a mhen ugenegh.

Mba za nyer yô, Beetse sugh Icôngo shi wuese er i fe kwagh kpishi yô, "A za hemen pine mhen u i sha kwagh u lu za hemen la."

Beetse kaa nahan er, "M wase iyô u peren ifi, se mba gbe keen yô, i venda u hungwan mo sha ityo sha." A za hemen a pine Icôngo er, "U ungwa nahan u kaa wer nyi"?

Icôngo kaa a ve cii er, "Aluer gba u me ôr ijir ne yô, saa ne cii ne tema ne lu hen inya, kpa a luun nahan ga je, ne cii ne hide ne yem pe ashen ne mogh la."

Iyô ongo nahan yô i hungwa Beetse sha ityo sha, i yav inya.

Beetse kaa a icôngo er, "Za a se hemen a ijirôron you, se ungwa."

Icôngo pine Beetse er, "Iyô hungwa ngi hen inya hegen, we u ngu a aga ken we, nahan shi ka nyi ijir u soo u ungwan? Icôngo lamen been je kar kera.

Beeste hide hen ken ishima fese maa za kav mkaanem ma icôngo lu ôr la.

Tsô Beetse gema aga u lu a mi ken we la gbidye iyô kende heregh kar yem kwagh na.