Peramo lu gumkwase hen tsombor u ican lu heregh kpishi yô.

Lu vea tsombor na hen zongo u Iciangi.

Gbenda gema lu môm tseegh u nyôron man duen ken zongo u Iciangi la.

Zege kon ne gema dondo a gar zongo u Iciangi.

Zege iyô lu shi i tsaan sha kon la.

I gba u ior a kar shin itinekon la keng man ve a yem: iyouci, kasua shin makeranta cii ye.

Zum u iyô la i ongo orumace acin cii yô, iyange i hungwa sha gbaakon i yisa gbenda.

Iyô la na yô, lu ican kpishi u ior ve kar sha gbenda la yô.

Ior mba hen zongo la ker igbinda i kôron iyô la cii ve lu fantyô ga.

Mô or tsô nan lu fatyô u kôron iyô la ga.

Kwagh gande tor u hen zongo la ver iyua sha ci u or nan a kôr iyô la cii.

Kpa lu nomsombaiorov tseegh i na ve ian i nyôron gesa shon ye.

Nomsombaiorov mba sha hanma kov cii nôngo kpa kanshio u kôron iyô la.

Mbagenev zua ave hingir iorov imiôngo, ve za kpa shi ve fatyô u kôron iyô la ga.

Iyange i cier iyol u nyôron man shi duen ken zongo la sha hanma shie cii.

Peramo iyange mogh za hen tor za zamber a na er, "Na'm ian mo kpa m nyôr gesa ne."

Ior gba sen un sha ciu un ngu kwase. "Gumwase ne ngu eren ka asenge," ve lu kaan wen imbwase nahan.

Kpa tor yô, gema lu henen kwagh sha mkaanem ma gumkwase la lu lam la.

Tor hen ken ishima nahan er, "Nomsombaiorov mba hen zongo ne cii kashio u kôron iyô ne. Ka kwaghbo u nan gumkwase ne ian ga."

Tsô tor na Peramo ian. Kpa ken ishima na yô, na jighjigh a na keng ga, sha ciu nomsombaiorov kpa za fatyô ga.

Peramo gema lu a mhen u dedoo.

Gumkwase la tume ikyese wa ingbye sha kuur la sha er i a fatyô u wuhen yô.

Tôô ikyese na sha ityo tsô mogh gba yemen pe kon la lu la.

Er i vanden eren keke la, tsô iyô la shi ungwa acin gba van. I kegh iyol u hungwan shi yisan gbenda.

Peramo lu vande wan iyol keghen a kegh!

"Ka iyange shon je ne," lu henen ken ishima er lu zan ikyua a kon la yô.

Zum u iyô la tsoo sha kon yô, maa i haa lu shin ikyese la.

Peramo osogh ingbye la fese maa ikyese cir kuur gbim! Cir iyô shinmi gbimii.

Peramo hide a ikyese la a iyô shinmi yem a mi ken zongo la.

Ior cii ger diing er lu nyôron sha hunda u shin kwator la yô.

"Peramo ngu a mfe shi a tsoghor ishima. Tor a kure ityendezwa na" ior cii lu sha ijô zever zever nahala.

Tor kpa kure ityendezwa na sha u nan Peramo inya kpishi i kahan tom, kua shi ibyua sha mi gbing.
Gumkwase hingir môm ken mbahemenev hen zongo la. Ior kpishi zaan hen na u za zuan a kwaghwan.

Iyange i yem a iyô la i za kende pe koson inyam, hingir u mba hen zongo la kpa ve a zende gbagesaa sha asema a ve.