Ka kom iyange i tomayange ataan tsô ter u Yateghtegh hua ikyondo sha use je, er sev ka mbu eren waan waan u aven nahan, cii man i wanger yô. A hua zege sueta u a nyer mngerem ga yô, cir idyegh i lun kala u ndor, cir idyegh la yisa ato kpaa. Ter la er wan na wegh ku saa me hide la.

Saan Yateghtegh iyol zum u ter na kaa a na er, "Nyian ka iyange i me kôr ishu kua shi iyua igenegh me hide a mi hen ya me va na'u yô."

Ishu man shi Iyua? Wei, man kwagh shon a lu di nyi? Baba ti henda ikyekye na ver ishigh shin ifi u Buruku. Shian shian yemen ihyongo i shin Tombo.

Inyon lu di sha kwavaôndo, "Ka nyi? Ka nyi? Ka nyi?" Inyon la lu eren di akenge nahan, i lu pinen nahan er "Ka nyi i gbe u Baba wou a hide'u a mi, Yateghtegh?" Baba tsongor imiemegh ki ikyekye, "Kegh tsô u va nenge kwagh shon."

Mbakôron ishu tile nenge er iyange due yô. Tsô ve gba a mi yengen ukper vev iyol. Ve kohol iniaha ve. Ve ver ishima ve fa pe iyange ahumbe ver ishigh la, tsô ve kende utso vev ken mnger.

Ter u Yateghtegh u vesen, Ornguze Sarwuan, kpa lu orkôronshu u numben a mi ga, cii man ngula kpaa, Sarwuan Kengkeng, ter u vesen vesen la kpa lu or u fa kwagh u shin mnger tsema tsema yô.

Tsô tso ve gba ikpyanger yemen sha agôndoamnger. Baba gema wegh gese naha, tughul anghar ken akpekpe a tsoo; naregh mon tsembelee tsenda agbende iyol gba nahan yemen.

Ve lu wan amo a yaren ikyôr shin mnger yemen.

Iyange la cii Yateghtegh lu ashe sha kwavaôndo, oo ta kpishi, wanger sha, shi ahumbe kpa kar ga cii. A kaa ken ishima er, "Ishu man shi iyua!" shi a pine er, "Ka nyi jim Baba a we ishima u hiden mo a mi shin ifi?"

Ashie agenegh yô, ka a hide'm aa ikwyembe, ashie agenegh ka a hide'm a akôôr, lu henen akaa ne ken ishima nahan.

Ashie agenegh ter u Yateghtegh ka a hide a va ôr un akaa, iyange igenegh la hide va kaa a na er, mngerem kua ukubeba kpishi haa sha tar.

Tsô mbayon ger amo, gba eren akenge, "Ka nyi la? Ka nyi la? Ka nyi la?" Ter na pine un er, aluer ka we yô u er nyi?

Ter na za hemen pase un nahan er, "Iyange se hide se kohol ukubeba mbala cica se za haa ken mnger, môm kpa kera shi sha tar ga."

Shi hanma shie u Baba a ze ikyôryaren yô, ka a hide a imio keng. Ka a waan amo shie u a lu nahan tso, shin shie u a lu keren kper, shin shie u a lu kulan kper sha kpaa.

Shi ka a wa amo la shie u a lu nahan ikyekye na hiden sha gbenda kpaa."

Yateghtegh lu hen ya vea Aya, sar Aya kpishi er ma u ye nyiantsa hen iyangebyeen la yô, kpa a kaa nahan er, a lu ikyôr fegh fegh je se zua a ankyambe u cuku nyian se ya ye. Gadia ishu kera ngi ken ifi kpishi ga, Aya lam je jingir ityogh.

Yateghtegh za kôr Aya wegh, ve per gbenda ve za tile shin kungur, vegher u yemen shin kpeifi la.

"Ka nyi se ya? Ka nyi se ya? Ka nyi se ya hen tugh mbunu?" Ve lu ungwan er mbanyon lu eren ayôôsu pinen yô.

Ve gba lamen kaan er, inyom i bee la mbakôronshu man mba va gban iyol er ayôôsu heen zôhô zwa kpishi.

"Ka nyi? Ka nyi? Ka nyi? Mbanyon kpa kpiligh ve iyol ve lu pinen.

Iyange ter u Yateghtegh kaa a ve er, ifi ne gbanger ka u yinan a or ga, shi ter na za hemen tese ve takeda uu i ne ve ian u yaren ikyôr heen yô, gadia ihyongo la lu i uter nav je. Kpa ve na ior cii ian i kôron ishu, shi mba ve soo u tungun iyol kpa shi ve tungun je!

Er Aya wa ajingi a kenger ica yô, hide hure ahôraveegh sha mcie, maa shi ve ungwa er ikpyamkor gba imio shin kpeifi yô.

Mba tungun iyol kar ayem gba duen sha tar, ve lu kohol akondo huan je, hanmaor lu gesen wegh tôôn kwagh u nan fetyô yô.

"Ka nyi? Ka nyi? Ka nyi?" Mbanyon shi gba pinen, "Ka nyi di ter a soo u hiden Yateghtegh a mi shin ifi?"

Ter u Yateghtegh kua anngbyanev mba ter na iyange ve ker kper za kôr zege ishu i cier iyol ne, i lu nôngon ken kper la kpyanger mngerem je er tso a va ur yô.

Tsô ter u Yateghtegh za sha ishima i taver, nôngo teghtegh maa sagh kper la, lu eren tom la wan imio i yaren ikyôr.

Ken masejime yô, zege ishu la va zua a ian maa senda hide haa ken mnger, mase shin ishu i kiriki tseegh ken kper la. Ka hen zum ne iyange Aya mase shirin ishima foogh ye.

Tsô mbakôron ishu mbala kohol ikyav vev mase hiden sha ya. Ter u Yateghtegh gema kusu kwagh ken wegh nagh hide a mi.

"Ka nyi? Ka nyi? Ka nyi?" Mbanyon mbala shi gba eren akenge pinen er, "Ka nyi u hidi Yateghtegh a mi?"

Yateghtegh kpa lu wa ishima, iyange va been yô, ter na za dugh inyigh ki zege ishu la va na Yateghtegh, kaa a na er ka iyua i wen hidi un a mi je la. A ta kor a har sha ikyer, ka kwagh u eren hwe a mi; kwagh doo wan er ter na a hidi un a kwagh u eren iceen a mi yô.